Ezekiel 38

Study

         

1 ABEIPA bie cha ei hnohta vaw tlô ta:

2 “Chyhsa y, Makawka râh liatahpa Mesheka nata Tubal abeisaw luh chaipa Kawka a hei hnao la, a chô liata chhochhielie la,

3 Abeipa KHAZOHPA chata he tana heta a tah: Pachâ teh, hy Kawka, Mesheka nata Tubal abeisaw luh chaipa ei châ dyuh na;

4 cha pakuasa aw na ta, na kâ liata keipa ta cha pa-ao aw na ta, ei châ chhi aw, na pheisaih hri zyduazy, arâ nata a chô liata a kiahpa chyhsazy, chariah chhaichhi padipa ta a tobipa zydua a chabatuhpazy chhao;

5 Persia, Kusa nata Puta zy chhaota, âmo zydua ta vyhphao nata thua lakhu a hneipazy cha;

6 Kôma nata a pheisaih hri zyduazy; Tôkamah chhôhkhazy, maw chhâna lâtahpa nata a pheisaih hri zyduazy, na hnohta chyhsa hluhpizy chhao.

7 “A chhuahdy la, amâ pachie teh, nâ nata na hnohta a y pakhypa na sahlao zydua chhaota, âmo vaihtuhpa vaw châ mah y.

8 Noh hluhpi tawhna chata awpakhypa châ aw chi ta; kô chhânazy liana chata zaozi tawhta pachhapa phopi hluhpizy tawhta pakhypazy yna râh Izarel tlâhzy a ryhpa ta a y thlâh ha tyhpazy cha vaw ngia aw chi ta; phopizy hry tawhtapa chhihthapa ta atahmâ ta ama zydua ta thlahlôh ngaitapa ta ama pahrâna râh cha.

9 Kiah aw chi ta, thlihpawpa hawhta vaw tlô aw chi ta, meihdo ta râh a pahlypa hawhna heta na châ aw, nâ nata na hnohta pheisaih hri zydua nata na hnohta chyhsa hluhpizy cha.

10 “Abeipa KHAZOHPA ta cha noh liana chata na pathipalôh liata hmo a vaw ngia aw ta, hmopha leipa na pachâpady aw,

11 chatawhcha ‘Kuh a hnei leipa khihzy râh cha hrao aw na ta; a bohpa ta a y molopa, âmo zydua ta kuh hnei leipa ta a pahrâpa, kuh ochhi nata a hraina thua a hnei leipazy cha ei dyuh aw,’ na tah aw;

12 hraona sôh nata hmobaozy la awpa nata; roryhra chiehpa su a pahrâ heihtuhpazy nata phopizy hry tawhta pakhy chiehpa sahroh zaw nata hmobaozy hneirôhpa ta râh liah liata a pahrâpazy chô liata na ku hy nâ chhuah aw.

13 Sheba nata Deda nata Tâsi sôh a daohpazy nata ama khih zydua chata na hnohta, ‘Hraona la awpa ta na vy ma? Eina hraona awpa chi ta na sahlaozy cha na vaw pakhy ma? Tâkâri zy, ngôh zy, sahroh zawzy nata hmobaozy, thata chhupa ta a la awpa na châ ma? ama cha tah aw,’ tahpa ta.

14 “Chavâta chyhsa y, chhochhielie la, Kawka hnohna chata, Abeipa KHAZOHPA chata he tana heta a tah: Cha noh, ei chyhsa Izarelzy a bohpa ta ama pahrâna daihti awpa cha pahno va chi ma?

15 Maw lâ râh chhâna na su tawhna chata a vy aw chi ta, nâma nata na hnohta chyhsa hluhpi arâ chô a kiahpa sahlao rôhnah ngaitapa pheisaih zawpi hluh ngaitapa tlai cha;

16 meihdo ta râh a khupa hawhna tlai heta ei chyhsa Izarelzy chô liata nâ vy aw. Noh hnôh lânazy chata ei râh adyuh awpa ta châ chhi aw na ta, phopizy chata eina pahno aw ei, hy Kawka y, ama mohmô liata nâma ta pathaisapa ta ei y tina chata.

17 “Abeipa KHAZOHPA chata he tana heta a tah: Hlâno ta na chakaotuhpa Izarel hrohsopa, cha nota kô hluhpi chhôhta bie a vaw reih tyhtuhpazy ta âmo adyuh awpa ta ei cha vaw chhi awpa kyh ama rei tyhpa kha na châ ma?

18 Châhrasala cha noh liata Izarel râh adyuh awpa ta Kawka a vy tina chata ei hiehâhna cha ei papua aw, Abeipa KHAZOHPA ta a tah.

19 Ei hiatliana ta ei hiehâh ngaita nota, cha noh liana chata Izarel râh liata thata a chalyu tlai aw;

20 tilaipi ngazy, avâ pavawzy, râh sazy, alei chô liata aly theipa zydua, alei chô liata chyhsa zyduazy ei hmiakô liata a chalyu aw ei ta, tlâhzy pahnaipa ta y aw ta, lôkâhpazy cho aw ta, kuh pâhchhô to alei liata a pao aw, tahpa ta ei reih hih.

21 Ei tlâh zydua liatazy ano adyuh nawpa ta zaozi ei pado aw; chyhsa to zaozi chata a unawhpa adyuh aw, Abeipa KHAZOHPA ta a tah.

22 Potlana nata thisaih palopa ta ano ei dyuh aw; ano nata a pheisaih hrizy nata a hnohta chyhsa hluhpizy chô liana chata vâkatlâ nata pareih ru ngaitapa nata mei nata kaihzy ei pasuasa aw.

23 Chatawhcha ei rôhnahzie nata ei pathaihzie palâsa aw na ta, phopi hluhpi mohmô liata ei palâsa aw. Chatawhcha kei he ABEIPA ei châ tahpa ama pahno aw.