Athaona 23

Studie

  

1 Sara hro chhôh cha kô za kha nata syno nata kô sari châ ta; chazy cha Sara hro chhôh kô a châ.

2 Chatawhcha Sara cha Kana râh liata Kiriatharba liana chata thi ta, (cha cha Hebraw a châ); Abaraha cha Sara mâchhiesa awpa nata chakhei awpa ta a vy ta.

3 Chatawhcha Abaraha ta a thihpa ri yna tawhtapa cha thyu ta, Hiti mozy hnohna chata.

4 “Nama hry liata khichhaipa nata a paihpa dei châ na ta; ei a thihpa ri he hmô khao leipa ta ei pabu thei nawpa ta su na pie te,” tahpa ta reih ta.

5 Hiti mozy chata Abaraha a chhy ei ta, a hnohta.

6 “Abeipa y, maniah nahthlie tua; nâ cha eima hry liana heta abei rôhnah ngaitapa châ chi ta. Eima thlâzy liana heta na kho chaina liata na a thihpa cha pabu mah y; na athihpa na pabuna awpa ta eima hry liata ahyhmah ta eima thlah cha thlyu aw ma pi,” tah ei ta.

7 Abaraha cha thyu ta, cha râh liatahpa Hiti mozy cha a naoh ta.

8 Ama hnohta, “Ei athihpa cha hmô khao leipa ta ei pabupa aryh nama tah khiahtala,na nahthlie ula,

9 Makapela lôpu, alyu chao liata a ypa, ahneipa kha, eina pie awpa ta Zôhara sawchapawpa Ephraw lâta na hiapa teh u. Nama hry liata pabuna su ryu châta ei hnei thei nawpa ta âma â daihpa rakha ta piepa ta na pie mawh sy,” tahpa ta chho ta.

10 Chatawhcha Ephraw chata Hiti mozy hry liana chata a tyuh thlâh ha hra ta; chatanachata Hiti chyhsa Ephraw chata Hiti mozy theina liata a khih kuh chhikao liata a ngiapa maih thei hâh liana tlai chata.

11 “Châ bao va, abeipa y, na nahthlie tua; lyu cha cha pie na ta, a chhôh liata lôpu a ypa chhao cha ei cha pie hra; ei chiheih sawzy mohmô liata ei cha pie; na athihpa cha pabu thlâh ha teh”, tahpa ta Abaraha cha a chhy ta.

12 Abaraha cha cha râh liata chyhsazy hmiakô liata a bôh ta a naoh ta.

13 Cha râh liata chyhsazy theina liana chata Ephraw hnohta, “Aryh na tah khiahtala, ngiachhiepa ta na nahthlie tua; lyu mâ cha tlao ei cha pie aw; kei tawhta la la, cha liana chata kei athihpa cha ei pabu aw,” tahpa ta reih ta.

14 Ephraw chata Abaraha a chhy ta,

15 “Abeipa y, na nahthlie tua; alei su tâkâ sekel za palih cha, nâma nata kei châta rei khi a tloh ma? Na athihpa cha pabu thlâh ha teh,” tah ta.

16 Abaraha chata Ephraw bie cha zyh ta, Abaraha cha Hiti mozy theina liata Ephraw ta tâkâ a reipazie tâkâ sekel za palih sôhryhpa sahlao ta ama hmâh tyhna cha a kho pathlia ta, Ephraw pie haw ta.

17 Chatanachata Ephraw lyu, Mamre dady ta Makapela râh liata a ypa cha, alyu a chhôh liata lôpu a ypa nata, lyu liata tho a ypa zydua chhaota, alyuri chheipâh zydua liata tho a ypa zy chhao chata,

18 Hiti chyhsa mohmô liata a khih kuh chhikao liata a ngiapa zydua hmiakô liana chata ryu châta hnei ta.

19 Abaraha ta a lahpinô Sara cha Kana râh liata Mamre dady ta (cha cha Hebraw cha ta) Makapela lyu liata lôpu liana chata pabu haw ta.

20 Lyu nata a chhôh liata lôpu a ypa cha, pabuna su ryu châta Abaraha cha Hiti mozy ta a ipa ta pie haw ei ta.

Scroll to see more.