Puasaina 18

Studie

          |

1 Zetharô Midia liata theihthaipa Mawsi puhpa chata, Khazohpa ta Mawsi nata a chyhsa Izarel sahlaozy chata hmo a taozie zydua nata ABEIPA ta Izarel sahlao zy cha Izi tawhta a chhitha ziezy cha vaw thei ta.

2 Mawsi puhpa Zetharô chata Mawsi lahpinô Zipôrah Mawsi ta a pasiesapa kha,

3 sawchapawpazy pano chhaota a chhi ta, cha pakhapa moh cha Kesaoma châ ta, “Chyhsa râh liata a ypa ei châpa vâta,” tah ta;

4 pakhapa moh cha, Elieza a châ. “Ei paw Khazohpa cha, nâ baotuhpa châ ta, Phirao zaozi tawhtapa cha eina pachha hapa vâta,” tah ta.

5 Mawsi puhpa Zetharô chata Mawsi sawchapawpazy nata a lahpinô cha a hnohta râhpathohpa liata a riena Khazohpa tlâh lâna chata vaw chhi ta.

6 Chatawhcha Mawsi hnohta, “Na puhpa Zetharô, na lahpinô nata na saw panozy chhaota a mâ vy,” tahpa ta chhopa châ ta.

7 Chatawhcha Mawsi cha a puhpa dy awpa ta pua ta, a naoh ta, sy ta, thâtihzy a hiahri ei ta, chatanachata poh-o liata a ngia haw ei ta.

8 ABEIPA ta Izarel sahlaozy vâta Phirao nata Izi chô liata a taozie zydua nata lâpi liata riethei ama taona zydua nata ABEIPA ta âmo a pachha ziezy cha Mawsi chata a puhpa chho ta.

9 ABEIPA ta Izarel sahlaozy cha Izi mo tawhta pachha ta; amo chata hmo a vaw taozie nata ama chô liata a phana zydua vâna chata Zetharô cha a ly ngaita ta.

10 Zetharô chata, “ABEIPA Izi sahlao tawhta nata Phirao tawhta cha pachhatuhpa ei cha reithaipa ta y mawh sy, ano chata Izi sahlao bie ry liata a ypa zawpizy cha a pachha haw hi.

11 Atahmâ cha ABEIPA cha khazoh zydua hlâna chata a rôhnah via tahpa ei pahno haw, a palai ngaitapa ta ama taona liana tlai chata a vaw la,” tah ta.

12 Chatawhcha Mawsi puhpa Zetharô chata, raona hlâna nata Khazohpa châta atheihna awpazy la ta; chatawhcha Arawna nata Izarel machâ sahlao zydua cha, Mawsi puhpa hnohta Khazohpa hmiakô liata viahchhâ nie awpa ta vawh ei ta.

13 A mylâ ta cha Mawsi cha zawpizy pachia awpa ta a tyuh ta, chatawhcha zawpizy cha my tawhta zâ taihta Mawsi kiapâh liata a duah thlâh ha ei ta."

14 Mawsi puhpa ta cha hawhta zawpizy chata hmo a taopa zydua cha a hmô nahta, “Zawpizy he hmo khâpa ma na taopa tly? Kheihtazie ta ma nâma deita he a tyuh thlâh ha chi ta, my tawhta zâ taihta zawpi zydua he na kiapâh liata amâ duah thlâh ha tly?” tah ta.

15 Mawsi ta a puhpa hnohta, “Zawpizy he Khazohpa a chhohia awpa ta ei hnohta amâ vy;

16 bie khâpa tlyma ama hnei khiahtala, kei lâta a vy tyh ei ta, chatanachata keima ta ano vaih nata ama chi cha vaw pachia pa ta, chatawhcha Khazohpa ryhraopa nata a ryhpazy cha ei vaw pahnosa tyh,” tah ta.

17 Mawsi puhpa chata a hnohta, “Na hmo taozie cha pha vei.

18 Nâma nata na hnohta zawpi a ypazy he nama tha nama pazei aw, he raihria he na châta a ru tu na; nâma deitata tlô theipa châ vei.

19 Ei bie nahthlie tua; a ryhna cha raokhei aw na ta, na hnohta Khazohpa y mawh sy! Nâma he Khazohpa lâta zawpi vyuhpa ta ama biepeipazy cha Khazohpa lâta tlôkhei mah y;

20 bieraopazy nata ryhpazy cha pachu aw chi ta, ama yzie awpa nata nama taonazie awpazy cha na pamosa lymâ awpa a châ.

21 Cha dei châ leipa ta zawpi hry tawhta chyhsa hmâtlâh a châ viapa, Khazohpa a chipa chyhsazy, chyhsa dopazy, hlaona a do leipa a haopa chyhsazy a tlyh la, cha hawhpa chyhsazy cha sâhkha chô liata hyutuhpazy, za kha chô liata hyutuhpazy, sypangawh chô liata hyutuhpazy, pahrawh chô liata hyutuhpazy rao la,

22 Chazy chata khati no raita chyhsazy pachia mawh sy; bie lai viapa maihzy cha nâma lâta vaw tlôkhei tyh aw ei ta, bie chyhnawhpa deikua cha âmo ta pachia mawh sy; chatanachata na châta nao via aw ta, âmo chata a cha chapawh aw ei.

23 Cha hawhta taopa ta Khazohpa chhaota bie a cha pie khiahtala tlô thei aw chi ta, chatanachata he zawpi sahlao chhao he palôh tlâhpa ta âmo yna lâ amâ di thei aw,” tah ta.

24 Mawsi ta a puhpa bie reipa cha a pyh ta, a reipa zydua hawhna chata tao ta.

25 Mawsi chata Izarel sahlao zydua hry tawhna cha, chyhsa hmâtlâh viapa a tlyh ta, zawpi chôta hyutuhpa tao ta, sâhkha chô liata hyutuhpazy, za kha chô liata hyutuhpazy, sypangawh chô liata hyutuhpazy, pahrawh chô liata hyutuhpazy rao ta.

26 Chazy chata khati no raita chyhsazy pachia tyh ei ta; bie lai viapa maih cha Mawsi lâta tlô khei tyh ei ta, bie chyhnawhpa deikua cha, âmo sahlao ta ama pachia tyh.

27 Mawsi ta a puhpa cha pasiesa ta, a yna râh lâna chata sie haw ta.

  
Scroll to see more.