Athaona 42

Studie

         |

1 Zakaw ta Izi liata sâh a y tahpa vaw pahno ha ta, Zakaw chata a sawchapawpazy hnohta, “Khazia namâ mô thlâh ha tly?” tah ta.

2 Chatawhcha ano chata, “Izi liata sâh a y tahpa ei thei haw; thi leipa ta eima hroh thei nawpa ta, cha lâna chata zu ula, cha liatahpa cha eima châta za chalei teh u,” tah ta.

3 Chatanachata Zawsi uhta pahrawh cha, Izi tawhtapa sâh chalei awpa ta zu haw ei ta.

4 Zawsi nawhta Benzami deikua cha, a uhtazy hnohna chata, Zakaw ta pasiesa leipa ta, “Hmo pha leipa â tyh pathlei aw na,” tah ta.

5 Izarel sawchapawpazy cha, chyhsa a siepa sahlao hry liana chata sâh chalei awpa ta sie hra ei ta, Kana râh liata chhao chakâhna y hra tlôh ta.

6 Chatawhcha Zawsi cha Izi râh chô liana chata hyutuhpa châ ta; ano cha cha râh liata chyhsa zydua hnohta a zuahtuhpa a châ. Zawsi uhtazy cha a vy ei ta, a khupa ta ano a naoh chyu ei ta.

7 Zawsi chata a uhtazy vaw hmô ta, âmo cha pahno chyu ta, châhrasala âmo liana chata chi hropa hawhta a tao ta, reih chahrâhpa ta bie a chho ta. Ama hnohta, “Khataih tawhta a vypa e nama châ?” tah ta. Âmo chata, “Sâh chalei awpa ta Kana râh tawhta a vypa eima châ,” tah ei ta.

8 Zawsi chata a uhtazy cha pahno thlâh ha ta, âmo deikua chata ano cha pahno veih ei.

9 Chatawhcha Zawsi chata âmo kyh mâ lâta a hmôpazy kha a vaw thei heih ta; ama hnohta, “Mohparutuhpazy nama châ he, râh ruapa moh awpa ta namâ vy he,” tah ta.

10 Âmo chata a hnohta, “Pâpuh, châ bao va, na chakaotuhpazy he sâh chalei awpa ta a vypa eima châ mâh tâh.

11 Chyhsa pakha saw sai eima châ, chyhsa a do ngaitapa châ pi ta, na chakaotuhpazy he mohparutuhpazy châ chachei ma pi,” tah ei ta.

12 Ano chata ama hnohta, “Zo va na, râh ruapa moh awpa ta a vypa nama châ he,” tah ta.

13 Âmo chata, “Keimo, na chakaotuhpazy he, uhnawh pahrawhleino, Kana râh liata a ypa mo pakha saw eima châ; eima seihnai chaipa cha atahmâ eima paw hnohta y ta, pakha cha y khao vei,” tah ei ta.

14 Chatawhcha Zawsi chata ama hnohta, “Mohparutuhpazy nama châ ei tahpa ei kha, nama châ tlai he.

15 He tana heta pasiapa ta nama y aw: nama seihnai chaipa cha he liana heta â vy vei khiahtala, Phirao hrona reipa ta, he tawhna heta pua aw veih ei chi, ei cha tah ei.

16 Nâmo liata bie hmeiseihpa a y ma, y vei ma, nama bie pasia nawpa ta nama hry liata pakha tuah ula, nama nawhta cha a vaw chhi mawh sy, nâmo deikua cha chahrypa ta nama y chy aw; chata leipa ta la, Phirao hrona reipa ta, mohparutuhpazy nama châ tlai na, ei cha tah aw ei,” tah ta.

17 Chatawhcha ama zydua chata noh thôh patâh ta.

18 A noh thôh noh liana chata, Zawsi ta ama hnohta, “He tana heta tao ula nama hroh aw, Khazohpa chi tlôh na ta.

19 Chyhsa do ngaitapa nama châ khiahtala nama uhnawhpa hry liana heta pakha, namâ tâhna o liana heta chahrypa ta y mawh sy, nâmo deikua cha sie ula, nama chhôhkhazy chakâhpa châna chata, sâh phaoh teh u,

20 nama deihnai chaipa cha ei hnohta a vaw chhi teh u; chatanachata nama bie cha sia aw ta, thi aw veih ei chi,” tah ta. Chatanachata cha hawhna chata tao haw ei ta.

21 Chatawhcha âmo chata, “Eima nawhta chô liata eima hmo taopa kha thai lei hmeiseihpa a châ hih, ngiachhie awpa ta maniah a haw ngâ nota a pathipalôh nôpozie hmô thlâh hana chôta, eima nathlie khoh leipa kha; chavâta he nôpona heta maniah a tla thlu hih,” â tah ei ta.

22 Chatawhcha Rubena chata, “Hawtipa chôta hmo parao kha u, tahpa ta nama hnohta reih vana mâ? Nama nahthlie khoh vei kha zaw. Chavâta a thisaih phu cha ama la hih,” tahpa ta âmo a chhy ta.

23 Ama likawh ta reih a palietuhpa a ypa vâta Zawsi ta ama bie reipa cha a thei tahpa pahno veih ei.

24 Chatawhcha ano chata a heisai ei ta, kei cha ta; âmo lâta vaw kua heih ta, âmo cha bie a chho ta. Âmo hry tawhtapa Simeôna cha â nano ta a chhi ta, ama mohmô liana chata chahry ta.

25 Chatawhcha Zawsi chata ama sykhaozy cha sâh ta pabie awpah nata ama tâkâzy cha ama sykhao liata soh heih chyu awpa nata lâpi châta ama niepa pie awpa ta bie pie ta. Cha hawhna cha taopa haw ei ta.

26 Chatawhcha ama sâh cha ama alâzy paphaosa ei ta, cha tawhtapa cha pua haw ei ta.

27 Ama hry liata chyhsa pakha ta riebu liata alâ lao pie awpa ta a sykhao a pahy nona khata a tâkâ cha hmô thlâh ha ta, a sykhao paka liata y thlâh ha ta,

28 a uhnawhpazy hnohna chata, “Ei tâkâ cha ama vaw soh heihpa he tlyma i, ei sykhao liana heta a vaw y thlâh haw,” tah ta. Chatawhcha a pahlaw ei ta, “Khazohpa ta heta maniah a taopa he, kheihtazie vâ ma i?” tahpa ta a chalyuna chôta a moh thlâh ha ei ta.

29 Chatawhcha Kana râh liata ama paw hnohta tlô ei ta, ama chô liata hmo a vaw tlôpa zydua cha chho ei ta.

30 “ Cha ama râh hyutuhpa chata reih chahrâh ngaitapa ta bie maniah a chho ta, râh mohparutuhpa ta maniah rao ta.

31 Keimo ta a hnohta, ‘Chyhsa a do ngaitapa eima châ, mohparutuhpa châ chacheita ma pi.

32 Uhnawh pahrawhleino eima châ, eima paw sawchapawpazy châ khai pi ta; pakha cha y khao leipa ta, eima seihnai chaipa cha atahmâ Kana râh liata eima paw hnohta a y,’ eima tah.

33 Cha ama râh hyutuhpa chata eima hnohta, “He tana heta chyhsa a do ngaitapa nama châ tahpa ei pahno aw, nama uhnawhpa pakha ei hnohta siesai ula, nama chhôhkhazy chakâhpa châna chata sâh phaoh ula, sie teh u.

34 Nama uhnawhpa seihnai chaipa cha ei hnohta a vaw chhi teh u; chatanachata mohparutuhpa châ leipa ta chyhsa a do ngaitapa tlao nama châ tahpa ei pahno aw. Chatawhcha nama uhnawhpa he cha pie heih aw ei na ta, he râh liana heta sôh nama daoh aw,’ maniah a tah,” tah ei ta.

35 Chatawhcha ama sykhaozy cha ama parua nota, ama tâkâ sôh chyu cha, ama sykhao liana chata vaw y chyu ta; âmo sahlao nata ama paw chata ama tâkâ sôhzy cha ama hmô nata chi kaw ei ta.

36 Chatawhcha ama paw Zakaw chata ama hnohta, “Nâmo heta ei sawzy eina pahleisa eichihih, Zawsi y khao leipa ta, Simeôna chhao y khao hra vei, Benzami taih chhao a chhi syulyu heih awpa a chhuah heih eichi ta, cha hmo zydua chata eina tla thlu hih,” tah ta.

37 Rubena chata a paw hnohta, “Na hnohta ei vaw chhi heih leipa khiahtala ei sawchapawpazy pano he, thie thlâh ha mah y, ano cha ei ku liata na pavaosa la, na hnohta ei vaw chhi heih aw,” tahpa ta reih ta.

38 Châhrasala ano chata, “Ei sawchapawpa he nama hnohta a zu aw vei, a uhta thi haw ta, ano deita he châ tlôh ta, nama siena lâpi liata hmo pha leipa a zâ tyh khiahtala, ei luh pawhpa he pachârôhna ta thlâ lâta nama pakhôsa aw na,” tah ta.

  
Scroll to see more.