Puasaina 24

Studie

          |

1 Chatawhcha ano chata Mawsi hnohta, “Nâma chhao, Arawna chhao, Nada chhao, Abihu chhao, Izarel machâ sysari chhaota ABEIPA lâta a khy ula, lâhla tawhta a vaw naoh muh vy.

2 Mawsi cha ano deitata ABEIPA lâta a vy sala; âmo sahlao deikua ch a vaw hnia kha ei se, zawpizy chhao a hnohta a khy kha ei se,” tah ta.

3 Mawsi cha zu ta, ABEIPA bie zydua nata ryureina yzie awpa zydua cha zawpi hnohta za reih ta; chatawhcha chyhsa zydua chata, “ABEIPA reipa zydua cha, eima tao aw na,” tahpa ta a raopa ta a chhy ei ta.

4 Mawsi ta ABEIPA bie zydua cha ro khai ta, a mylâ my ta thyu ta, tlâh thaby liana chata maisâh tao ta, chatawhcha lôbô sâhrawhleino bô ta,

5 Izarel pathlazy hry liata satliapazy tuah ta, cha chyhsazy chata ABEIPA châta a raopa hmohlânazy hlâ ei ta, chatawhcha adyhna atheihna ta viahchao tôhpazy ta a theih hra ei ta.

6 Mawsi ta cha thisaih khophie a hropa cha maisâh liata hie ta.

7 Chatawhcha biehraina châbu cha la ta, zawpizy theina liata reih ta, âmo chata, “ABEIPA ta a reipa zydua cha tao lymâ aw pi ta, chyhsa rei a ngiah ngaitapa eima châ lymâ aw,” tah ei ta.

8 Mawsi ta thisaih cha la ta, zawpizy hie ta, “Pachâ teh u, ABEIPA ta he bie zydua kyh liata nama hnohta bie a vaw hraih haw, biehraina thisaih a châ hih,” tah ta.

9 Mawsi nata Arawna, Nada nata Abihu nata Izarel machâ sysari cha khy ei ta,

10 Izarel Khazohpa cha hmô ei ta; chatawhcha a pheipazah ry cha saphai lô paryhpa hawh tlaita a pathaihzie cha avâ pathai khaipa hawhna tlai he châ ta.

11 Izarel pathlazy hry liata, mo laipa sahlaozy chô liana chata a ku pathla vei; Khazohpa cha hmô ei ta, niepa ta doh chyu ei ta.

12 ABEIPA ta Mawsi hnohta, “Tlâh liana heta ei hnohta a khy la, vaw y teh; chatanachata zawpizy na pachu awpa ta lôphiapa liata ryhpa nata biepiepa ei rop cha ei cha pie aw,” tah ta.

13 Chatawhcha Mawsi nata a chakaotuhpa Zawsua cha thyu ei ta, Mawsi cha Khazohpa tlâh lâna chata khy ta.

14 Ano chata machâzy hnohta, “Nâmo hnohta eimâ vy heih hlâ lei cha, he liana heta maniah vaw hâ thlâh ha muh vy; Arawna nata Hura nama hnohta ama y hih; ahyrai ta biepeipa, khâpa tlyma nama hnei khiahtala âmo hnohna heta namâ vy tyh aw,” tah ta.

15 Chatanachata Mawsi cha tlâh lâna chata khy ta, chatawhcha meihdo ta tlâh cha pahly khai ha ta.

16 ABEIPA rôhnahna cha Sinai Tlâh liana chata y thlâh ha ta, meihdo chata noh charu chhôh cha khu ta; a noh sari noh chata meihdo tawhta Mawsi cha vaw aw ta.

17 Izarel pathlazy mohmô liana chata ABEIPA rôhnahna a luahnazie cha tlâh laki liata hmo a kâpa mei hawh tlaita châ ta.

18 Mawsi cha meihdo hry liana chata a kei ngia ta, tlâh liana chata kaw kiah ta, chatawhcha Mawsi cha tlâh liana chata noh sypalih nata zâ sypalih y ta.

Scroll to see more.