Ezekiel 41

Study

         

1 Chatawhcha achhyna-o lâna chata nâ chhi ta, a pâhchhô chatipazy cha thlie ta; a kâ lâta dy charu a chhapa rairieh châ ta, cha cha byureih hâ lâ cha a châ."

2 Chatawhcha a ngiana cha dy hrawh a kawhpa châ ta; a kâ lâta pâhchhô chatipazy cha dy pangawh rairieh châ ta; a chhôh cha thlie ta, a doh lâ dy sypalih, a hâ lâ dy syno châ ta.

3 Chatawhcha chhôhpadâhpa chhôh viapa liana chata a ngia ta, angiana pâhchhô chatipazy thlie ta, dy no a chhapa rairieh châ ta; a ngiana cha dy charu kawhpa châ ta; a ngiana pâhchhô chatipazy cha dy sari rairieh châ ta.

4 Chatawhcha chhôhpadâhpa chhôh viapa cha thlie ta, chhôh pipa tho ta a doh lâ cha dy syno châ ta, a hâ lâ chhao dy syno a châ. Ano chata, “He he su pathaih chaipa cha a châ na,” tah ta.

5 Chatawhcha a o pipa pâhchhô cha thlie ta, dy charu a chhapa châ ta; chatawhcha a kâ lâ tôh liana chata chhôhpadâhpa dy palih chyu a kawhpa y ta.

6 A kâ lâ chhôhpadâhpazy cha chhâh thôh ta y ta, a chhâh chhâh ta, a chhâh maihta chhôhpadâhpa sythôh sai. A chheipâh ta a kâ lâta chhôhpadâhpazy châta pâhchhô ama taopa cha a ngâpâpa ta a o pipa cha a ngâpâ leipa ta, o pipa pâhchhô a pazao leipa ta cha lâ cha tlao a pazao ta.

7 Chatawhcha a kâ lâta chhôhpadâhpazy cha a sâh via nata kawh via laih ta, a pâhchhôzy cha a kaw sy lymâpa vâta a o chheipâh ta a o chhôh kha a bua via laih lymâ; chatanachata chhôhpadâhpa ry chaipa tawhta a chô chaipa taihta sie pahlie awpa ta a liahliahpa cha sie pahlie awpa a châ.

8 O pipa liana chata alô paraihpa byuhpa a ypa ta hmô na ta; a kâ lâ chhôhpadâh alô bôpa cha thliena chôhchahrei dy charu tlaita a seihpa tluta a sâhpa a châ.

9 A kâ lâ chhôhpadâhpa khôtho lâ pâhchhôh chhana zie cha dy pangawh a châ: a kâ lâta chhôhpadâhpa khôtho lâ pâhchhô tawhna chata dy pangawh a tlypa ta y ta,

10 o pipa alô paraipa byuhpa nata a dôhpachhôh chhôhpadâhpazy likawh cha a chheipâh ta dy syno a kawhpa châ ta.

11 A kâ lâ chhôhpadâhpa ochhizy cha a tlypa lâta pahypa châ ta, ochhi miakha cha maw lâ hei châ ta, ochhi hropa cha chhôh lâ hei a châ, a tlypa su cha dy pangawh a kawhpa a châ.

12 Notla lâta o pipa chhôchâ a tlypa khô liata o cha, dy sysari a kawhpa a châ; cha o pâhchhô cha dy pangawh a chhapa sai châ ta, a doh lâ cha dy sychaki a châ.

13 Chatawhcha o pipa cha a thlie nahta, dy za kha a seihpa a châ, o pipa chhôchâ a tlynazy nata cha o pâhchhô chhâna lâ reipâpa ta dy za kha a châ hra;

14 a o pipa tlyhmia a tlyna su cha dy za kha a kawhpa a châ.

15 Chatawhcha o pipa chhôchâ a tlypa su khô liata a doh lâ cha thlie ta, a kâ lâta pâhchhôzy chhaota dy za kha a châ. A o chhôhzy, su pathaih chaipazy, khôtho lâ aikahzy cha thophia ta patho ei ta;

16 a miathôhna chata a chheipâh ta pahy thei leipa opy nata aitlâ hnei ta, a o pipa cha a ngiana chhikao taihta a siphia tawhta a opy taihta a pôhpalôhpa ta thophia ta pathopa châ ta, (opy chhao cha pathopa a châ hra),

17 chhikao luh chôzy, chhôhpadâhpa pathaih chaipazy, nata a khôtho lâ chhao a pâhchhô zydua cha a chhôh lâ nata a khôtho lâ thlie khaipa ta.

18 Chazy cha cherubi nohthlahpazy nata thiahra kô nohthlahpazy ta pangiapa châ ta, cherubi nata cherubi likawh ta thiahra kôzy y lymâ ta. Cherubi cha hmia miano a hnei chyupa a châ;

19 chyhsapa hmia hawhna chata hiakha lâta thiahra kô lâ cha a heih ta, chakeibarôhneipa dawpa hmia hawhna chata hiakha lâta thiahra kô lâna cha a heih hra ta. Hezy he o padôhpa ta taopa a châ;

20 a siphiah tawhta chhikao luh chô taihta cherubi nata thiahra kô nohthlahpa ta taopa a châ sai, o pipa pâhchhô cha cha hawhna sai cha a châ.

21 O chhôh chhikao tôhzy cha ki palih a châ, su pathaih chaipa hmiakô liana chata tho ta taopa maisâh a luahpa y ta.

22 Dy thôh a sâhpa, dy no a seihpa, dy no a kawhpa, a kizy, a chaozy nata a kâzy cha tho ta taopa sai a châ. Ano chata ei hnohta, “He he ABEIPA hmiakô liata tlâhkhai cha a châ hih,” tah ta.

23 A ochhôh nata su pathaih chaipa châta ochhi miano rairieh hnei ta.

24 Ochhizy chata tho no rairieh hnei ta, a tho khapa cha thlie theipa chyu a châ, ochhi miakha liata phia no, a hropa liata phia no hra.

25 Pâhchhô liata ama taopa hawhna hra khata a chhôh ochhizy liata cherubi nata thiahra kô nohthlahpa tao chyu hra ei ta, aikah khôtho liana chata thophia chhakalupa ta khu ei ta.

26 Chatawhcha aikah pâhchhô rairiehzy nata thophiapa khupazy liana chata opy pahy thei leipa nata thiahra kô nohthlahpa cha y hra ta, a o pipa kâ lâ chhôhpadâhpa nata thophiapa khupa cha, cha hawhna cha a châ hra.