Ryhpachaneina 25

Studie

         |

1 Chyhsa amâ hryuh khiahtala ryureina lâta sie aw ei ta, ryureituhpa zy ta vaw pachia aw ei ta, a siapa cha thai pachâsa aw ei ta, moleipa cha thai lei ama pachâsa awpa a châ,"

2 chatawhcha moleipa cha tu tlâh a châ khiahtala, ryureituhpa chata paziasa aw ta, a hmiakô liata a patusa awpa a châ, a moleipa zie hawhta tuna hluhzie awpa cha taopa a châ aw.

3 Ei sypalih taihta tu theipa châ aw ta, cha khô lâ cha châ leipa ta; he khô lâta a tu khiahtala nama unawhpa cha nama pamaohphyu tu pathlei aw na.

4 Viahchao tôhpa ta sâh a tly nota a hmao nama hi awpa châ vei.

5 Unawh sahlao hmaohkha ta y ei sala, ama hry liatahpa cha sawchapawpa hnei leipa ta thi sala, a thipa lahpinô chata khôtho lâ chyhsa mo hropa a hnei awpa châ vei; a vahpa unawhpa chata to aw ta, lahpinô ta hnei aw ta, a vahpa unawhpa a tao awpa cha a chô liata a tao awpa a châ.

6 Chatawhcha Izarel hry liata a moh a lei lei nawpa ta a unawhpa a thi hawpa moh cha a saw sa tuapa chata a phaoh awpa a châ.

7 Chatawhcha ano chata a unawhpa lahpinô cha a hnei khoh vei khiahtala, a unawhpa lahpinô cha kuh chhikao lâta machâ zy hnohta khy aw ta, ‘Ei vahpa unawhpa ta Izarel hry liata a unawhpa moh paysa lymâ awpa khoh leipa ta; vahpa unawhpa tao awpa cha ei chô liata tao khoh vei,’ a tah awpa a châ.

8 Chatanachata ama khih machâzy chata ano cha aw aw ei ta, bie chho aw ei ta: ano chata, ‘Hnei khoh va na,’ khâchâ a tah khiahtala,

9 a unawhpa lahpinô chata machâ zy hmiakô liata ano lâta pangai aw ta, a pheiky pahluhpa aw ta, a hmia liata a pachi pachhao aw ta; ‘A unawhpa chhôhkha a padua khoh leituhpa chô liana chata, he hawhna heta taopa châ lymâ mawh sy,’ tah aw ta, â chhy awpa a châ.

10 Chatanachata ‘Chhôhkha pheiky pahluh pâpa,’ tahpa ta Izarel zy hry liata a moh paphaosa awpa a châ aw.

11 “Chyhsa a tu ei sala, a pakhapa lahpinô chata a tulâhpa tawhtapa a vahpa pachha awpa ta a tihmôkeipa ta a daophi sala,

12 a ku cha nama taipa awpa châ ta; nama ngiachhie awpa châ vei.

13 Nama sahria liana chata pathliana alô chi nanopa, â hripa nata â huapa nama hnei awpa châ vei.

14 Nama o liata thliena chi nanopa a laipa nata a chyhpa namâ vao awpa châ vei.

15 Pathliahna alô â do ngaitapa nata sia ngaitapa nama hnei awpa a châ, thliena â do ngaitapa nama hnei awpa a châ; chatanachata ABEIPA nama Khazohpa ta râh a cha piepa liana heta nama hro a pareih aw.

16 Cha hawhpa hmo a taotuhpa sia lei ngaitapa ta a taotuhpa zydua cha ABEIPA nama Khazohpa pachâ ta pasichhihpa ama châ.

17 Izi râh tawhtapa nama vaw puana lâpi liata Amale mo ama cha vaw taona zie kha a thei thlâh ha teh u,

18 Khazohpa chhao chi leipa ta nama panao noh nata nama thazei nota lâpi liata cha tyh ei ta. nama hry liata hnoh khawpa chi leipa sahlao hnoh a khawpa zydua ama vaw tusaona ziezy kha.

19 Chavâta ABEIPA nama Khazohpa ta hnei awpa ta râh a cha pie tina ei nahta, nama chheipâh ta nama khakhaipa zydua tawhtapa ABEIPA nama Khazohpa ta thlalôhna a chapie tina ei chata avâ ry liata Amale mo a thei thlâh hana cha nama pahlei khai awpa a châ: nama my chachei awpa châ vei.