Puasaina 10

Studie

         |

1 Chatawhcha ABEIPA ta Mawsi hnohta, “Phirao lâta a kei ngia teh; a pathipalôh nata a chakaotuhpazy pathipalôh cha, kuh ei pachhasa haw na, he ei pahnonazy he ama hry liata ei pamosa thei nawpa ta,

2 nâ chhaota na saw nata na sawzy nahkhao liata Izi râh chô liata hmo ei taozie he na chho thei nawpa ta; kei ABEIPA cha ei châ tahpa nama pahno thei nawpa ta,” tah ta.

3 Chatawhcha Mawsi nata Arawna cha Phirao lâta a kei ngia ei ta, a hnohta, “ABEIPA Hebraizy Khazohpa ta, ‘Ei hmiakô liata khachâ e a panawhsa khoh leipa ta y nâ chhuah? Ei chyhszy heta eina chakao thei nawpa ei ta papua teh.

4 Cha hawhta ei chyhsazy papua na pasai vei khiahtala, pachâ teh, mylâ na râh chô liana heta khawsuzy vaw chareisa aw na ta,

5 alei chô he bie khai aw ei ta, ahyhmah ta alei rai he hmô thei aw vei ei; sibiepa su liata nama tho a pyuhpa maih cha ama nie khai aw,

6 na ozy nata na chakaotuhpa zydu ozy nata Izi mo zydua ozy cha a bie khai aw; na pathlatuhpazy nata na pathlatuhpa pathlatuhpazy chhaota khizaw ama vaw y rakha tawhta atahmâ taih chhaota cha hawhpa cha hmô beih veih ei,” a tah na,” tah ei ta.

7 Phirao chakaotuhpazy chata a hnohta, “He chyhsa he eima châta khachâ ma khohei ta a y aw tly? He sahlao heta ABEIPA ama Khazohpa ama chakao thei nawpa ta pasiesa thlâh ha châh chi maw; Izi he paraopa a châ hawpa he pahno mâh va chi mâ?” tah ei ta.

8 Chatawhcha Mawsi nata Arawna cha Phirao lâta a chhi heih ei ta; ama hnohta,” sie ula, ABEIPA nama Khazohpa cha chakao teh u; anodeikuacha ahyzy ma a sie awpa cha?” tah ta.

9 Mawsi ta, “A hawti machâ ta eima sie aw; eima sawchapawpazy nata eima sawchanônôzy chhaota, eima mietahkupa zawzy nata eima tao tlai awpa châ tlôh ta,” tah ta.

10 Ano chata ama hnohta, “Nama sawnawh chyhpatazy chhaota ei cha pasiesa tlai khiah ei tala, ABEIPA cha cha pabohsatuhpa châ se! A pachâ teh u, hmo moleipa tao namâ chhuah hih.

11 Châ bao va! Nâmo chapaw sahlao deikua cha sie ula, ABEIPA chakao teh u, cha cha nama khopa a châ mâh tâh,” th ta. Chatawhcha Phirao tawhtapa cha pua haw ei ta.

12 Chatawhcha ABEIPA ta Mawsi hnohta, “Izi râh chô liana heta khawsuzy vaw chareisa awpa ta na ku pazawh teh, Izi râh liana heta a khypa ta he râh liata chicheipa to pareih daih bâhpa zydu taih chhaota ama nie thei nawpa ta,” tah ta.

13 Mawsi ta Izi râh chô liana chata a chôhchahrei cha hy ta, ABEIPA ta cha noh nah y nata zâkhidei ta cha râh liana chata nochhi thlih vaw pathlisa ta; chatawhcha a mylâ chata nochhi thlih chata khawsu vaw phaoh ta.

14 Khawsuzy cha Izi râh zydua chô liana chata charei ei ta, chatawhcha râh chhôh zydua liana chata a cho ei ta, hluh ngaita ei ta, cha hlâta khawsu cha hawhpa rai y beih leipa ta, he tawh chhaota cha hawhpa rai cha y khao aw vei.

15 Alei chô zydua he bie khai tlôh ta, chatanachata lyurâh cha a zohkaluh thlâh haw, chatawhcha pareih dai bâhpa, cha râh liata chicheipa to nata theilâpa zydua cha nie khai ei ta; Izi râh chhôh zydua liana chata lyu liata hmo hrohpa rai tho chhao, chicheipa chhao y khao leipa ta.

16 Chatawhcha Phirao chata, Mawsi nata Arawna cha a chatliepa ta pa-awsa ta ama hnohta, “ABEIPA nama Khazohpa chô liata nata nâmo chô liata hmo ei parao na.

17 Ei moleipa he atahmâ ngalâh a ngiahthai mah y, ei châ haw na, he thina he eina lapa tua awpa chi t, ABEIPA nama Khazohpa lâta hiah mah y,” tah ta.

18 Mawsi cha Phirao tawhtapa cha pua ta, ABEIPA lâta hiah ta.

19 Chatawhcha ABEIPA chata notla thlih ru ngaitapa vaw pathlisa ta, cha chata khawsuzy cha phaoh ta, tilaipi saihpa liata phaoh pathla khai haw ta; Izi râhri chhôh zydua liana chata khawsu miakha hmah y khao leipa ta.

20 ABEIPA ta Phiro pathipalôh cha ku pachhasa ta, chatanachata Izarel pathlazy cha papua pasaih khao leipa ta.

21 Chatawhcha ABEIPA ta Mawsi hnoh ta, “Avâ lâta na ku pazawh teh, Izi râh chô liata zohna ta khu sala, zohkaluhpa ta ama pathâ hôlô na hâh ta,” tah ta.

22 Mawsi chata a ku cha avâ lâta pazawh ta, chatawhcha Izi râh chhôh zydua cha noh thôh chhôh tlai zohkaluh ha ta;

23 ahyhma ta a hmô thei khao leipa ei ta, ahyhma ama su tawhtapa noh thôh chhôh cha a pasie thei hra leipa ei ta; Izarel pathla zydua pahrâna deikua cha khaih khai ha ta.

24 Phirao ta Mawsi cha p-awsa ta, a hnohta, “Sie ula, ABEIPA cha chakao teh u; nama mietahkupa zawzy nata nama vihchao zawzy deikua cha y sala; nama sawnah chyhpatazy chhao nama hnohta sie hra ei sei,” tah ta.

25 Châhrasala Mawsi ta, “ABEIPA eima Khazohpa lâta eima thei nawpa ta atheihna awpazy nata raopa hlâna awpazy cha nâ ta eima ku liata maniah na pie hra awpa a châ.

26 Eima sahrohzy cha eima hnohta a sie hra awpa a châ; sahroh rai cha pô kha hmahta sie sai aw ma pi, chazy hry liatahpa cha ABEIPA eima Khazohpa chakao nawpa ta eima hmâh tlai awpa châ tlôh ta, cha su eima tlô hlâ lei cha khâpa ta e ABEIPA eima chakao aw tahpa a pahno ma pi,” tah ta.

27 Châhrasala ABEIPA ta Phirao pathipalôh cha kuh pachhasa ta, chatanachata papua psaih khao leipa ta.

28 Phirao ta a hnohta, “Kei tawhna he pua syulyu la; a chado teh; ei hmia rai vaw hmô khao khâ; ei hmia na hmô no tlai ta na thi tlai awpa a châ,” tah ta.

29 Chatawhcha Mawsi chata, “Na reipa â do kaw na! Na hmia hmôna noh hnei khao aw va na,” tah ta.

  
Scroll to see more.