Ryhpachaneina 5

Studie

  

1 Mawsi ta Izarel sahlao zydua cha awpakhy ta ama hnohta, “Hy Izarel mozy saih u, a chupa ta namâ pyh awpa ta ryhpa zy, pachianazy, nama nahkhao theina liata atanoh ta ei reipa he, nahthlie teh u.

2 ABEIPA eima Khazohpa ta Hôriba liana chata eima hnohta bie hraih ta.

3 ABEIPA chata he bie he eima mahpawzy hnohna khata hraih leipa ta, keimo sahlao atahmâ taihta a hrohpa ta a ypa zydua hnohna heta tlao hraih ta.

4 ABEIPA chata tlâh liata mei tawhta hmia nata hmia a chhypa ta cha chho ei ta.

5 cha nona chata ABEIPA bie cha pahmô awpa ta ABEIPA nata nâmo likawh a duah na ta; mei vâna khata chi tlôh ei chita, tlâh lâna chata a khy leipa eichi ta. ABEIPA chata reih ta:

6 Kei he ABEIPA nama Khazohpa Izi râh tawhtapa seichâna tawhta cha papuatuhpa ei châ.

7 Keima leipa ta cha khazoh hropa na hnei awpa châ vei.

8 Nohthlapa taopa, a chô lâ avâ liatahpa tlyma, ary lâ alei liatahpa tlyma, alei ry lâta ti liatahpa tlyma, kheihawhpa lyupa hmahta na châta na tao awpa châ vei.

9 chazy cha nâ chhy awpa châ leipa ta, na chakao awpa châ hra vei; kei ABEIPA na Khazohpa he Khazohpa hiatlia hmâhpa, pawzy paraona vâta sawzy a hrie tyhpa, nâ haotuhpazy cha chhâ thôhna nata chhâ palihna taihta a hrie tyhpa nata.

10 ei kyh na pachâ ta ei biepiepazy a pyhtuhpa sa hluhpizy chôta ngiachhiena a palâsa tyhpa ei châ hih.

11 ABEIPA na Khazohpa moh cha na pado thlâhthli awpa châ vei: ABEIPA chata a moh a pado thlâhthlituhpa cha thai lei pachâsa leipa ta y tlôh leipa aw ta.

12 ABEIPA na Khazohpa ta bie a cha piepa hawhta, pahânoh cha a pathaihpa ta a ô teh.

13 Noh charu chhôhta hria aw chi ta, na rai zydua na hria awpa a châ.

14 a noh sari noh deikua cha ABEIPA na Khazohpa châta pahânoh a châ na; cha nohna chata rai na hria awpa châ vei, nâma rai ta, na sawchapawpa rai ta, na sawchanônô rai ta, na seichapawpa rai ta, na seichanônô rai ta, na viahchao tôhpa rai ta, na alâ rai ta, na sahroh a kheihawhpa taih ta, na o liata râh hropa chyhsazy rai ta nâma hawh hra ta, na seichapawpazy, na seichanônôzy chhao, amâ pahâ thei nawpa ta.

15 Nâ chhao Izi râh liana khata chakaotuhpa châ haw chi ta, ABEIPA na Khazohpa ta, cha tawhtapa cha ku thatlô ngaitapa nata bâh pazawhpa ta a cha chhihthapa na châ tahpa a thei thlâh ha teh; chavâta ABEIPA na Khazohpa ta pahânoh a ô awpa ta bie a cha pie.

16 ABEIPA Khazohpa ta bie a cha piepa hawhta na nô nata na paw palyupalih teh; chatanachata ABEIPA ta râh a cha piepa liana heta thlao a chhi aw chi ta, na hro pareih aw.

17 'Liany na cheih awpa châ vei.

18 ‘ Nâ phei awpa châ vei.

19 ‘Na paru awpa châ vei.

20 ‘Na vaihzy chô liata pahnotuh pakheipa na tao awpa châ vei.

21 ‘Na vaihzy lahpinô na uava awpa châ leipa ta; na vaihzy o tlyma, lyu tlyma, seichapawpa tlyma, seichanônô tlyma, viahchao tôhpa tlyma, alâ tlyma, na vaihzy hmo a kheihawhpa hmahta na uava awpa châ vei,’ tahpa ta.

22 He biezy he tlâh liata mei zy, ameih zy zohkaluhpa tawhta ABEIPA ta ao paro ngaitapa ta, nama zydua apôhpakhypa sahlao hnohta reih ta; baichha heih khao leipa ta, chazy cha lô phiapa miano liata roh ta, na pie ta.

23 Chatawhcha tlâh cha a kâ nota, zohna tawhta ao cha nama thei nota, nâ vaw hnia eichi ta, nama pho pawhrâhpa zydua nata nama machâzy chata.

24 ‘Moh teh, ABEIPA eima Khazohpa ta eima hnohta a rôhnahna zie nata a laina zie palâsa ta, mei tawhta a ao cha thei pi ta; Khazohpa ta chyhsapa bie a chhopa chhaota thina a châ hlei leipa cha atanoh eima hmô haw.

25 chavâta khazia eima thi aw? He mei ru ngaitapa heta maniah a patlô aw mâ tâh; ABEIPA eima Khazohpa ao cha eima thei heih khiahtala eima thi thlâh ha aw.

26 Mei tawhta Khazohpa hropa ao eima theipa hawhta thei hrapa ta a hropa sapa zydua hry liata ahy e a y.

27 Nâma ta a kei hnia la, ABEIPA eima Khazohpa ta a reih awpa zydua cha nahthlie teh; chatawhcha ABEIPA eima Khazohpa ta na hnohta a reipa zydua cha nâma ta eima hnohta reih aw chi ta; nahthlie aw pi ta, eima tao aw,’ tah eichi ta.

28 “Chatawhcha eina chho no eichi ta, nama bie reipa cha ABEIPA ta thei ta; ABEIPA ta ei hnohta, ‘He zawpizy ta na hnohta bie ama reipa cha thei na ta; ama bie reipa zydua cha a pha kaw na.

29 Cha hawhpa palôhrupa cha ama phaoh tyh mawh sala, na chi aw ei ta, ei biepiepazy cha tao tyh aw ei ta, âmo nata ama sawzy chhao chhâzaw ta thlaochhipa ta ama y awpa tlai.

30 Ama hnohta, “Nama poh-ozy lâta a di teh u,” tah teh.

31 Nâ deikua cha ei kiapâh liata a duah la, to awpa ta râh ei cha piepa liata amâ pyh awpa ta na pachu awpa biepiepa zydua, ryhpazy, pachunazy cha ei cha chho aw,’ tah ta.

32 Chavâta ABEIPA nama Khazohpa ta bie a cha piepa hawhta tao awpa ta a chado teh u; chachâh lâ tlyma, chavei lâ tlyma, nama tlei awpa châ vei.

33 Nama kei pahrâ awpa râh liata nama y nota, thlao namâ chhi nawpa nata bohpi ta nama pahrâ thei nawpa ta, ABEIPA nama Khazohpa ta bie a cha piepa ei namâ chhih patlô awpa a châ.