Puasaina 23

Studie

         |

1 “Bie pathâhpa a do leipa cha na reihpachhuah chakhy awpa châ vei. Pahnotuhpa sia lei ngaitapa châna awpa ta hmo paraopa hry liana chata na ku cha pahlao awpa châ vei.

2 Hmo moleipa tao a chhuahpa ta zawpi cha na zi awpa châ leipa ta; pachiana siapa pavia nawpa ta biepeipa liata pahnosatuhpa châpa ta zawpi na zi awpa châ hra vei;

3 chyhsa sipasapa chhao a biepeipa liata nâ châkhei via awpa châ hra vei.

4 “Na khakhaipa viahchao tôhpa tlyma, a alâ tlyma, a leipa na hmô khiahtala, ano lâta na chhihtha pa tlai awpa a châ.

5 Châ haotuhpa alâ a hmo phao ta a vi thlâh hapa na hmô nahta na bao khona rai hnei vei hra la, na bao thlyu awpa a châ.

6 “Na chyhsa sipasapa cha a biepeipa liata a do lei ngaitapa ta na pachiapa awpa châ vei.

7 Bie do leipa liata a hlao khâ, chatawhcha chyhsa a thaipa nata chyhsa siapazy cha thie khâ, chyhsa hmo paraopazy cha thai pachâsa leipa aw na ta.

8 Chatawhcha hmo piepa rai na la awpa châ vei, hmo piepa chata mo pavâpa mozy he pachaosapa tyh ta, chyhsa siapa bie cha khâpa hrao leipa a pachâsapa tyh.

9 “Pho hropa na pasaipa-i awpa châ vei, nâma chhao Izi râh liana khata pho hropa nama vaw châ hawpa vâta pho hropa palôhrupa phaozie cha pahno tlôh eichi ta.

10 “Kô charu chhôh cha na lyu liata sâh tu awpa châ ta, cha liata a veihpa maih cha pachô lymâ awpa a châ;

11 a kô sari kô deikua cha, paysa la, pahâsa teh, chatanachata na chyhsa sipasapazy ta nie thei aw ei ta; chatawhcha ama la bâhpa a ypa maih cha lyurâhpa sazy ta ama nie hra aw. Cha hawhna hra chata na kresadô nata na ôli sadôh chhao na tao hra awpa a châ.

12 “Noh charu chhôhtaa na rai na hria awpa châ ta, a noh sari noh cha nâ pahâ tyh awpa a châ; chatanachata na viahchao tôhpa tlyma, na alâ tlyma, a pahâ thei aw ei ta, na seichanô sawchapawpa nata na pho hropa chhao, ama tha a dâh thei aw.

13 Nama hnohta ei reipa zydua he pachâ ula; khazoh hropazy moh rai pado khah u, nama pakah tawhta pua rai pua kha se.

14 “Kô kha ta ei thôh kei châta kyhchhi nama hnei awpa a châ.

15 Bie ei cha pie hawpa hawhna khata noh sari chhôh cha Viahchhâ Thinô pahlao leipa kyhchhi, Abi thla liata, daihti raopa liana khata na ni awhpa acha, kha thla liana khata Izi tawhtapa na vaw pua. Ei hmiakô liata ahyhma ta ku ruapa ta namâ vaw luah awpa châ vei.

16 Lyu liata na tupa na hria pasana thei hmiatua chaipa Sâhria kyhchhi cha na hnei awpa a châ. Châdi pata nahta lyu liata na hria pasana theizy na pakhy khai tawhta Peitla kyhchhi na hnei awpa a châ.

17 Kô kha ta ei thôh na chapaw zydua cha ABEIPA hmiakô liata amâ vaw luah tyh awpa a châ.

18 “Kei châta a theina sa thisaih cha viahchhâ thinô pahlaopa nata na vaw hlâ awpa châ vei, kei châta kyhchhina sathaw cha zâ khihdei ta a mylâ taihta paysa awpa châ hra vei.

19 “Na lyu liata chicheipa daih tua chaipa cha, ABEIPA na Khazohpa o liata na vaw soh awpa a châ.“Mie taw sa a panô sâhpiti ta na chho awpa châ vei.

20 “Lâpi liata cha vaih lymâ awpa nata su ei chhuahdypa liana chata cha chhihtha awpa ta na hmiakô liata vâlyuhchâpa ei vaw tuah.

21 Ano bie a ngiah lymâ ula, a bie reipa a pyh tyh muh vy, a chô liata a ty khah u, nama paraonazy cha a ngiahthai khoh tlôh leipa aw ta, ano liana chata ei mo a y.

22 “Anodeikuacha a bie reipa liahsa a pyhpa ta, ei reipa maih na tao lymâ khiahtala nama khakhaipazy khakhaipa cha, châ hra aw na ta, nama a dyuhpazy a dyuhpa cha ei châ hra aw.

23 “Ei vâlyuhchâpa chata na hmia lâta sie lymâ aw ta, Amawri mozy, Hiti mozy, Periza mozy, Kana mozy, Hivi mozy, Zebu mozy yna liana chata a cha chhitha aw, âmo cha ei pahleipadia aw na.

24 ama khazohzy cha nâ naoh awpa châ leipa ta, na chakao awpa châ hra vei, ama hmotaopa hawhpazy cha na tao hra awpa châ vei, na pahleipadia khai awpa châ ta, ama lôbôzy cha na pakei khai awpa a châ.

25 ABEIPA nama Khazohpa cha nama chakao awpa a châ, chatanachata na viahchhâ nata na ti cha byhnâ pie aw ta; nama hry tawhta hri ei papai aw.

26 Na râh chhôh liana heta nawh raopa nata saw leipa rai y leipa aw ei t; na hroh chhôh nohzy cha ei cha patlôpa aw.

27 Na hmiakô liana chata ei chichhihna tuah aw na ta, na siena awpa râh liata chyhsa zydua cha ama nô papo aw na ta, chatanachata na khakhaipa zydua cha na hmiakô liata ei parâpaisa aw.

28 Na hmiakô liata kheihpangia tuah aw na ta, cha cha Hivi mozy, Kana mozy, Hiti mozy hmiakô liana chata a chadai lymâ aw.

29 Kô kha chhôh deita cha, cha papuapa aw va na, chata leipa ta la lyurâh cha rohryhrapa ta y aw ta, lyurâh sazy cha na châta a vaw hluh tu pathlei aw na.

30 Vaw pôhpa ta lyurâh cha na bie hlâ lei cha dusawta ta ei ch papuapa aw.

31 Na râhri cha Tilaipi Saihpa tawhta Philistina mo tilaipi taihta, chatawhcha râhpathohpa tawhta Euphrate taihta râhri ei cha pakhâhpa aw; cha râh liata a ypazy cha nama ku liata pie tlôh aw na ta, chatanachata âmo cha na papua awpa a châ.

32 Ama hnohta bie na hraih awpa châ vei, ama khazohzy hnohta chhao bie n hraih awpa châ hra vei.

33 Na râh chhôh liata ama y awpa châ vei, chata leipa ta la ei chô liata ama cha pamoleisa pathlei aw na; ama khazohzy na chakao tlai khiahtala na châta khoheih a châ aw,” tahpa ta tah ta.

  
Scroll to see more.