Athaona 35

Studie

         |

1 Khazohpa ta Zakaw hnohta, “Thyu la, Bethel lâ khy la, cha liana chata y teh; na uhta Esaw tawhta nâ râ nota na hnohta aluahpa Khazohpa châta cha liana chata maisâh tao mah y,” tah ta.

2 Zakaw chata a chhôhkhazy nata a hnohta a ypa zydua hnohna chata, “Nama hry liata mo hropa khazoh a ypazy cha soh ula, a pathaihpa ta nama chysia a patly teh u;

3 thyu ei suh u, Bethel lâ khy ei suh u, chatanachata ei nôpo nota nâ chhy ta, ei siena liata ei hnohta a y lymâpa Khazohpa châta maisâh ei tao,” tah ta.

4 Chatanachata mo hropa khazoh ama ku liata a ypa zydua nata ama nahkhao liata rahy amâ bapa zydua cha, Zakaw pie ei ta; Zakaw chata Sekhe kiapâhta aoka ry liana chata nyu ta.

5 Chatawhcha sie ei ta, ama chheipâh ta khihzy chata vaw chi ngaita kaw ei ta, Zakaw sawchapawpazy cha a chadai leipa ei ta.

6 Zakaw chata Kana râh liata Luza khih cha tlô ta, ano nata a hnohta a ypa zydua chhaota (Luza cha Bethel châ ta).

7 Cha liana chata maisâh tao ta, a uhta tawhta â râ nona khata cha liana chata Khazohpa a luahpa vâta a su cha El-Bethel bi ta.

8 Chatawhcha Rebeka ta a thyukheipa Debawrah cha thi ta, Bethel mathi liata aoka ry liana chata pabu ei ta, aoka mo cha Alaw-bakhuh* bi haw ei ta.

9 Zakaw cha Padanara tawhta a vy nata Khazohpa a hnohta aluah heih ta, byhnâ awpa ta.

10 Khazohpa chata a hnohta, “Na moh he Zakaw châ ta, na moh Zakaw cha tah khao aw veih ei, na moh cha Izarel tlao a châ ha aw,” tah ta. Chatanachata a moh cha Izarel bi haw ta.

11 Khazohpa ta a hnohta, “Kei Khazohpa Atotaotheipa ei châ: chi hluhpi pathlapa ta vaw pôh teh; phopi nata phopi hluhpi chhao nâ tawhta vaw y aw ta, na chakhai tawhta abeizy chhao ama vaw pua hra aw.

12 Abaraha nata Aisika râh ei piepa he, ei cha pie aw, na y vei tawhta na pathlazy chhao râh ei pie lymâ aw,” tah ta.

13 Chatawhcha Khazohpa ta ano a chhona su tawhna chata siesai haw ta.

14 Chatawhcha a chhona su liana chata, Zakaw ta alô tô bô ta, a chô liana chata hmohlâpa dopa leitha ta, a chô liata sathaw hry hra ta.

15 Chatawhcha Zakaw chata Khazohpa ta ano bie a chhona su moh cha Bethel bi ta.

16 Chatawhcha Bethel tawhna chata sie ei ta; Ephra khih tlô nawpa cha a hla chheih ha ta, Rakheli chata saw a zei ta, thata a zei haw ta.

17 Chatawhcha thata a zei nota nawpaytuhpa chata, “Chi khâ, sawchapawpa hropa na hnei aw hih,” tah ta.

18 Chatawhcha a thlahpa pathlie ta, (thi haw ta) a thi pathla hlâna khata a moh cha Ben-ôni bi ta, a paw deikua cha Benzami bi ta.

19 Chatanachata Rakheli cha thi ta, Ephra lâpi liana chata pabu ei ta, (Ephra cha Bethlehe a châ).

20 Chatawhcha a thlâ chô liana chata Zakaw ta alô bô ta; atahmâ taihta Rakheli thlâ lôbô a châ.

21 Izarel cha sie lymâ ta, Edera osâhpa khô liana chata a poh-o parai ta.

22 Chatawhcha Izarel cha cha râh liana chata a y nota, Rubena chata a paw nôtho Bilha cha a ziakhei ta; Izarel chata cha cha pahno haw ta. Zakaw sawchapawpazy cha pahrawhleino châ ei ta.

23 Liah sawchapawpazy cha: Rubenaa (Zakaw saw tuapa) zy, Sime-ôna zy, Livai zy, Zudah zy, Iskara zy, Zebulawna zy châ ei ta.

24 Rakheli sawchapawpazy cha : Zawsi nata Benzami châ ei ta.

25 Rakheli seichanônô Bilha sawchapawpazy cha : Dana nata Nathalai châ ei ta.

26 Liah seichanônô Zilpah sawchapawpazy cha : Kada nata Asera châ ei ta. Chhâzy cha Zakaw sawchapawpa Padanara liata a sapazy kha ama châ.

27 Chatawhcha Zakaw chata Abaraha nata Aisika yna Mamre tlyma, Kiriathaba liata a paw Aisika hnohna chata tlô ta, (cha cha Bebraw a châ).

28 Aisika hro chhôh cha, kô za kha nata kô sychaki châ ta.

29 Chatawhcha Aisika chata a thlahpa pathlie ta; chhâ a palopa ta thi ta; a chiheihzy hnohta pahlyhpa ta y haw ta; chatawhcha a awchapawpa Esaw nata Zakaw chata pabu haw ei ta.

  
Scroll to see more.