Ezekiel 33

Study

         

1 ABEIPA bie cha ei hnohta vaw tlô ta:

2 “Chyhsa y, na pho pathlahzy hnohta bie reih la, ama hnohta, Râh chô liata zaozi cha ei vaw patlôsa khiahtala, râh chyhsazy chata ama hry tawhtapa chyhsa pakha atlypa ta riahvaipa ta ama so khiahtala;

3 ano chata râh chô liata zaozi a vaw tlôpa a hmô khiahtala chiahmie tô aw ta, zawpizy cha zikyu a râ aw;

4 chatanachata ahyrai chiahmie pyu theipa ta zikyurâna a papeisa leituhpa cha, zaozi a vaw tlôpa ta, leidia haw hra sala a thisaih cha ano luh liata a y aw.

5 Chiahmie pyu theipa ta, zikyurâna a papeisa leipa vâta; a thisaih cha ano chô liata a y aw. Zikyurâna a papeisapa deikua chata a hro a paboh aw.

6 Anodeikuacha riahvaituhpa chata zaozi a vaw tlôpa cha hmôpa ta chiahmie tô leipa ta zawpizy cha zikyu a râ leipa ta; zaozi cha vaw tlôpa ta ama hry liata chyhsa ahy tlyma a leidia khiahtala, a hmoparaona liata a leidiapa châ aw ta, a thisaih phuh cha riahvaituhpa liata ei la aw, tah teh.

7 “Cha hawhna chata nâ chyhsa y, Izarel chhôhkhazy châta riahvaihtuhpa ta ei cha tao, chavâta ei pakah liata bie a puapa he nahthlie la, kei tawhta zikyurâna awpa bie cha ama hnohta chho teh.

8 Hmoparaopa hnohna chata, Hy hmoparaotuhpa y, na thi tlai awpa a châ, ei tah nota hmoparaopa cha a yzi siesai awpa ta zikyu nâ râ vei khiahtala hmoparaopa cha a hmoparaona liata thi aw ta, a thisaih phuh deikua cha nâ liata ei la aw.

9 Anodeikuacha moleipa cha a yzie siesai awpa ta zikyu a râ ha la, a yzie a siesai tlôh leipa khiahtala; a hmoparaona liata thi aw ta; nâ deikua cha na hro na paboh haw.

10 Chatawhcha nâ, chyhsa y, nâma ta Izarel chhôhkhapazy hnohta bie reih la, he hawhna heta tah eichi ta: ‘Eima hmo paraonazy nata eima moleinazy chata maniah vi ta, chazy vâna chata eima leidia; kheihta e eima hroh thei rai aw?’ tah eichi ta.

11 Ama hnohna chata, Ei hro na, moleipa thina liata alyna rai hnei leipa na ta, moleipa ta a yzie siesaipa ta a hropa he ei lynazie tlao a châ; na yzie pha leipa tawhna chata kua teh u, kua teh u; hy Izarel chhôhkhazy saih u, khazia e nama thi aw tly? Abeipa KHAZOHPA ta a tah, tahpa ta reih teh.

12 Chatawhcha nâ, chyhsa y, na pho pathlazy hnohta reih la, chyhsa siapa cha a siana chata hmoparaona noh liana cha ano cha pachha leipa aw ta; chyhsa moleipa moleina chhaota a moleina a heisai noh liana chata papao leipa aw ta; chyhsa siapa chhao chata a moleina noh liana chata a siana ta hroh thei hlei aw vei.

13 A siapa hnohna chata ‘Na hroh tlai aw tahpa,’ ei rei nota, a siana ngâpa ta hmo a parao khiahtala a hmo siapa a taopa miakha hmah a thei thlâh hapa châ aw vei; a hmo a parao hawna liata tlao a thi aw.

14 Moleipa hnohta, ‘Na thi tlai aw,’ ei tah heih nota, a moleinazy aheisaipa ta ryhpa yzie nata a dopa tao sala,

15 moleipa chata sôhkâzy pakuapa ta a hmo parupazy pie heipa ta, hrona bieraopazy a chhihpa ta, hmoparaona khâpa hmah a tao vei khiahtala a hroh tlai aw; thi aw vei.

16 Moleina a tao hawpazy kha khâpa hmah a thei thlâh hapa châ leipa aw ta, ryhpa yzie nata a dopa ta vaw tao haw ta, a hroh tlai aw.

17 “Châhrasala nâ chyhsazy chata, ‘Abeipa hmotao zie a raih vei,’ ama tah nota, âmo taonazie sia leipa tlao châ tlôh ta.

18 A siapa chata a siana a heisaipa ta hmo moleipa a tao khiahtala, cha vaâa chata a thi tlai aw. "19 Chatawhcha moleipa ta a moleina aheisaipa ta ryhpa yzie nata a dopa cha a tao khiahtala, cha zawhzina chata a hroh aw."

20 Châhrasala, ‘Abeipa taonazie he a raih vei,’ tah eichi ta. Hy Izarel chhôhkhapazy saih u, chyhsa to cha âmo taonazie lymâ hawhta ei cha pachiapa aw,” tah ta.

21 Eima seichâna kô hrawhleinona, thla hrawhna, cha thla noh pangawh noh liana chata Zerusale tawhta a râpa chyhsa pakha ei hnohta a vy ta, “Khihpi cha tiahpa a châ haw,” vaw tah ta.

22 Chatawhcha cha a râpa cha a vy hlâ zâlâna chata ABEIPA ta ei chô liata a ku pahnieh ta; my ta ei hnohta a vy nona chata ei pakah na pa-âsa hmâ ta; chatanachata ei pakah cha â na ta, reih thei leipa ta y khao va na.

23 ABEIPA bie cha ei hnohta vaw tlô ta:

24 “Chyhsa y, Izarel râh liata su rypazy liata a ypazy chata, ‘Abaraha cha pakha châ ta, râh cha to ta; keimo deikua cha a hluhpi châ pi ta; râh cha ryu to awpa ta piepa eima châ haw,’ tahpa ta reih ei ta.

25 Chavâta âmo hnohna chata Abeipa KHAZOHPA ta he tana heta a tah: Sa thisaih nie eichi ta, nama khazoh nohthlahpazy lâta nama mozy ua hnao eichi ta, thisaih palo eichi ta; nâmo ta râh cha nama to aw ma?

26 Nama zaozi ngâ ei chi ta, hmo pasichhihpa tao eichi ta, chyhsa tota âmo vaih lâhpinô parao ei chi ta; nâmo ta râh cha nama to aw ma?

27 He hawhna heta ama hnohta na reih awpa a châ, Abeipa KHAZOHPA chata he tana heta a tah: Ei hro na su ryhpa liata a ypazy cha zaozi ta pao tlai aw ei ta; khothô liata a ypazy cha sahrâhpazy hnohta ama nie khai awpa ta pie aw na ta, kuh a ipa nata lôpu liata a ypazy cha potlana ta ama thi aw.

28 Chatawhcha râh chhao cha roryhrapa ta paysa aw na ta, rarôy ngaitapa ta tao aw na ta. a hmotaotheina a palaikheipa cha a chalih aw.

29 Hmo pasichhihpa ama taopa vâta râh cha roryhrapa ta paysa na ta, rarôy ngaitapa ta ei tao tina chata kei he ABEIPA ei châ tahpa ama pahno aw.

30 “Nâma kyh liata cha, chyhsa y, pâhchhô kiahpa ta chhikaozy liata na chyhsazy chata nâma thâtih cha reih aw ei ta, chyhsa to ta ama unawhpazy hnohta, ‘A vy tua u, ABEIPA tawhta bie a puapa nahthlie ei suh u,’ ama tah aw.

31 Chatawhcha na hnohta a vy aw ei ta, ei chyhsazy hawh tlaita na hmiakô liata a tyuh aw ei ta, na bie nahthlie aw ei ta, châhrasala zyh hlei veih ei; ama pakah ta kyhpachâna thata palâsa aw ei ta, ama pathipalôh deikua chata avyuhna lâta a pangai aw.

32 Chatawhcha nâ cha ama châta kyhpachâna hla angia ngaitapa ta sapa nata tôpa hawhta nâ cha, na biezy cha nahthlie ei ta, châhrasala zyh hlei aw veih ei.

33 He he a vaw tlô tita, a vaw tlô hai âmo hry liata hrohsopa a y tahpa ama pahno aw, a tah na, tah mah y,” tah ta.