Ezekiel 39

Studie

   

1 “Chatawhcha, nâ, chyhsa y, kaokih chô liata chhochhielie la, Abeipa KHAZOHPA chata he tana heta a tah: Hy Kawka, Mesheka nata Tubal abeisaw luhchaipa, ei châ dyuh na;"

2 cha pakuasa aw na ta, cha chhihtha lymâ aw na ta, maw chhâna tawhtapa cha chhihtha aw na ta, Izarel tlâhzy liana chata ei cha tlôkhei aw;

3 na ku chavei lâtahpa na libaw cha tu pathla aw na ta, na ku chachâh lâtahpa nama châtaizy cha ei pathla aw.

4 Izarel tlâhzy chô liana chata pao aw chi ta, nâ nata na pheisaih hri zydua nata na hnohta zawpi a ypazy chhaota; pavaw sa hei a niepa chi to hnohta nata lyurâhpa sahrâhpazy hnohta ama nie khai awpa ta ei cha pie aw.

5 Lyurâhpa liata na pao aw, rei haw tlôh na ta, Abeipa KHAZOHPA ta a tah, tah mah y.

6 Makawka nata liahpahlô râh liata a bohpa ta a pahrâtuhpazy chô liana chata mei ei papua aw; kei he ABEIPA ei châ tahpa ama pahno aw.

7 “Chatawhcha ei chyhsa Izarelzy hry liana chata ei moh pathaihpa palâsa aw na ta; ei moh pathaihpa papuapalei heihpa pasaih khao aw va na; chatanachata phopizy chata kei he ABEIPA Izarel Mo Pathaihpa cha ei châ tahpa ama pahno aw.

8 Pachâ teh u, a vaw tlô na, patlôpa ta a y tlai aw, Abeipa KHAZOHPA ta a tah. He noh he ei vaw reih hawpa kha a châ.

9 “Chatawhcha Izarel khihpizy liata a pahrâpazy cha ama pua aw, adyuhna chhaichhizy cha mei liata ti aw ei ta, a kâ khai aw, vyhphao nata chhôhkhanazy, libaw nata châtaizy, asei nata seichhizy cha, kô sari chhôh ama ti aw;

10 chatanachata lyurâhpa tho phaoh khao leipa aw ei ta, râhhmâhpa tho thlu khao hra aw veih ei, adyuhna chhaichhizy cha mei tho châta hmâh tlôh aw ei ta; âmo a hraotuhpazy cha hrao hra aw ei ta, a moh a parutuhpazy cha ama paru hra aw, Abeipa KHAZOHPA ta a tah.

11 “Cha noh liana chata Kawka chata Izarel râh liata pabuna su rao aw na ta, tilaipi nochhi lâ saikao tlai cha; cha chata khitlyhpazy cha a pakhâ aw, Kawka nata a sahlaozy cha pabu tlôh aw ei ta; cha saikao cha Hamôkô Saikao ama bi aw.

12 Izarel chhôhkhazy chata ama râh pathaihpa ta thla sari ama pabu aw.

13 Râh chyhsa zydua ta âmo ama pabu aw; palyupalihpa ta ei y noh liana chata ei moh pathâhna a châ aw, Abeipa KHAZOHPA ta a tah.

14 Ama râh pathai awpa ta râh chô liata ri pabu leipazy tlua ngâpa ta pabu awpa ta raihria ta a hnei awpa ta chyhsa a nano ta ama rao aw; thla sari a châ tita ama tlua pathao aw.

15 Râh a chahrytuhpazy chata ama chahry nota chyhsapa ruzy ama hmô khiahtala pahnosana tao aw ei ta, Hamôkô Saikao liata a pabutuhpazy ta ama pabu hlâta cha.

16 Khihpi mo cha Hamônah* a châ aw. Cha hawhna chata a râh ama pathai aw.

17 “Nâma kyh liata cha, chyhsa y, Abeipa KHAZOHPA chata he tana heta a tah: Pavaw chi to rai zy, sa chi to rai zy hnohta bie reih la, “Pôhpakhy ula a vy teh u, sa niepa ta, thisaih nama thei nawpa ta Izarel tlâh liata atheihna rôhnah ngaitapa nama châta ei taopa chheipâh liana chata a vaw pakhy teh u.

18 Chyhsa rôhnahpa sazy nie aw eichi ta, alei liata abeisawzy thisaih cha doh aw eichi ta, mietahkupa tôhpazy, mietahkupa tawzy, miezy, Basana râh liata viahchao tôhpa pasapa thawpa zydua thisaihzy chhaota.

19 Nama châta atheihna kyhchhi ei taopa thaw cha rih bie ngaitapa ta nie aw eichi ta, a thisaih cha parina taihta nama doh aw.

20 Chatawhcha arâzy, talailizy, chyhsa rôhnahpazy nata adyuhna chyhsa zydua ta ei pati liata lôhrâtlôpa ta nama y aw, Abeipa KHAZOHPA ta a tah.

21 “Chatawhcha phopizy hry liana chata ei rôhnahna soh aw na ta; phopi zydua chata ei bie pachianazy nata âmo chô liata ei ku ei pathlanaziezy cha ama hmô aw.

22 Cha noh tawhna chata Izarel chhôhkhazy ta kei he ABEIPA ama Khazohpa cha ei châ tahpa ama pahno ha aw.

23 Chatawhcha phopizy chata Izarel chhôhkhazy cha ama hmoparaona vâta seichâna lâta amâ ngia tahpa ama pahno aw, keima liata ngâchhih lei ngaitapa ta ama ypa vâta âmo tawhna chata ei hmia nyu na ta, chatanachata zaozi ta ama khakhaipazy ku liata pie na ta, pao khai ei ta.

24 Ama pathaih leina lymâ hawhta nata ama hmoparaona lymâ hawhta ama chô liata tao hra na ta, âmo tawhta ei hmia ei nyu.

25 “Chavâta Abeipa KHAZOHPA chata he tana heta a tah: Atahmâ cha Zakaw sahlao seichâna palie aw na ta, Izarel chhôhkha tlokhuh chô liata zawh ei ngiah aw; ei mo pathaihpa cha liahsa ei vaih aw.

26 Ahyhmah ta pachisatuhpa y leipa ta ama râh liata a bohpa ta ama pahrâ tita chhao, ama hmoparaona zydua ei chô liata ama paraopazy nata ama maohphyuna cha ama phaoh aw,

27 chyhsazy hry tawhta a chhi heipa ta, ama khakhaipazy râh tawhta ei pakhy nata âmo liata phopi hluhpizy mohmô liata pathaisapa ta a y tina chata.

28 Chatawhcha phopizy hry liata seichâna ta ei chhi nata ama râh tlai liata ei pakhy heihna zie liana heta, kei he Abeipa ama KHAZOHPA ei châ tahpa ama pahno aw. Cha liana chata ama hry liata pakha hmahta siesai aw va na;

29 âmo liata ei hmia nyu khao aw va na, Izarel chhôhkhazy chô liata ei Thlahpa hry haw tlôh na ta, Abeipa KHAZOHPA ta a tah,” tahpa ta.