Ezekiel 32

¹ Kô hrawhleinona, thla hrawhleinona, cha thla noh kha noh liana chata ABEIPA bie cha ei hnohta vaw tlô ta:

² “Chyhsa y, Izi beipa Phirao chaphôtuna phi la, a hnohta: “Phopizy hry liata chakeibarôhneipa ta a pachâ chi ta, châhrasala tilaipi tisadâ tlao na lyu na; na chavahzy chatlaosapa ta, na phei ta tizy panôh chi ta, ama chavahzy na papuapalei khai haw.

³ Abeipa KHAZOHPA chata he tana heta a tah: Ei sao ta cha khu aw na ta, chyhsa hluhpi chhaota; ei sao ta nâma ama cha patu tlai aw.

⁴ Râh liata cha siesai aw na ta, a pavâpa liata ei cha thy aw, avâ pavaw zydua nama chô liata ei aw pakhy aw, nâma ta alei zydua râh sa lôhrâ ei patlô aw.

⁵ Tlâh to liata na sapa zai aw na ta, saikaozy na ri ta ei pabie aw.

⁶ Na pahrâna râh tlâh taihta na thisaih a loh ngâpa ta ei cha pasi aw; tihnawhzy nâma ta ei pabie aw.

⁷ Ei cha pamô tina chata avâ khupa ta awhsi ei pazoh aw; noh cha ameih ta ei pahli aw, thlâpâ ta a khaihna papua aw vei.

⁸ Avâ khaihna zydua na chô liata ei pazoh aw, na râh liata zohna ei patlôsa aw, Abeipa KHAZOHPA ta a tah, tah mah y.

⁹ “Na pahno leipa râh liata phopizy hry liata na raona ei patlôsa tina chata chyhsa hluhpizy pathipalôh ei patypahrei aw.

¹⁰ Chyhsa hluhpi nâma liata noâhpa ta tao aw na ta, ama hmiakô liata ei zaozi ei hie tina chata, nâma vâta ama beizy chhaota rarôypa ta ama chi ngâsâ aw; na pao noh liana chata chyhsa to ta ama hrona pahlei awpa chipa ta amâ chalyu aw.

¹¹ Abeipa KHAZOHPA chata he tana heta tah tlôh ta: Babylaw beipa zaozi na chô liata a vaw tlô aw.

¹² Thatlôpa chyhsazy zaozi ta na zawpizy ei papaosa aw, phopizy hry liata chichhih chaipazy ama châ. “Izi mozy rôhnahna ama parao aw, a zawpi zydua ama leidia aw.

¹³ Ti hluhpi ngiakâ râh sa zydua ei pahleipadia aw, chyhsa pheizy chata panôhsa khao leipa aw ta, râh sa pheizy chhaota panôhsa khao hra aw vei.

¹⁴ Chatanachata ama ti pasohsa awna ta, thaw hawhta ama chavahzy cha ei palosa aw, Abeipa KHAZOHPA ta a tah.

¹⁵ Izi râh rory pahrasapa ta, a hneirôna zydua paruapa ta a chhôh liata a pahrâpa zy ei tusao tina chata, kei cha ABEIPA cha ei châ tahpa ama pahno aw.

¹⁶ He he ama chaphôtuna awpa cha a châ; phopi sawchanôzy ta he heta chaphôtupa ta Izi nata a chyhsa zydua mâchhie ama sa aw, Abeipa KHAZOHPA ta a tah,” tah ta.

¹⁷ Kô hrawhleinona, cha thla noh hrawhlei pangawhna noh liana chata ABEIPA bie cha ei hnohta vaw tlô ta:

¹⁸ “Chyhsa y, Izi zawpizy cha thata chakhei teh, ano nata phopi moh pathâh ngaitapa sawchanôzy cha khaotlô lâ a zu hawpazy hnohta alei ry chhâna lâna chata thy teh:

¹⁹ ‘Chhithaina kyh liata ahyma na khoh tly? Zu la, chopawtai leipazy hry liana chata a zia teh.’

²⁰ Zaozi ta thie hawpazy hry liana chata pao aw ei ta; zaozi lâta piepa châ haw ei ta, ano nata a chyhsa zydua cha a daophi teh u.

²¹ Sheôl liata a ypa rarôypa thatlô ngaitapazy chata ano nata a baotuhpazy ama chho aw; ‘Zu ei ta, a zia thlâh ha ei ta, zaozi ta thiepa chopawtai leipazy cha.

²² “Cha liana chata Asuria nata a sahlao zydua y ei ta, ama thlâzy cha ama chheipâh liata y ta;

²³ ama thlâ zydua khaotlôh a thuh chaipa liata y ta, a thlâ chheipâh liana chata a sahlaozy y ei ta; âmo zydua ta thiepa, zaozi ta a paopa sai, a hropa râh chi a pachhihsatuhpazy cha ama châ.

²⁴ “Cha liana chata Elami nata a thlâ chheipâh liata a sahlaozy y ei ta, âmo zydua ta thiepa, zaozi ta a paopa, a lei ry lâta chopawtai leipa ta a zupa, a hrohpa râh chi a pachhihsatuhpazy, ama maohphyuna khaotlô lâta a zukheituhpazy châ ei ta.

²⁵ Thipazy hry liata ano nata a sahlaozy a ziana tao pa ei ta, a thlâzy cha ano kiapâh liata y ta, âmo zydua ta chopawtai leipa zaozi ta thiepa châ ei ta; ama rarôyna cha a hrohpa râh chi pachhihsana châ tyh ta, khaotlô lâta a zu hawpazy chhaota ama maohphyuna phaoh ei ta, thiepazy hry liana chata paysa ei ta.

²⁶ “Cha liana chata Mesheka nata Tubal ama sahlao chhaota y ei ta, a thlâzy cha ama kiapâh liata y ta; âmo zydua ta chopawtai leipa zaozi ta thiepa châ ta, ama rarôyna cha a hrohpa râh chi pachhihsa tyh tlôh ta;

²⁷ chopawtai leipa thatlôpa a paopazy adyuhna chaihrai chhaota Sheôl lâta a zu awpazy ama zaozi a huapa ta, ama ruzy chô liata ama vyhphaozy a ypa liana chata a zia aw veih ei; a hrohpa râh liata thatlôpa chi a pachhihsatuhpazy châ tlôh ei ta.

²⁸ Nâ cha chopawtai leipazy hry liata paraopa ta y aw chi ta, zaozi ta thiepazy hnohta nâ zia aw.

²⁹ “Cha liana chata Edôma, abeizy nata abeisaw zydua y ei ta, ama tha a tlô tarawpa ta zaozi ta thiepazy hry liata a zaw ei ta; chopawtai leipa khaotlô lâta a zu hawpazy hnohta a zia ei ta.

³⁰ “Cha liana chata maw lâ abeisawzy âmo zydua ta Sidaw mo zydua thiepazy hry liata a zu hawpazy cha y ei ta, ama thatlôna ta chyhsa riah a pachhiesa tyh tarawpa ta, nozapa ta y ei ta; chopawtai leipa ta zaozi ta thiepazy hry liata a zia ei ta, khaotlô lâta a zu hawpazy chhaota maohphyupa ta ama y haw.

³¹ “Phirao chata vaw hmô aw ta, a chyhsa zydua thlah a palôhpa aw, Phirao nata a pheisaih hri zydua zaozi ta thiepazy tlai chhao cha, Abeipa KHAZOHPA ta a tah.

³² A hropa râh liana chata rarôyna chareisa ta, chopawtai leipa zaozi ta thiepazy hry liata a zia aw, Phirao nata a chyhsa zydua tlai cha, Abeipa KHAZOHPA ta a tah,” tah ta.