Athaona 32

Studie

  

1 Zakaw cha sie lymâ ta, Khazohpa vâlyuhchâpazy ta a vaw tyh ei ta;

2 Zakaw ta âmo cha a hmô nahta, “He he Khazohpa pheisaih ama châ!” tah ta. Chatanachata cha su moh châta Mahanai* bi ta.

3 Zakaw chata Seira liata Edôma lyurâhpa lâta a uhta Esaw hnohna chata a hmialâ ta zikyu a râpa pasiesa ta.

4 ama hnohta, “Ei zibeipa Esaw hnohna chata, he hawhna heta nama reih awpa a châ, ‘Na sei Zakaw ta he hawhna heta a tah. Laba hnohna chata khichhaipa châ na ta, atahmâ taihta y thlâh ha na ta;

5 viahchao tôhpazy, alâ nata mietahkupazy, seichapaw nata seichanôzy hnei na ta; chatanachata na mo dypa ei châ thei nawpa ta ei beipa chho awpa ta chyhsa ei vaw tuah,’ a tah,” tahpa ta, âmo cha bie pie ta.

6 Chatawhcha zikyu a râpazy cha Zakaw lâna chata vaw kua heih ei ta, “Na uhta Esaw kô kei tlô pi ta, chyhsa za palih a vaw chhipa ta cha dy awpa ta amâ vy mâh tâh,” tahpa ta reih ei ta.

7 Chatanachata Zakaw chata chi ngaita kaw ta, a nôpo ha ta; a hnohta chyhsa a ypazy, mietahkupa zawzy, viahchao zawzy, râraoseihpazy cha py no lâta pachhaih ta.

8 Esaw cha py kha hnohta a vaw tyh sala, a thie khiahta cha, py kha lâta a ypa cha amâ râ thei aw,” tah ta.

9 Chatawhcha Zakaw chata, “Hy ei pa Abaraha Khazohpa, ei pâ Aisika Khazohpa, hy ABEIPA, ‘Na râh lâta nata na chiheihzy hnohta kua heih bâ teh, chatanachata a phapa ta ei cha tao aw,’ na tahtuhpa.

10 na sei chô liata ngiachhiena zydua na palâsapa nata bie hmeiseihpa zydua, na palâsapa hry liana heta, a chyh chaipa chhao hmôpa tlâh châ va na; he Zawda he, ei chôhchahrei nata deitata chakâ na ta, atahmâ py no tlai ei vaw châ ha hih.

11 Ngiachhie ngâsâpa ta ei uhta tawhtapa, Esaw ku tawhtahpa tlai cha, na pachha mah y, nô nata sawzy chhaota eina vaw thie awpa chi tlôh na ta.

12 Nâma ta, ‘A phapa ta ei cha tao tlai aw, na pathlazy cha tilaipi sadi reihtiah leipa ta a hluhpa hawhta ei cha tao aw na,’ tah chi ta,” tah ta.

13 Cha zâna chata cha liana chata a rie haw ta, a hneipa hry liatahpa,

14 mie panô za no nata mie tôhpa syno, mietahkupa panô za no nata mietahkupa tôhpa syno,

15 râraoseihpa saoh haipa sythôh, ama tawzy chhaota, viahchao panô sypalih nata viahchao tôhpa pô hrawh, alâ panô syno nata alâ taw pô hrawh, a uhta Esaw châta lymâ ta a nano ta la ta.

16 Chazy cha py to a nano chyu ta a seizy ku liata pavaosa ta, a seizy hnohna chata, “Hmialâta sie ula, py to he a likawh pahla lymâ teh u,” tah ta.

17 A hmialâ a chhituhpa hnohta, “Ei uhta Esaw chata a tyhpa ta, ‘Ahy ei e na châ? Khataih lâ na sie aw? Na hmiakô liata a ypazy he ahy eih a châ?” tahpa ta, a cha hiahri tina chata.

18 Na sei Zakaw eih ama châ; ei beipa Esaw, na châta lymâ ta a cha paphaopa cha a châ; ano chhao, eima hnôh lâna haota a y,’ tah muh vy,” tahpa ta bie pie ta.

19 A pazipa nata a pazi heihtuhpa nata sahroh zaw zydua a haohtuhpa hropa zydua hnohta chhao, “Esaw, namâ hmô tita cha, cha hawhna hra chata nama reih awpa a châ.

20 ‘Na sei Zakaw cha eima hnôh lâna haota a y,’ tah hra teh u,” tahpa ta bie pie chyu ta. “Lymâ eih hmialâta a siepa heta a palôh patlâh aw ta, cha hnôh lâna chata a hmia ei hmô aw, chatanachata ei nâ vaw ly ngyu lah,” tahpa ta a pachâ.

21 Chatanachata lymâ cha a hmialâna chata sie ha ta; anodeikuacha cha zâna chata a py hry liana chata a rie haw ta.

22 Cha zâna chata thyu ta, a lahpinôzy pano nata, a seichanôzy pano nata, a saw pahrawhleikhazy cha a chhi ta, Zabaw chakana liana chata chaka haw ta:

23 Amo cha a chhi ta, chavah cha chakasa ta, a hneipa zydua chhao chakasa hra ta.

24 Zakaw cha, ano deita ta y ha ta; chatawhcha chyhsa pakha ta ano cha a zozâ khidei taihta a pia ta.

25 Chatawhcha pahnie vei tahpa a pahno nahta a byhpi ru â pazaona liana chata hria ta; a pia hai nona chata Zakaw byhpi ru cha a pahleih ta.

26 Chatawhcha ano chata, “Na pathlie teh, khih chhao a deih daihmâ hih,” tah ta. Ano chata, “Byhnâ eina awpa vei khiah chitala, cha pathlie aw va na,” tah ta.

27 Chatawhcha ano chata a hnohta, “Na moh khâpa e a châ?” tah ta. Ano chata, “Zakaw a châ,” tah ta.

28 Chatawhcha ano chata, “Na moh cha Zakaw cha tah khao leipa aw ei ta, Izarel* tlao ama cha tah aw; Khazohpa nata chyhsa a pia chi ta, pahnie haw tlôh chi ta,” tah ta.

29 Zakaw chata ano cha hiahri ta, “Ngiapachhipata na moh na chho teh,” tah ta. Ano chata, “Khâpavâta e, ei moh eina hiari chi?” tah ta. Cha liana chata byhnâ awpa haw ta.

30 Zakaw chata cha su moh cha Peniel* bi haw ta, “Khazohpa cha hmia nata hmia a chhypa ta hmô na ta, ei hrona he pahlôhpa châ tlôh ta,” tah ta.

31 Penuel a khô nona chata noh vaw chhi ta, ano cha vaw khai ta, a byhpi vâna chata vaw chabiah haw ta.

32 Chavâta atahmâ taihta Izarel pathlazy chata byhpi ru a pazaopa chakhai tharipa he nie beih veih ei. Zakaw byhpi ru apazaona cha a chakhai tharipa lia tlaita a hriapa vâta.

  
Scroll to see more.