Ryhpachaneina 22

¹ Nama unawhpazy viahchao tôhpa tlyma, ama mietahkupa tlyma, a leipa cha nama hmô nahta namâ chalih thlâh ha awpa châ leipa ta; nama unawhpazy lâta namâ chhipâ heih awpa a châ."

² Chatawhcha nama unawhpa zy, nama kiapâh a hniapa liata y leipa ei sala, a hneituhpa cha nama pahno vei tlyma a châ khiahtala, nama o lâta a chhi aw eichi ta, nama unawhpa ta a vaw tluana taihta nama hnohta y thlâh ha aw ta; cha tina chata nama pie heih awpa a châ.

³ Ama alâ chhao cha hawhna hra chata nama tao awpa châ ta; cha hawhna hra chata ama chyhsa zy chhao nama tao awpa châ ta; cha hawhna hra chata nama unawhpa hmo pahleipa nama hmôpa maih cha nama tao awpa châ ta; namâ chalihkhei awpa châ vei.

⁴ Nama unawhpa zy alâ tlyma, ama viahchao tôhpa tlyma lâpi liata a paopa nama hmô nahta namâ chalihkhei awpa châ leipa ta; nama pathyukhei awpa a châ.

⁵ Chanô ta chapaw chysia a tao awpa châ leipa ta, chapaw ta chanô chysia a tao awpa châ hra vei; ahyrai cha hawhpa a taopa maih cha ABEIPA nama Khazohpa pachâ ta chyhsa pasichhihpa ama châ.

⁶ Lâpi liata pavaw bu tho liata tlyma, alei liata tlyma, a taw tlyma, a tih tlyma a ypa, a taw taw tlyma, a tih tlyma a panô ta a tlôpa nama hmô khiahtala, a taw cha a panô chhaota nama la awpa châ leipa ta;

⁷ a panô cha pathlie thlyu awpa châ ta, a taw deikua cha nama la thei aw; chatanachata nama châta pha aw ta, nama hro pareih aw.

⁸ O thiehpa nama sa khiahtala, nama o chô nama dôh awpa a châ, thisaih lona o a châ lei nawpa ta.

⁹ Nama kresadô liana chata hmo chi no nama cheih awpa châ vei, chata leipa ta cha nama chi tupa nata nama kresadô liata a patheipa zydua cha ABEIPA tovyuh a châ aw.

¹⁰ Viahchao tôhpa nata alâ hmaohkha ta alei nama paliesa awpa châ vei.

¹¹ Sahmi nata pala sa pahlaopa namâ ky awpa châ vei.

¹² Nama pahlyna poh cha a tlâh miapalih liata a pai nama pahneisa awpa a châ.

¹³ Chyhsa ta lahpinô hneipa ta, y khei ta, â hao heih tlôh ta,

¹⁴ He chanô he hnei na ta, ykhei na ta, laihsakôpa a châna hmô leipa na ta,’ tahpa ta maohphyu ngaitapa ta taopa ta, a moh a pachhie khiahtala,

¹⁵ laihsa paw nata nô chata kuh chhikao liata cha khih machâzy lâta laihsakôpa a châna cha ama vaw palâsa awpa châ ta;

¹⁶ laihsa paw chata macha zy hnohta, “He chyhsa he ei sawchanônô pahneisa na ta, a hao heih tlôh ta;

¹⁷ Na sawchanônô he laihsakôpa a châna hmô va na,” tahpa ta maohphyu ngaitapa ta tao ta, châhrasala hezy he ei sawchanônô laihsakôpa châna cha a châ mâ tâh,’ tah aw ta. Chatanachata cha khih machâzy hmiakô liana chata poh phaw aw ei ta.

¹⁸ Cha khih machâzy chata cha chyhsa cha la aw ei ta, hrie aw ei ta;

¹⁹ Izarel laihsakôpa moh a pachhiesa pa vâta tâkâ sekel za kha pacheisa aw ei ta, laihsa paw cha ama pie awpa a châ; ano cha lahpinô châ aw ta; a hro chhôhta a chhaih aw vei.

²⁰ Anodeikuacha cha bie cha a do sala laihsa cha laihsakôpa a châna â lâ vei khiahtala,

²¹ laihsa cha a paw o chhikao liata a chhi aw ei ta, a yna khih liata chyhsazy chata alô ta ama vawh sao aw, a paw o liata sihryhpa ta Izarel zy hry liata hmo molei ngaitapa a taopa vâta; cha hawhna chata nama hry tawhtapa hmo pha leipa cha nama pahlei awpa a châ.

²² Chyhsa ta chyhsa hropa lahpinô a ziakheipa ama hmô khiahtala, ama pano ta ama thie awpa a châ, a ziakheituhpa chapaw nata chanô chhao cha; cha hawhna chata Izarel hry tawhtapa cha hmo pha leipa cha nama pahlei awpa a châ.

²³ Laihsakôpa, chyhsa lahpinô a pahawhpa, chyhsa ta khih liata hmôpa ta a ziakhei khiahtala,

²⁴ ama pano ta khih kuh chhikao lâta a chhi aw ei chi ta, alô ta nama vawh sao awpa a châ, chanô cha khih liata y tlôh ta, a awh leipa vâta, chatawhcha chapaw cha a vaih lahpinô moh a pachhiepa vâta; cha hawhna chata nama hry tawhtapa cha hmo pha leipa cha nama pahlei awpa a châ.

²⁵ Anodeikuacha chyhsa ta lyurâhpa liata laihsa, chyhsa a pahawhpa hmôpa ta, tah raruahpa ta a ziakhei khiahtala, a ziakheituhpa chapaw deita cha thie awpa châ ta, a laihsapa cha kheihta hmah nama tah awpa châ vei.

²⁶ Laihsa chô liata thina taihta moleina y vei; he hawhpa he cha chyhsa a vaih siehnaopa ta thiepa hawhpa châ ta;

²⁷ lyurâhpa liata a kei tyh ta, chyhsa a pahawhpa laihsa cha awh ta, a pachhatuhpa y tlôh lei khâh ei ta.

²⁸ Chyhsa ta laihsakôpa a pahawh leipa hmô ta patu ta, a ziakheipa ama hmô khiahtala,

²⁹ a ziakheituhpa chapaw chata laihsa paw cha tâkâ sekel sypangawh a pie awpa châ ta, chatawhcha ano cha a lahpinô a châ aw, a moh a pachhie hawpa vâta; a hro chhôhta a chhaih aw vei.

³⁰ Chyhsa ta a paw lahpinô a hnei awpa châ leipa ta, a paw no a pazasa awpa châ vei.