Athaona 26

Study

          |

1 Cha râh liana chata Abaraha a hro nota chakâhna a tlô tuapa leipa khata chakâhna vaw tlô heih ta. Chatawhcha Aisika cha Philistina sahlao Abimeleka lâta Kera khih lâ zu ta.

2 ABEIPA cha a hnohta a vaw luah ta. “Izi râh lâ cha zu khâ; râh ei cha chho awpa liana chata y teh.

3 He râh liana heta y chy la, chatanachata na hnohta y aw na ta, byhnâ ei cha pie aw; he râh zydua he nâma nata na pathlazy piepa ta na paw Abaraha hnohta chhie ei sapa kha ei pa-i aw,

4 avâ liata awhsi zie ta na pathlazy cha papôh aw na ta, he râh zydua he na pathlazy ei pie aw; chatawhcha na pathla liana chata khizaw liata chi to ama hu â hieh aw;

5 Abaraha chata ei bie a ngiah ta, ei bie chhopazy, ei bie piepazy, ei bie raopazy, ei ryhpazy chhao a zyhpa vâna khata,” tah ta.

6 Aisika chata Kera khih liana chata pahrâ haw ta.

7 Cha khih liata chyhsazy chata a lahpinô thâtih hiahri ei ta, a hmi a phapa vâta, “He khih liata chyhsazy heta Rebeka vâta eina thie pathlei aw ei na,” tahpa ta, “Ei lahpinô a châ,” tah ngâh vei.

8 Cha liana chata bohpi a y tawhta Philistina mo abeipa Abimeleka chata opy tawhta sai ta, Aisika chata a lahpinô Rebeka â pangia palipa hmô ta.

9 Abimeleka chata Aisika cha aw ta, “Pachâ teh, na lahpinô a châ tlai he zaw; khazia e, “Ei sietanô a châ na tah?” tah ta. Aisika chata a hnohta, “Ano vâta ei thi pathlei aw na,’ ei tahpa vâta a châ,” tah ta.

10 Abimeleka chata, “Eima chôta na hmo taopa he, kheihtazie ta a châ tly? Chyhsazy hryta ahyrai ta na lahpinô he amâ ziakhei thei mâh tâh, chatanachata eima chô liana heta thai leina na vaw patlôsapa a châ aw,” tah ta.

11 Chatawhcha Abimeleka chata, “Ahyrai he chyhsa he tlyma, a hriatuhpa cha thie thlyu awpa a châ,” tahpa ta chyhsa zydua cha bie pie ta.

12 Chatawhcha Aisika chata cha râh liana chata sâh tu ta, cha kô liana chata a lie za kha ta hmô ta. ABEIPA ta byhnâ pie ta.

13 Ano cha vaw rôhnah ngaita ta, chyhsa rôhnah ngaitapa châna taihta lai rili ta.

14 Mietahkupa zawzy, viahchao zawzy hnei ta, chhôhkha hluh ngaitapa hnei hra ta, chatanachata Philistina sahlao chata mohnao kaw ei ta.

15 (Chatawhcha a paw Abaraha a hro nota a paw seizy ta tikhaoh rei ama chaopa zydua cha, Philistina sahlao ta nai ha ei ta, alei ta pabie khai haw ei ta..

16 Abimeleka chata Aisika hnohta, “Keimo tawhna heta sie syulyu ha teh; keimo hlâta na thatlô via tlôh ta,” tah ta.

17 Chatanachata Aisika cha, cha tawhna chata pua ta, Kera saikao liana chata a poh-o rai ta, cha liana chata pahrâ ta.

18 Chatawhcha Aisika chata a paw Abaraha a hro nota ama tikhaohrei chaopazy cha chao heih ta; Abaraha thi tawhna khata, Philistina mo chata vaw nai khai haw tlôh ei ta; chatawhcha a paw ta moh a vaw bipa lymâ hawhna khata a moh bi chyu ta.

19 Châhraala Aisika seizy ta saikao liana chata chao ei ta, cha liana chata tikhaohrei a hnawh a hneipa hmô ei ta,

20 Kera liata sahroh vaihtuhpazy chata, “Ti he, keimo eih a châ,” tahpa ta Aisika sahroh vaihtuhpazy nata a ei ei ta. Chatanachata rairuna a tyhpa vâta tikhaohrei moh cha Eseka* bi ta.

21 Chatawhcha tikhaohrei hropa chao heih ei ta, cha chhao cha chhu a chhuahpa ta a tu heih ei ta; cha vâna chata Sinah* bi ta.

22 Cha tawhtahpa cha a pasie ta, tikhaohrei hropa chao heih ta, cha cha chhu a chhuahpa ta a tu khao veih ei; chatanachata, “Atahmâ la ABEIPA ta su kawh ngaitapa maniah taopa haw ta, he râh liana heta chi hluhpi eima pathla ha aw,” tahpa ta a moh Rehôbô* bi haw ta.

23 Cha tawhna chata Beheba lâ sie ta.

24 Cha zâna chata ABEIPA cha a hnohta a vaw luah ta, “Kei he, na paw Abaraha Khazohpa cha ei châ; chi khâ, na hnohta ei y mâ tâh, byhnâ cha awpa aw na ta, ei sei Abaraha vâta na pathlazy cha ei papôh aw mâ tâh,” tah ta.

25 Cha liana chata maisâh tao ta, ABEIPA moh pado ta, cha liana chata a poh-o parai hra ta. Chatawhcha Aisika seizy chata, cha liana chata tikhaohrei chao hei ei ta.

26 Chatawhcha Kera tawhta Abimeleka cha a viasa Ahusa nata a pheisaih sahlao hyutuhpa Phikawl chhaota, a hnohta vawh ei ta.

27 Aisika chata ama hnohta, “Nâ hao ei chi ta, nâmo tawhta na pasiesa tlôh ei chi ta, khâpa vâta e, ei hnohta namâ vy tly?” tah ta.

28 Âmo chata, “ABEIPA cha na hnohta a y tahpa a siapa ta pahno pi ta; chatanachata na pei eima cha ty beih leipa hawhta nata hmo phapa dei leipa ta cha, na chôta khâpahma tao leipa pi ta, a phapa ta eima cha pasiesapa hawhna khata,

29 keimo chhao eima chhie nawpa rai, na tao leina awpa ta, eima likawh ta keimo nata nâma likawh lina tlai heta, chhiesana vaw y sala, na hnohta bie maniah pahraisa teh, eima tah. Atahmâ la ABEIPA byhnâ a totuhp na châ haw hih,” tah ei ta.

30 Chatawhcha ano chata âmo châta kyhchhi tao ta, niepa ta doh haw ei ta.

31 Mydi ta thyu ei ta, chhie a sakhâh rairieh ei ta; Aisika ta âmo pasiesa ta, chatanachata ano tawhna chata plôhtlâhpa ta pua haw ei ta.

32 Cha noh lilaw chata Aisika seizy cha a vy ei ta, ama tikhaohrei chopa thâtih vaw chho ei ta, a hnohta, “Ti eima hmô haw,” tah ei ta.

33 Ano chata cha tikhaohrei cha Shiba* bi ta, chavâta cha khih moh cha, atahmâ taihta Besheba châ ta.

34 Chatawhcha Esaw cha kô sypalih a châ nata Hiti chyhsa Beri sawchanô Zudi nata Hiti chyhsa Elawna sawchanô Basema lahpinô ta hnei ta.

35 chazy cha Aisika nata Rebeka pathipalôh rie a patheituhpazy châ ei ta.

  
Scroll to see more.