Ezekiel 14

Study

         

1 Chatanachata Izarel machâ thokhazy cha ei hnohta a vy ei ta, ei hmiakô liata atyuh ei ta.

2 Chatawhcha ABEIPA bie cha ei hnohta vaw tlô ta:

3 “Chyhsa y, he chyhsazy heta ama khazoh nohthlahpazy cha ama pathipalôh liata soh ei ta, ama hmiakô liata ama hmoparaona a hluana cha ama soh; kei eina chhohia awpa ei a châ rai ma?

4 Chavâta âmo hnohta reih la, Abeipa KHAZOHPA chata he tana heta a tah: Izarel chhôhkha liata chyhsa to ama pathipalôh liata ama khazoh nohthlahpa sopa ta, ama hmiakô liata ama hmoparaona a hluana sopa ta hrohsopa hnohta a vypa maih, kei ABEIPA heta ama khazoh nohthlahpa hluhzie lymâ hawhta ei chhy aw,

5 Izarel chhôhkhazy cha ama khazoh nohthlahpa vâta eina pananosa hawpa vâta ama pathipalôh hmeihseihpa ta ei patu thei nawpa ta.

6 “Chavâta Izarel chhôhkhazy hnohna chata Abeipa KHAZOHPA chata he tana heta a tah: Vaw kua ula, nama khazoh nohthlahpazy tawhna chata vaw kua ula, nama pasichhihna zydua cha a heisai teh u.

7 Izarel chhôhkha hry liatahpa, ahyrai tlyma khichhaipa Izarel râh liata a pahrâ hrapa tlyma, kei tawhta a pananopa ta ama pathipalôh liata khazoh nohthlahpa sopa ta ama hmiakô liata hmoparaona a hluana sona chôta ama thâtih liata nâ chhohia awpa ta hrohsopa hnohta a vypa cha kei ABEIPA tlai heta ei chhy aw;

8 cha chyhsa cha a hei hnao aw na ta, noâhpa châta pahnosana nata bieso reipa ta ei tao aw, ei chyhsazy hry tawhtapa ei pahleipadia aw; chatanachata kei he ABEIPA cha ei châ tahpa nama pahno aw.

9 Chatawhcha hrohsopa chata dopa ta ypa ta bie reih sala, kei ABEIPA heta hrohsopa cha ei dopa châ ta, a chô liata ei ku hy aw na ta, ei chyhsa Izarelzy hry tawhtapa ei pahleipadia aw.

10 Chatawhcha ama hmoparaona cha ama phaoh aw, hrohsopa hmoparaona cha ano a chhohiatuhpa hmoparaona hawhta a châ aw.

11 Izarel chhôhkhazy cha kei tawhta pavia khao leipa ta âmo taopasina zydua liata apapuapaleipa ta ama y khao lei nawpa ta, ei chyhsazy tlao châ hawpa ta ama Khazohpa ei châ thei nawpa ta, Abeipa KHAZOHPA chata a tah, tahpa ta reih teh,” tah ta.

12 ABEIPA bie cha ei hnohta vaw tlô ta:

13 “Chyhsa y, râh chyhsazy ta taopasina hmo taopa ta ei chô liata hmoparaopa ta, kei ta ei ku hypa ta ama niepa luh hrona cha paraopa ta ama chô liata chakâhna patlôsapa ta chyhsa nata sazy ei vaw pahlei khiahta cha,

14 he chyhsa pathôh, Naw, Daniel nata Zawbâ zy tlai chhao he a vaw y hawpa châ ei sala, ama siana ta âmo hrona deita ama pachha awpa a châ, Abeipa KHAZOHPA ta a tah.

15 Râh sahrâhpazy ama râh chahrysapa ta râh cha paraopa ta roryhrapa ta râhsa vâta ahy hmah sie palâh awpa ama y vei khiahtala;

16 a chhôh liata he chyhsa pathôhzy he y hra ei sala ei hropa hawhta Abeipa KHAZOHPA ta a tah, ama sawchapawzy, ama sawchanôzy pachha hlei aw veih ei, âmo deita cha pachhapa ta y aw ei ta, râh deikua cha roryhrapa ta a y thlyu aw.

17 Cha khiahtala cha râh liana chata zaozi vaw cheipa ta, ‘Zaozi y, râh hry liata sie teh,’ ei tah khiahtala; chyhsa nata sa cha ei pamopa châ aw ta;

18 he chyhsa pathôh he y hra ei sala, ama sawchapawzy, ama sawchanôzy pachha hlei leipa aw ei ta, âmo hrona deita pachhapa ta a y aw, ei hro na Abeipa KHAZOHPA ta a tah.

19 Cha khiahla cha râh liana chata potla vaw patlôsapa ta chyhsa nata sa pahlei awpa ta thisaih palopa ta ei pathi-iana cha râh chô liata ei vaw leitha khiahtala;

20 Naw, Daniel, Zawbâ zy tlai chhao he vaw y hra ei sala, ama sawchapaw tlyma, ama sawchanô tlyma pachha leipa aw ei ta, ama siana ta âmo hrona deita ama pachha aw, ei hro na Abeipa KHAZOHPA ta a tah.

21 “Abeipa KHAZOHPA chata he tana heta tah tlôh ta: Zerusale chô liata ei pachiana pasa ngaitapa miapalih, zaozi zy, chakâhna zy, sahrâhpa zy, potlana zy chyhsa nata sa pamo khai awpa ta ei patlôsa paki tina chata kha tluta a rupa ma a châ aw tly!

22 Anodeikuacha cha liana chata a laibâhpa chhithapa ta a y awpazy cha siesaipa ta y aw ei ta, sawchapawzy, sawchanôzy chhao nâmo hnohta vaw pua aw ei ta, ama yzie nata ama hmotaopazy hmô aw eichi ta, Zerusale chô liata hmopha leipa ei vaw patlôsapa kyh liana chata thlahlôhpa ta y aw eichi ta, a chô liata ei vaw patlôsa hawpa zydua kyh liata chhao.

23 Ama yzie nata ama hmotaopazy nama hmô tina chata thlah a cha palôh aw ei; a chô liata ei hmotao awpa zydua cha tao chhâna hnei leipa ta tao va na tahpa nama pahno aw, Abeipa KHAZOHPA ta a tah,” tahpa ta.