Athaona 15

Study

          |

1 He hmozy hnôhlâna he ta ABEIPA bie cha Abara hnohta aluahna ta vaw tlô ta, “Abara, chi kha y, na vyphaoh nata na lymâ rôhnah ngaitapa cha ei châ,” tahpa ta.

2 Châhrasala Abara chata, “Hy ABEIPA Khazohpa y, khâpa e eina pie aw chi, saw leipa ta y palâh aw na ta, ei ryutotuh awpa cha Damaska khihpa Eliaza châ tlôh ta?” tah ta.

3 Abara lilaw chata, “Pachâ teh, chi rai na pathlasa tlôh leipa chi ta, ei o chhôh liatahpa sei ta a pihpa chata ryu cha tlao a to aw,” tah ta.

4 ABEIPA bie cha ano hnohta vaw tlô ta, “He chyhsa he ta na ryu cha to aw vei; nâma chhôh tawhta a puapa cheingeipa cha na ryu châ totuh awpa tala a châ aw,” tahpa ta.

5 Chatawhcha ano cha khôtho lâ puakhei ta, “Avâ lâ khi moh la, awhsizy khi na reih thei khiahtala reih tua,” tah ta. Chatawhcha ano lilaw ta, “Na pathlazy khi hawna khita ama châ aw,” tah ta.

6 Chatawhcha ano chata ABEIPA cha a ngiapâ ta; ano chata a ngiapâna cha a siana ta raopa haw ta.

7 Chatawhcha a hnohta, “He râh he pahrâ awpa ta Kaldia mo râh Ur khih tawhta châ chhithatuhpa ABEIPA Khazohpa ei châ,” tah ta.

8 Ano chata, “Hy ABEIPA Khazohpa y, ei pahrâ aw tahpa kheihta e ei pahno aw?” tah ta.

9 Ano chata a hnohta, “Viahcho zeinô kô thôhpa nata, mie panô kô thôhpa nata, mietahkupa chapawhpa kô thôhpa nata vachhuh nata pivaw taw na vaw cheipa teh,” tah ta.

10 Cha zydua cha vaw cheipa ta, a liah â khona liata patlaw chyu ta, a tlaw hiakha cha a tlaw hiakha lâ dady lymâ ta soh ta; pavawzy deikua cha patlaw leipa ta.

11 Chatawhcha pavaw saheipa a niepazy cha sa chô liana chata a zâ choh tyh ta, Abara chata a vaw laih chhy ta.

12 Nohtla hai nota Abara cha mokuh pahâh ngaitapa ta a mô ha ta; zohna kyh rarôhypa nata chichhih ngaitapa ta ano vaw khu ta.

13 Chatawhcha ABEIPA ta Abara hnohta, “Na pathlazy cha âmo râh leipa liata khichhai ta y aw ei ta, sei ama châ aw tahpa a siapa ta pahno mah y, chatawhcha kô za palih rietheipa ta y aw ei ta.

14 chatawhcha amâ châkaopa phopizy chhao cha ei hrie aw, cha hnôh lâna chata sôh hluhpi hneipa ta ama vaw pua aw.

15 Nâ deikua cha, cha pathlazy hnohta thlahlôh ngaitapa ta sie aw chi ta, pawpipa ta a cha pabu aw ei.

16 Chatawhcha chhâ palihna liana chata he liana heta ama vaw kua heih aw; Amawri mozy moleinazy cha a ki mâh tlôh lei khâh ta,” tah ta.

17 Noh tla ta a vaw zoh nah chata, patisana mei a khu ngâpa nata sa tlaw rachheipa hryta meirei kâ ngâpa a hlaihlâ ngâpa vaw y ta.

18 Cha noh liana cha ABEIPA chata, “He râh he Izi râh chavah tawhta chavah laipa Euphrate taihta na pathlazy ei pie haw,

19 Kena mozy, Keni mozy, Kadamô mozy.

20 Hiti mozy, Periza mozy, Rephai mozy,

21 Amawri mozy, Kana mozy, Kikasi mozy, Zebu mozy chhaota pie hra na ta,” tahpa ta Abara hnohta bie hraih haw ta.

  
Scroll to see more.