Athaona 24

Studie

  

1 Chatawhcha Abaraha cha vaw machâ ta, pawpi kawpa châ haw ta; ABEIPA chata Abaraha cha hmo to liata byhnâ pie ta.

2 Abaraha chata a sei, a chhôhkhazy hry liata machâ chaipa a hneipa zydua chô liata biehneituhpa hnohna chata, “Ngiachhiepa ta na ku kha ei byhpi ry liata chahraoh teh;

3 chatanachata ABEIPA avâ Khazohpa nata alei Khazohpa cha reipa ta, ei yna Kana sahlao laihsa hry liatahpa he ei sawchapawpa lahpinô châta hnei lei awpa ta, chhie ei cha pasakhâhsa aw,

4 eima râh lâta ei heihnawhzy lâta siepa ta, ei sawchapawpa Aisika he lahpinô na hiapa awpa a châ,” tah ta.

5 Sei chata a hnohta, “Chanô chata he râh lâna heta na zi khoh leipa sala; na sawchapawpa he na vaw puana râh lâna chata ei chhihtha aw mâ?” tah ta.

6 Abaraha chata a hnohta, “Ei sawchapawpa he cha lâna chata pakuasa lei awpa ta a chado teh.

7 ABEIPA, avâ Khazohpa ei paw o tawhta nata ei pina râh tawhta nâ chhihthatuhpa nata bie nâ chhotuhpa nata, “He râh he na pathlazy ei pie aw,’ tahpa ta ei hnohta chhie a satuhpa chata, ano tlai ta a vâlyuhchâpa cha na hmiakô liata pasiesa aw ta, cha tawhna chata ei sawchapawpa he lahpinô na hiapa aw.

8 Châhrasala chanô chata a cha zi khoh vei khiahtala, ei hnohta chhie na sapa tawhna heta na pathaih aw; khâparai châ sala ei sawchapawpa he cha lâna chata na pakuasa awpa châ vei,” tah ta.

9 Chatanchata sei chata a ku cha a zibeipa Abaraha byhpi ry liana chata chahraoh ta, cha kyh liana chata a hnohta chhie â sakhâh haw ta.

10 Chatawhcha sei chata a zibeipa râraoseihpa hry liatahpa pô hrawh a chhi ta, a zibeipa hmo phapa to phaopa ta pua haw ta; chatanachata thyu ta Mesôpôtamia râh liata Nahaw zy khih lâna chata sie ta.

11 Chatawhcha zâlâ ta chanôzy ti thai ama puana daihti nota, khih kiahpâh liata tikhaohrei kiahpâh liana chata a râraoseihpazy cha a pakhu paneihsa ta.

12 Ano ta, “Hy ABEIPA, ei zibeipa Abaraha Khazohpa y, ngiachhiepa ta atanoh he hlao na patlosa la, ei zibeipa Abaraha chô liana chata ngiachhiena paluahsa mah y.

13 Moh tua, tikhaoh kiahpâh liata a duah na ta, khih liata chyhsazy sawchanô sahlao chhao ti thaih awpa ta amâ vy hih.

14 He tana he châ mawh sy, laihsa ahy hnohta rai, ‘Ngiachhiepa ta ei do awpa ta na ti beih kha pahnai tua,’ ei tah nahta, ano ta, ‘ Doh teh, na râraoseihpazy chhao he do awpa ei pie aw,’ a tahtuhpa cha, cha tlai cha na sei Aisika châta na chyhsa raopa cha mawh sy. Cha liana chata ei zibeipa chô liana chata ngiachhiena na palâsa tahpa ei pahno aw,” ta.

15 Chatawhcha a rei khai hlâna chata, Abaraha nawhta Nahaw lahpinô Milka sawchapawpa Bethuel sawchanônô Rebeka cha tibeih a ngiahtlâh liata khaipa ta vaw pua ta.

16 Cha laihsa cha chhithai ngaitapa, laihsa kôpa châ ta, chapaw rai ta pahno pathei beih leipa ei ta. Tikhaoh lâna chata zu ta, a tibeih cha pabi ta, a khy heih ta.

17 Chatawhcha sei cha a tyh awpa ta a râ ta, “Ngiachhiepa ta na tibeih liata ti kha a chyhta na padosa tua,” tah ta.

18 Ano chata, “Ei beipa y, doh teh,” tah ta. A chatliepa ta a tibeih cha a ku ta pahnai ta, padosa haw ta.

19 A padosa khai tawh, “Na râraoseihpazy châta chhao ama do khai hlâ lei cha, ei thai lymâ aw,” tah ta.

20 Chatawhcha a chatliepa ta a tibeih cha châki liana chata patlai ta, ti thai awpa ta tikhaohrei lâna chata a râ heih ta, a râraoeihpa zydua châta ti thaih lymâ ta.

21 Sei chata ano cha moh thlâh ha ta, ABEIPA ta a khitlyna cha a pahlao tlohsa nata tloh leipa pahno nawpa ta a thlih thlâh ha ta.

22 Chatawhcha râraoseihpazy ama do khaipa ta nahta sei chata ngôh kâto sekel khophie a hripa nata a ku châta lâkyu miano ngôh sekel sâhrawh a hripa pachhi ta,

23 a hnohta, “Ahy sawchanô ma na châ? Ngiachhiepa ta na chho teh. Na paw o liata eimâ riena awpa su a y aw m? tah ta.

24 Ano chata a hnohta, “Bethuel, Milka sawchapawpa Nahaw a sapa sawchanônô ei châ,” tah ta.

25 Ano chata hnohta, “Sâhkô nata sahroh lao a hluhpi hnei pi ta, a riena su chhao eima hnei,” tah ta.

26 Chatawhcha sei chata a bôh ta, ABEIPA cha a naoh ta.

27 “Ei zibeipa chô liata a ngiachhiena hmeiseihna a bâh beih leipa ABEIPA ei zibeipa Abaraha Khazohpa cha reithaipa ta y mawh sy. Kei chhao he ABEIPA chata ei zibeipa uhnawhpazy o lâta eina vaw chhitha hih,” tah ta.

28 Chatawhcha laihsa cha a râ ta, cha biezy cha a no chhôhkhazy kei chho ta.

29 Rebeka chata rilâhpa hnei ta, a moh cha Laba châ ta; Laba cha pua ta, tikhaoh lâta chyhsa lâna chata a râ ta.

30 Kâto nata a sietanô ku liata lâkyuzy a hmô nata, “Chyhsa chata, chata khata,” na tah ta, tahpa ta a sietanô Rebeka bie reipazy cha a theipa ta nahta chyhsa lâna chata vawh ta; ano cha tikhaoh liata râraoseihpazy kiapâh liana chata a vaw duah thlâh ha ta.

31 Laba chata, “Nâ, ABEIPA byhnâ a totuhpa y, a vy la, ei o liata a ngia teh; khazia khôtho liata nâ duah thlâh haw? O nata râraoseihpazy châta su ei chhuanoh haw mâh tâh,” tah ta.

33 Chatawhcha ano cha niepa pie ei ta, châhrasala ano chata, “Ei vy chhâna bie ei reih hlâ lei cha nie aw va na,” tah ta. Ano chata, “Reih mah y,” tah ta.

34 Chatawhcha ano chata, “Abaraha sei ei châ.

35 ABEIPA chata, ei zibeipa cha byhnâ pie ta, chyhsa lai ngaitapa châ ta; ABEIPA chata a hnohta mietahkupa zawzy, viahchao zawzy, tâkâzy, ngôhzy, seichapawzy, seichanôzy, râraoseihpazy, alâzy pie hra ta.

36 Ei zibeipa lahpinô Sara ta a nôpi tawhta ei zibeipa châta sawchapawpa sa ta; ano hnohna chata a hneipa zydua pie khai ta.

37 Ei zibeipa chata, “Ei yna râh liata Kana sahlao laihsa hry liatahpa he ei sawchapawpa lahpinô châta na hiapa awpa châ vei;

38 ei paw o lâta ei heihnawhzy lâta sie la, ei sawchapawpa châta lahpinô hiapa teh,’ tahpa ta chhie na pasakhâhsa ta.

39 Kei ta ei zibeipa hnohta, ‘Chanô chata na zi khoh vei sala,’ tahna ta.

40 Ano chata ei hnohta, ‘ABEIPA, a hmiakô liata ei y tyhpa chata, a vâlyuhchâpa cha na hnohta tuah aw ta, na siena awpa lâna chata hlao a cha patlohsa aw; chatanachata ei sawchapawpa châta ei chiheihzy nata ei paw chhôhkhapazy hry liatahpa lahpinô ta na hiapa aw.

41 ei chiheihzy lâ na tlô tina chata ei hnohta na chhiesana tawhna heta na pathaih aw; laihsa cha ama cha pie vei khiahtala, kei liata na chhiesapa tawhna heta na pathaih haw,’ tah ta.

42 “Atanoh he tikhaoh cha vaw tlô na ta, ‘Hy ABEIPA, ei zibeipa Abaraha Khazohpa y, ei siena liana heta hlao eina patlohsa awpa chi khiahtala,

43 moh tua, tikhaoh kiahpâh liata ei duah hih, he tana he châ mawh sy, laihsa ti thai awpa ta a vaw puapa ahy hnohta rai, “Ngiachhiepa ta doh awpa ta na tibeih liata ti kha a chyhta na pie tua,” ei tah nahta.

44 ano ta ei hnohta, “Doh teh, na râraoseihpazy châta ti ei thaih aw na,” a tahtuhpa tlai cha, ei zibeipa sawchapawpa châta ABEIPA chanô raopa châ mawh sy,’ tah na ta.

45 “Ei palôhrupa liatahpa ei rei khai hlâna chata, Rebeka he a tibeih a ngiatlâh liata khaipa ta vaw pua ta; tikhaoh lâna chata zu ta, ti za thaih ta. A hnohta, ‘Ngiachhiepa ta ti na padosa tua,’ tah na ta.

46 Ano heta a chatliepa ta a ngiatlâh tawhtapa cha a tibeih za pahnai ta, ‘Doh teh, na râraoseihpazy chhao he dopa ei pie aw na,’ tah ta. Chatanachata doh na ta, râraoseihpazy chhao padosa hra ta.

47 Chatawhcha kei ta, ‘Ahy sawchanônô ma na châ?’ tahpa ta hiahri na ta. Ano heta, Bethuel, Nahaw sawchapawpa Milka ta a sapa sawchanônô,’ tah ta. Chatawhcha kâto cha a hnapasu liata patao na ta, lâkyuzy cha a kuzy liata paky hra na ta.

48 Chatawhcha ei luh a bôh na ta, ABEIPA cha a naoh na ta, ABEIPA, ei zibeipa Abaraha Khazohpa, ei zibeipa nawhta sawchanônô he, a sawchapawpa châta hiapa awpa ta lâpi do ngaitapa nâ chhithatuhpa cha reithai hra na ta.

49 Chatanachata ei zibeipa nama ngiachhiena ta a chô liata hmeiseihpa ta nama tah awpa khiahtala, na chho teh u; nama tah lei awpa rai ta, na chho teh u; chachâh lâ tlyma, chavei lâ tlyma ei heih thei aw,” tah ta.

50 Chatawhcha Laba nata Bethuel chata a chhy ei ta, “He hmo he ABEIPA tawhta a puapa a châ hih; a chhie a pha rai na hnohta reih thei ma pi.

51 Moh tua, Rebeka cha na hmiakô liata a y mâh tâh, a chhi la, sie teh, ABEIPA ta a reih hawpa hawhta, na zibeipa sawchapawpa lahpinô ta y mawh sy,” tah ei ta.

52 Abaraha sei chata ama bie cha a thei pata nahta, alei lâ a bôhpa ta ABEIPA a naoh ta.

53 Chatawhcha sei chata tâkâ ri a tobinazy nata ngôh a tobinazy nata chysiazy, pachhi ta Rebeka cha pie ta; a rilâhpa nata a nô chhao cha hmo sôh ngaitapazy pie hra ta.

54 Chatawhcha ano nata a viasazy chata niepa ta dôh ei ta, a rie haw ei ta. My ta thyu ei ta, “Ei zibeipa lâta na pasiesa bâ teh u,” tah ta.

55 A rilâhpa nata a nô chata, “Laihsanô he noh chyhta, noh hrawh chhâ eima hnohta y chy mawh sy; cha tawhna chata sie lah vâ,” tah ei ta.

56 Châhrasala ano chata ama hnohta, “Na pahawh khah u, ABEIPA chata ei siena liana heta hlao na patlohsa haw tlôh ta; ei zibeipa lâta ei sie thei nawpa ta tlao na pasiesa teh u,” tah ta.

57 Amo chata, “Laihsanô cha aw awpi ta, ano pakah tlaita eima chho aw,” tah ei ta.

58 Rebeka cha aw ei ta, a hnohta, “He chyhsa hnohna heta na ie aw mâ?” tah ei ta. Ano chata, “Ei sie aw,” tah ta.

59 Chatanachata ama sietanô Rebeka nata a hâtuhpa nata Abaraha sei nata a sahlaozy cha pasiesa ei ta.

60 Rebeka cha byhnâ awpa ei ta, a hnohta, “Eima sietanô, nâ cha thy sâh hluhpi nô vaw châ la; na pathlazy chata amo a haotuhpazy kuh ochhi cha hnei se!” tah ei ta.

61 Chatanachata Rebeka cha thyu ta, a seichanôzy chhaota, râraoseihpazy liana chata kiah ei ta chyhsa cha zi haw ei ta; sei chata Rebeka cha a chhi ta, sie lymâ haw ta.

62 Chatawhcha Aisika cha Belahairô lâ tawhna chata a vy ta, Neke râh liata a pahrâpa châ tlôh ta.

63 Chatawhcha Aisika cha zâlâ ta dy awpa ta lyu lâ pua ta; mohmia pasaih ta moh ta, râraoseihpazy a vy haipa cha hmô ta.

64 Rebeka cha mohmia pasaih ta, Aisika a hmô pata nahta râraoseihpa tawhna cha chô ta,

65 sei hnohna chata, “Lyu liata maniah a dy awpa ta a vypa hao ahy maw?” tah ta. Sei chata, “Ei zibeipa a châ hu,” tah ta. Chatawhcha â khuna poh la ta, a khu haw ta.

66 Chatawhcha sei chata a hmo taopa zydua cha Aisika chho ta.

67 Aisika chata Rebeka cha a nô Sara poh-o lâna chata a ngiakhei haw ta, Rebeka cha hnei ta, a lahpinô vaw châ haw ta; ano cha a kyhpachâ kaw ta. Chatanachata Aisika cha a nô thina kyh liana chata thlahlôhpa ta y haw ta.

  
Scroll to see more.