1
Chatanachata ei nahkhao theina liana chata, “Khihpi mohôhtuhpazy cha chyhsa to pahleipadiana chhaichhi chabapa ta a vaw hnia mawh sy,” tahpa ta a paro ngaitapa ta awh ta.
2
Chatawhcha maw lâ chhikao chô viapa tawhna chata chyhsa pacharu a vy ei ta, chyhsa to ta thina chaihraih chaba chyu ei ta, âmo liah liata chyhsa pakha lini poh a bupa chata châti ôh a vao ta. Chatawhcha angia ei ta, dawh maisâh kiapâh liana chata a duah haw ei ta.
3
Chatawhcha Izarelzy Khazohpa rôhnahna cha a yna cherubizy tawhna chata cha o chhikao thaby lâna chata khy ta; chatawhcha lini poh a bupa nata châti ôh a vaotuhpa kha aw ta.
4
ABEIPA chata ano hnohta, “Khihpi cha chahryh la, Zerusale chahryh khai teh, a chhôh liata hmo pasichhihpa tao hawpazy vâta hupopa ta a cha tyhpazy cha ama khi liata pahnona tao mah y,” tah ta.
5
Chatawhcha mo hropazy hnohna chata, “A hnôh lâna haota khihpi cha chahryh khai ula, ku pathla teh u, nama mo ta pahlôh kha sala ngiachhie hra khah u;
6
machâpazy, satliapazy, laihsapazy, hawtipazy nata nôzy thie khai teh u, pahnona a hneipazy deikua cha a vaw hnia khah u. Ei supathaihpa liata a thao teh u,” tah ta. Chatanachata achhyna-o liana chata athao haw ei ta.
7
Chatanacha ano chata ama hnohta, “O cha papuapalei ula, a dôhpachhôhzy cha chyhsa rih ta pabie ula, pua teh u,” tah ta. Chatawhcha pua ei ta, khihpi liana chata thie haw ei ta.
8
Chatawhcha khihpi liata ama thie nona chata, kei cha siesaipa ta vaw y na ta, a khu lâta pao na ta, “Hy Abeipa KHAZOHPA y! Zerusale chô liata na hiehâhna lei thlupa liana heta Izarel laibâhpazy chhao na pahleipadia khai aw ma?” tahpa ta aw na ta.
9
Chatanachata ano chata ei hnohta, “Izarel nata Zudah chhôhkhapazy hmoparaona cha a ru ngaita na; râh cha thisaih ta bie ta, khihpi cha avyuhna ryureina ta bie ta, ABEIPA ta râh cha pathlua haw ta, ABEIPA ta khâpahmah hmô vei,’ tah tlôh ei ta.
10
Kei chhao heta pahlôh leipa aw na ta, ngiachhie hra aw va na, ama molei viarithôna cha ei pakhosa aw,” tah ta.
11
Chatawhcha pachâ tua, lini poh a bupa ta, châti ôh a vaopa khata bie cha tlôkhei ta, “Na bie eina piepa hawh chita ei tao khai haw,” tah ta.
