Ezekiel 16

Study

         

1 ABEIPA bie cha ei hnohta vaw tlô heih ta:

2 “Chyhsa y, Zerusale cha a pasichhihnazy pahnosa la,

3 a hnohta, Abeipa KHAZOHPA chata Zerusale hnohna chata he tana heta a tah: Na puana râh nata na pina râh cha Kana mozy râh châ ta, na paw cha Amawri chyhsa châ ta, na nô cha Hiti chyhsa a châ.

4 Chatawhcha na pina kyh liana chata na pi nota na liari âpa châ leipa ta, pathai awpa ta ti ta pasipa châ hra va chi, alôh hniapa châ leipa chi ta, pahlypa châ hra va chi.

5 Tha cha pasa awpa ta na chô liata hezy he tao awpa ta ahy mokhaoh hmahta cha ngiachhie leipa ta, lyurâhpa liata thypa tlao châ chi ta, na pi noh tawhna khata pasiepa châ tlôh chi ta.

6 Chatawhcha na kiapâh ta ei vaw sie nata, na thisaih a hlaopa ta cha hmô na ta, na hnohna chata na thisaih liata y hra la, ‘Hroh teh,’ cha tah na ta,

7 lyurâhpa liata hmo pabyupa hawhta cha palaiseihsa na ta, laiseih chi ta, hmobaoh angiapa châ haw chi ta, na sâhpizy pabyu ta, na sa pha ta; thluahruapa nata sasaihpa dei y thlyu chi ta.

8 “Chatawhcha na kiapâh liata vaw siepa ta ei cha moh nahta, khochhihpa châ haw chi ta; ei poh cha hy na ta, na thluahruapa cha eicha khu haw: na hnohta chhie sa na ta, biehrai liata châ ngiakhei na ta, kei eih na châ haw na, Abeipa KHAZOHPA ta a tah.

9 Chatanachata ti ta cha pasi na ta, na thisaih cha a siapa ta cha pasi na ta, sathaw ei cha thu haw.

10 Poh chapaipa ta cha bu na ta, pivao vo ta pheiky cha pakysa na ta, lini dipa ta cha pahly na ta, a tâtâhpa poh ei cha pakhusa.

11 Hmobaoh ta cha tobi na ta, na ku liata lâkyuzy cha paky na ta, na rao liata ngôh bâliazy cha patao na ta.

12 Na hnapasu liata hnapasu pataopazy, na nahkhaoh liata rahy zy, na luh liata beilakho a ngia ngaitapazy ta cha tobi na ta.

13 Cha hawhna chata ngôh nata tâkâri ta tobipa châ haw chi ta, na chysiazy cha lini dipa nata a tâtâhpa poh chapaipa châ ta, na niepa cha viahdie dipa nata kheihti nata sathaw a châ. Nâ ngia ngaita abeinazie ta na tloh na.

14 Na ngiana phopizy hry liata pathâh ta, ei rôhnahna ta tobipa ta na paki haw, Abeipa KHAZOHPA ta a tah.

15 “Châhrasala na chhithaina cha ngâ tu ha chi ta, na moh pathâhna cha sihrykhei chi ta, chyhsa a khiekhâpa maih hnohta sihry chi ta, ahy liata rai.

16 Na chysiazy hlaipa ta asapa suzy pangai chi ta, cha liana chata sihry chi ta; he hawhpa he y beih vei, y beih khao hra aw vei.

17 Ei ngôh nata ei tâkâri hmobaoh a ngia ngaitapa ei cha piepa kha la chi ta, chapaw khazoh nohthlahpa taona châta hmâh chi ta, sihrykhei haw chi ta;

18 na chysia chapaipazy cha la chi ta, âmo bu chi ta, ei sathawzy nata ei rohpahâhpazy cha ama hmiakô liata soh chi ta.

19 Ei niepa eicha piepa chhao kha viahdie dipa nata sathaw nata kheihti ei cha pasana tyhpazy kha rohpahâhpa châta ama hmiakô liata hô chi ta, Abeipa KHAZOHPA ta a tah.

20 Cha leipa chhao na sawchapawzy, na sawchanôzy kei châta na sapazy cha ama hnohta atheihna châta hmâh awpa ta pie chi ta. Na sihryna he hmo chyhpa ta a châ ma,

21 ei sawzy thie chi ta, mei liata thypa ta ama hnohta na hlâpazy he?

22 Na pasichhihna nata na sihryna zydua liana chata na satlia nota thluahruapa nata sasaihpa ta na ypa nata na thisaih liata na hlao nonazy kha a thei khao leipa chi ta.

23 “Chatawhcha he na hmoparaona zydua tawhna chhao heta, (na hu a pona, na hu a pona! Abeipa KHAZOHPA chata a tah),

24 su a luahpazy tao chi ta, othliah to liata su asâhpazy cha na châta sa chi ta;

25 othliah ki maih liata su a luahpa cha sa chi ta, nâ ngiana cha pasichhihpa ta tao chi ta, a khiekhâpa maih hnohta a pahmôsa chi ta, na sihryna cha papôhsa chi ta.

26 Izi mo na vaih chyhsa aohrao ngaitapa nata sihryna moleina tao haw chi ta, ei ru pachhôna awpa ta na sihryna cha na papôhsa haw.

27 Chavâta na chô liata ei ku hy na ta, na nie tyhpa cha pachyhsa na ta, nâma châ haotuhpa Philistina sawchanôzy na sihrynazie a zakhei ngaitatuhpa hnohna chata a khopa hawhta a tao awpa ta cha pie haw na ta.

28 Asuria mozy hnohta chhao sihry chi ta, na lôhrâ tlô leipa ta; ama hnohta sihry chi ta, châhrasala na lôhrâtlô thei hra vei.

29 Kana râh liata Kaldia mozy hnohta na sihryna papôh chi ta, na lôhrâtlô hlei hra vei.

30 “Na pathipalôh cha khâpa hrao leipa a châ kaw dia, na yzie liata chanô chhorupa sihry ngaitapa hmo tao chi ta, Abeipa KHAZOHPA ta a tah;

31 othliah ki maih liata a bykhâna na taopa liata zy, othliah to liata su a luahpa na taopa liana zy heta. Hlao nâ chadai leipa vâta na sihrypa dei chhao châ va chi.

32 Lahpinô apheipa vahpazy hlâta mo hropazy a khoh viatuhpa!

33 Sihrypa hnohna chata hmo pie tyh ei ta, nâ deikua chata tlao na pie tyh, cha khotuhpazy hnohta râh to tawhtapa a vy ei ta, a cha ziakhei theina awpa ta tlao na panaopapâ tyh ei.

34 Chatawhcha ahy hmah ta ama cha pangai leipa he sihrypa hropa tawhta nâ nanona cha a châ. Nâma ta a ty tlao pie chi ta, ahy ta hmahta a ty a cha pie leipa he nâ nanona cha a châ.

35 “Chavâta hy sihryh nô y, ABEIPA bie cha thei teh:

36 Abeipa KHAZOHPA chata he tana heta a tah: Na pasichhihna leithapa ta na pathlapazy nata nama y khohna lâta na thluahruana palâsapa a châpa vâta nata na pasichhihna khazoh nohthlahpa zydua vâta nata ama hnohta na piepa na sawzy thisaih vâta,

37 nâma cha khohtuhpa cha palysapa zydua nata nâ haopa zydua cha vaw pakhy aw na ta; na chheipâh liata a vaw chhi aw na ta, na thluahruana zydua ama hmô thei nawpa ta ama hnohta na thluahruana cha ei palâsa aw.

38 Chatawhcha chanô vahpa achhaihpa ta ano saw thisaih a palopa kyh ama pachiapa hawhta na thâtih ei cha pachia aw, hiehâhna nata hiatliana thisaih cha na chô liata ei patlôsa aw.

39 Ama ku liata cha pie aw na ta, na su a luapazy cha papao aw ei ta, na su asâhpazy ama pacho aw; na chysiazy cha hlaih aw ei ta, na lôsôhpazy cha chhu aw ei ta, thluahruapa nata sasaihpa ta ama cha siesai aw.

40 Na chô liata vâtlâh pahmaoh aw ei ta, alô ta cha vaw aw ei ta, zaozi ta ama châ chô aw.

41 Na ozy cha mei ta rao aw ei ta, chanô hluhpi mohmô liata na chô liata pachiana ama patlô aw; nâ sihryhpa he pahlei aw na ta, hlao chhao pie khao aw va chi.

42 Chatanachata ei pathi-iana na chô liata patlôsa khai aw na ta, ei cha hiatliana cha dia ha aw ta, a chalih ha aw na ta, ei hie hâh khao vei.

43 Na thyutlia nohzy cha a thei thlâh ha leipa chi ta, he hmozy liana heta ei ru eina pachhô hawpa vâ chi ta; na yzie hawhta na chô liata ei patlôsa aw, ABEIPA Khazohpa ta a tah. “Na pasichhihna zydua baichhapa ta he sihryna he tao khao aw va chi.

44 Pachâ teh, bieso a hmâhpa maihta he bieso ama hmâh aw, ‘A sawchanô ta a no a lyu,’ tahpa hih.

45 Na nô, ano vahpa nata a sawzy a pasituhpa sawchanô kha châ chi ta; a narônô lâta cha ano vahpa nata a sawzy a pasituhpa narônô na châ. Na paw hra ta Amawri chyhsa a châ.

46 Chatawhcha na narônô na uhta cha Samari na chavei lâta a pahrâ tyhpa kha, ano nata a sawchanôzy chhaota ama châ; na narônô na nawhta hra cha Sawdawma nata a sawchanôzy ama châ.

47 Châhrasala ama yzie cha a chhih leipa chi ta, ama pachhiena hawhta na tao lei tarawpa ta; na yzie zydua liata na parao vianazie pachâpa ta, chazy cha khâpa didâh châ vei.

48 Nâ nata na sawchanôzy ta ama taopa hawhpa he na narônô Sawdawma nata a sawchanôzy chhaota tao chacheita veih ei, ei hro na Abeipa KHAZOHPA ta a tah.

49 Pachâ teh, na narônô Sawdawma hmoparaona cha he he a châ; apalaina zy, rihbie tuna zy, ano nata a sawchanôzy phasana zy cha, sipasapa nata dyhchhiepa zy chhao bao hlei vei.

50 A pasasapa ei ta, ei hmiakô liata hmo pasichhihpa a tao hawpa ama châ; chavâta a pha ei tahpa hawhta a hro la ei pasih aw ei.

51 Samari chata na moleipa khophie chhao tao vei; âmo hlâta na pasichhihnazy papôhsa chi ta, nâ ta na pasichhihna zydua na taopa vâta na narônôzy a siapa ta palâsa haw chi ta.

52 Na narônôzy a do viapa ta na palâsapa vâta nâ tlaita na maophyuna na phaoh awpa a châ; âmo hlâta hmo pasichhih viapazy na palâsana liana heta na châta maophyuna na to awpa a châ.

53 “Sawdawma nata a sawchanôzy ama yzie hmiatuapa lâta Samari nata a sawchanôzy ama yzie hmiatuapa heta ei palie aw, nama yzie hmiatuapa chhao ama hnohta ei palie aw.

54 ama châta thatlôna na vaw châ tyhna liata na hmotao hawpa zydua vâta nozapa ta na y thei nawpa ta.

55 Na narônôzy, Sawdawma nata a sawchanôzy ama yzie hmiatuapa hawhta a lie aw ei ta, Samari nata a sawchanôzy ama yzie hmiatuapa hawhta a lie aw ei ta; nâ nata na sawchanôzy chhao ama yzie hmiatuapa hawhta namâ lie heih aw.

56 Na moleina hmôpa a châ hlâta na parôhnahsana nohzy liana khata na narônô Sawdawma cha na pakah my papaina châ tyh vei ma?

57 Atahmâ la Suria sawchanôzy a chheipâh liatahpa zydua, Philistina sawchanôzy na chheipâh liata châ taotuhpazy khata ama cha reipachhie haw hih.

58 Na sihryna nata na pasichhihna na phaoh lymâ. ABEIPA ta a tah.

59 “Chatatlyh, Abeipa Khazohpa chata he tana heta a tah: Nâ ta biehrai paraopa ta chhie sakhâhna a papeisa leizie lymâ hawhta na chô liata ei tao hra aw,

60 châhrasala na thyutlia nota na hnohta ei biehraipa cha a thei thlâh ha aw na ta, na hnohta chhâzaw biehrai ei tao aw.

61 Chatanachata na narônôzy, na uhta nata na nawhta na hmô tina chata na yziezy a thei heih aw chi ta, nâsasyh ta na zakhei aw, âmo cha na sawchanô châta cha pie na ta, na biehrai vâna deikua cha châ leipa ta.

62 Na hnohta ei biehrai pa-i aw na ta, ABEIPA ei châ tahpa nama pahno ha aw,

63 na hmotaopa zydua ei châ ngiahthai khai tina chata a thei thlâh hapa ta na nozapa vâta a khupa ta na pakah na â lei nawpa ta, Abeipa KHAZOHPA ta a tah.