Athaona 34

Studie

  

1 Chatawhcha Liah sawchanônô Dina, Zakaw a sa papa cha, cha râh laihsazy hmô awpa ta charei ta;

2 Hivi mo Hamôra, cha râh abei sawchapawpa Sekhe chata ano cha vaw hmô ta, patu ta, a ziakhei ta, panawhsa haw ta.

3 Chatawhcha a palôhrupa cha Zakaw sawchanô Dina chô liana chata khâchâ y ta; cha laihsa cha a kyhpachâ ta, ano cha reikah pha ngaitapa ta bie a chho ta.

4 Chatawhcha Sekhe chata a paw Hamôra cha chho ta, “Cha laihsa cha lahpinô châta na hiapa mah y,” tah ta.

5 Zakaw chata a sawchanônô Dina cha Sekhe ta a papuapalei tahpa vaw pahno ta; a sawchapawpazy cha sibiepa su liata a sahroh hry liata y ei ta, amâ vy hlâ lei cha Zakaw cha a thlih thlâh ha ta.

6 Sekhe paw Hamôra cha Zakaw bie a chho awpa ta a hnohta vawh ta.

7 Zakaw sawchapawpazy chata ama pahno pata nahta sibiepa su tawhna chata vaw tlô ei ta; chatawhcha Zakaw sawchanônô a ziakheipa ta Izarel ahlao hry liata hmo molei ngaitapa, hmo tao chachei lei awpa cha, a tao hawpa vâta ama pachârôh ta, ama hiehâh ngaita ta.

8 Châhrasala Hamôra chata âmo bie chho ta, “Ei sawchapawpa Sekhe palôhrupa cha, nama sawchanônô chô liata khâchâ y ta; ngiachhiepa ta lahpinô châta pahneisa muh vy.

9 A hnei rairieh ei suh u; nama sawchanôzy maniah pahneisa ula, eima sawchanôzy chhao hnei hra teh u.

10 Eima hnohta y aw ei chi ta; lyurâhpa chhao he a kawpi a y thlâh ha aw; hezy liana heta ypa ta sôh daoh ula, hezy liana heta a pa-i teh u,” tah ta.

11 Sekhe chata laihsa paw nata a rilâhpazy hnohta, “Na ngiachhie teh u, ei hnohta nama reipa maih, ei cha pie aw ei.

12 Mâ nata hmo piepa cha, khazie rai haw ula nama reipa lymâ hawhta ei cha pie aw ei; khâparai châ sala laihsa cha lahpinô ta na pahneisa teh u,” tah ta.

13 Zakaw sawchapawpazy chata, ama sietanô Dina cha a papuapaleipa vâta Sekhe nata a paw Hamôra cha dôveipa ta a chhy ei ta.

14 Ama hnohta, “He chopawtai leipa chyhsa, eima sietanô piepa he, tao thei ma pi; cha cha eima châta mohchhiena awpa châ tlôh ta.

15 He hawhta bie namâ taih khiahta deikua cha, nama bie hawhna cha eima paryhsa aw; nama hry liata chapaw maihta chopawtaipa ta keimo hawhta y ula.

16 Chatanachata eima sawchanôzy cha pahneisa aw pi ta, keimo chhaota nama sawchanôzy hnei hra aw pi ta, nama hnohta y aw pi ta, chi kha eima châ aw.

17 Châhrasala chopawtai kyh liata eima bie nama zyh leipa khiahtala eima sawchanô cha a chhi aw pi ta, eima sie thlâh ha aw,” tah ei ta.

18 Ama bie chata Hamôra nata Hamôra sawchapawpa Sekhe cha palysa ta.

19 Chatanachata satliapa chata Zakaw sawchanônô cha a khoh kawpa vâta, cha hmo cha hawh leipa ta tao haw ta. Ano cha a paw chhôhkha zydua hry liatahpa za chaipa châ ta.

20 Chatawhcha Hamôra nata a sawchapawpa Sekhe chata ama khih kuh ochhi châ tlôh ei ta, ama khih mozy cha bie a chho ei ta.

21 Hao chyhsazy hao maniah a ryh ngaitapa ta y ei ta; chavâta he râh liana heta ypa ta hezy liana heta sôhdao mawh sy, ama châta chhao lyurâhpa he kawh kaw tlôh ta; ama sawchanôzy hao lahpinô ta zy hnei ei sihla, eima sawchanôzy chhao pahneisa hra ei suh u.

22 Chi kha eima châ nawpa ta eima hnohta ypa cha, he hawhta bie eimâ taih khiahta deikua cha: hao chyhsa haota â ryh maniah ama tahkhei aw: chopawtaipa ama châpa hawhta eima hry liata chapaw maihta cha chopawtaipa vaw châ hra ei sihla.

23 Ama sahrohzy, ama sôhzy, ama sâh zydua zy, keimo eih châ khai aw vei mâ? Ama bie he â ryh tahkhei ei suh u, eima hnohta ama pahrâ aw,” tah ei ta.

24 Hamôra nata a sawchapawpa Sekhe bie cha a khih kuh ochhi liata apuapa zydua chata zyh ei ta, a khih kuh ochhi liata a puapa zydua chapaw maih chata chopaw pataisa khai ei ta.

25 A noh thôh noh liata ama pasa locho ta, Zakaw sawchapawpazy hry liatahpa pano, Dina rilâhpa Simeôna nata Livai chata ama zaozi chaba rairiehpa ta a ru lâta khih cha a dyuh ei ta, chapaw zydua cha thie khai haw ei ta.

26 Hamôra nata a sawchapawpa Sekhe cha zaozi tiahpa ta thie ei ta, Sekhe o tawhtahpa Dina cha a chhi ei ta, pua haw ei ta.

27 Zakaw sawchapawpazy chata ama chyhsa thiepazy cha kei pachhai ei ta, ama sietanô ama papuapaleipa vâta khih cha hrao ei ta.

28 Ama mietahkupa zawzy, ama viahchao zawzy, ama alâzy, ama khih liata hmo a ypazy, ama lyu liata hmo a ypazy cha lapa ei ta.

29 ama sôh zydua nata ama sawnah chyhpatazy nata ama lahpinô zydua, ochhôh liata a ypa maih cha patu ei ta, hrao hrâ ei ta.

30 Zakaw ta Simeôna nata Livai hnohta, “Nâmo ta he râh liata a ypazy hry liata, Kana mo nata Pereza mozy hry liana heta, maniah pahaosapa ta, nôpopa ta maniah nama paysa; ei sahlao chyh tlôh ei ta, nâ dyuh awpa ta a pahmaohpakhy aw ei ta, eina thie thlâh ha aw ei, pahleipadiapa ta ei y aw, kei nata ei o chhôhkhapazy chhao heta,” tah ta.

31 Âmo chata, “Eima sietanô he sihrypa taopa hawhta na tao awpa a châ mâ?” tah ei ta.

  
Scroll to see more.