Athaona 16

¹ Abara lahpinô cha saw rai phaoh leipa ta, Sarai cha Izi chyhsa seichanô pakha hnei ta, ano moh cha Hakara châ ta.

² Sarai chata Abara hnohta, “Nahthlie teh, ABEIPA ta saw hnei awpa eina pasai leipa he; ngiachhipa ta ei seichanô hnei teh, ano liata sawzy ei hnei thei ngyu la,” tah ta. Chatanachata Sarai bie cha a ngiah ta.

³ Abara lahpinô Sarai chata, Abara Kana râh liata kô hrawh a pahrâ tawhna chata, a seichanô Izi chyhsa Hakara cha a chhi ta, a vahpa Abara hnohta a lahpinô ta y awpa ta pie ta.

⁴ Chatawhcha Hakara cha hneita saw phao ta; Hakara cha saw a phaoh tahpa a pahnopa ta nahta a zibeinô cha mohnao ha ta.

⁵ Chatawhcha Sarai cha ta Abara hnohta, “Ei chôta hmo doleipa he na chôta y se! Ei seichanô cha na chaku awpa ta cha pie na ta, saw a phaoh tahpa â pahnopa ta nahta na mohnao ha ta. ABEIPA ta nâma nata keima thâtih cha pasia se!” tah ta.

⁶ Abara deikua chata Sarai hnohta, “Nahthlie teh, na seichanô cha na ku liata a ypa a châ mâh tâh, na khozie hawhta tah teh,” tah ta. Sarai chata a rie patheisa kaw ta, chavâta ano cha a râsai haw ta.

⁷ ABEIPA vâlyuhchâpa chata râhpathohpa tihnawh kiapâh liata Shura pangaina lâthlôh liata tihnawh kiapâh liana chata vaw hmô ta.

⁸ A hnohta, “Hakara, sarai seichanônô, khataih tawhta nâ vy, khataih lâ e na sie aw?” tah ta. Ano chata a hnohta, “Ei zibeinô Sarai hmiakô tawhta ei râ,” tah ta.

⁹ ABEIPA vâlyuhchâpa chata a hnohta, “Na zibeinô Sarai lâta kua la, ano reisai ta y teh,” tah ta.

¹⁰ ABEIPA vâlyuhchâpa lilaw chata ano hnohta, “Na pathlapazy cha thata papôh aw na ta, ama hluhzie reih tiahpa châ aw vei,” tah ta.

¹¹ Chatawhcha ABEIPA vâlyuhchâpa chata a hnohta, “Nahthlie teh, saw phaoh haw chi ta, sawchapaw sa aw chi ta; ABEIPA ta na rietheinazie he a cha pahno hawpa vâna he ta; a moh cha Ishmael na bi aw.

¹² Ano cha chyhsazy hryta alâ hrapa hawhta châ aw ta, ano chata chyhsa to adyuh awta, chysa tota ano chhao ama dyu hra aw; ano cha a uhnawhpa zydua hmiakô liata a y aw,” tah ta.

¹³ Chatawhcha Hakara chata ano bie a vaw chhotuhpa hnohta, “Nâ cha hmô theituhpa Khazohpa na châ,” tahpa ta, ABEIPA moh cha bi ta; “ He liana tlai heta nâ hmôtuhpa Khazohpa cha ei hmô tlai tlyma i?” tah ta.

¹⁴ Chavâta tikhaohreipa cha Belahairô* bipa châ ta, Kadesa nata Bereda khih likawh liata a y,

¹⁵ Chatawhcha Hakara cha Abara chôta sawchapawpa sa ta; chatawhcha Abara chata a sawchapawpa, Hakara sapa cha, a moh Ishmael bi ta.

¹⁶ Hakara ta Abara chôta Ishmael a sa nona chata, Abara cha kô sychaki nata kô charupa a châ.