Athaona 11

Studie

         |

1 Chatawhcha chyhsa zydua cha reih miakha nata biereizie miakha châ ta.

2 Chatawhcha chyhsazy cha nochhi lâchhâh ta amâ pasie laih no ta, Shinara râh liata bypi hmô ei ta; cha liana chata pahrâ haw ei ta.

3 Âmo nata âmo liata, “Â vy teh u, beihlei tlozy tao ei sihla, rao ei suh vy,” a tah chyu ei ta. Chatanachata alô vyuhpa ta beihleitlo raopa hnei ei ta, a baipâna châta chiatlao hnei hra ei ta.

4 Chatawhcha âmo chata, “Avy teh u, khihpi tao ei sihla, o sâhpa a laki avâ daih awpa ta sa ei sihla, eima moh pathâhsa ei suh vy, chata leipa ta la alei chô zydua liana heta papaipa ta eima y pathlei aw na,” a tah ei ta.

5 Chatawhcha ABEIPA cha chyhsa sawzy ta, khihpi nata o sâhpa ama sapa cha moh awpa ta a zu ta.

6 ABEIPA chata, “Moh teh u, chyhsazy cha pôhkha châ ei ta, ama zydua ta reih miakha hmâh tlôh ei ta; he hmo he tao a chhuahpa he pakhâ theipa rimâ châ khao aw vei.

7 A vy ula, zu ei sihla, reih amâ pahno thei khao leipa ta, ama reih za pananopa ei suh vy,” tah ta.

8 Chatanachata ABEIPA chata âmo sahlao cha, cha su tawhna cha alei zydua lâna chata papai ta, ama khihpi sapa cha bâsai ei ta.

9 Chavâta â mo cha Babel tah ei ta, ABEIPA ta cha liana chata alei liata chyhsa zydua reih cha a panano khai hawpa vâta; cha tawhna chata ABEIPA ta âmo sahlao cha alei chô zydua liana cha papai haw ta.

10 Hezy he Sema pathlazy a châ. Sema cha kô za khapa châ ta, tipa-ua hnôhlâ kô no rakha liana chata sawchapawpa Arapasa sa ta.

11 Arapasa a sa tawhta Sema cha kô za pangawh hroh heih ta, sawchapawzy nata sawchanôzy hropa sa heih ta.

12 Arapasa chata kô sythôh nata kô pangawh a châ nahta sawchapaw Shelah sa ta.

13 Shelah a sa tawhna chata Arapasa cha kô za palih nata kô thôh hroh heih ta, sawchapawzy nata sawchanôzy hropa sa heih ta.

14 Shelah chata kô sythôh a châ nahta sawchapaw Ebera sa ta.

15 Abera a sa tawhna chata Shelah cha kô za palih nata kô thôh hroh heih ta, sawchapawzy nata sawchanôzy hropa sa heih ta.

16 Ebera chata kô sythôh nata kô palih a châ nahta, Peleka sa ta.

17 Peleka a sa tawhna chata Ebera cha kô za palih nata kô sythôh hroh heih ta, sawchapawzy nata sawchanôzy hropa sa heih ta.

18 Peleka chata kô sythôh a châ nahta Reu sa ta.

19 Reu a sa tawhna chata Peleka cha kô za no nata kô chaki hroh heih ta, sawchapawzy nata sawchanôzy sa heih ta.

20 Reu chata kô sythôh nata kô no a châ nata, Seruka sa ta.

21 Seruka a sa tawhna chata Reu cha kô za no nata kô sari hrih heih ta, sawchapawzy nata sawchanôzy hropa sa heih ta.

22 Seruka chata kô sythôh a châ nahta Nahaw sa ta.

23 Nahaw a sa tawhna chata, Seruka cha kô za no hroh heih ta, sawchapawzy nata sawchanôzy sa heih ta.

24 Nahaw chata kô syno nata kô chaki a châ nahta, Tera sa ta.

25 Tera a sa tawhna chata Nahaw cha kô za kha nata kô hrawhleichaki hroh heih ta, sawchapawzy nata sawchanôzy hropa a heih ta.

26 Tera chata kô sysari a châ nahta Abara zy, Nahaw zy, Harana zy sa ta.

27 Hezy he Tera pathlazy ama châ. Tera chata Abara zy, Nahaw zy, Harana zy sa ta; Harana chata Lawta sa ta.

28 Harana cha a pina râh Kaldia sahlao khih Ur liata a paw Tera hmiakô ta thi ta.

29 Chatawhcha Abara nata Nahaw chata lahpinô hnei ei ta; Abara lahpinô moh cha Sarai châ ta, Nahaw lahpinô moh cha Harana sawchanônô Milka a châ. Harana cha Milka nata Isaka paw a châ.

30 Chatawhcha Sarai cha saw leipa chanô châ ta, saw rai hnei leipa ta.

31 Tera chata a sawchapawpa Abara zy, a samohpa Lawta, Harana sawchapawpa zy, a myuhnô Sarai, Abara lahpinô zy a chhi ta, Kildia sahlao khih Ur tawhna chata Kana râh lâ sie awpa ta hmaohkha ta pua ei ta, Harana khih tlô ei ta, cha liana cha pahrâ ei ta.

32 Tera hro nohzy cha kô za no nata kô pangawh châ ta; chatawhcha Harana khih liata thi ha ta.

  
Scroll to see more.