Ryhpachaneina 18

Studie

          |

1 Theihthaipa Livai chi, Livai pho zydua chata Izarel zy hry liata tovyuh nata ryuto ama hnei awpa châ leipa ta; ABEIPA lâta mei ta hmohlâpa nata ama tovyuh liatahpa ama nie awpa a châ.

2 Ama unawhpa zy hry liata ryuto ama hnei awpa châ vei; ama ryuto cha ama hnohta a reipa hawhta ABEIPA châ tlôh ta.

3 Atheihna a hlâtuhpa zawpi zy tawhtapa theihthaipa tovyuh awpa cha hezy he a châ aw viahchao tôhpa rai, mietahkupa rai: a palaih nata a ôhkhaih karâ no nata a pavyh, theihthaipa ama pie awpa a châ.

4 Nama sâh zy, nama kresawti zy, nama thaw a veih tuapa zy, nama mietahkupa hmi ngyu tua chaipa zy, nama pie hra awpa a châ.

5 ABEIPA nama Khazohpa ta ABEIPA moh ta chhâzaw ta a chakao awpa ta nama pho zydua hry tawhtapa a tlypa châ tlôh ei ta, âmo nata ama sawzy chhaota.

6 “Chatawhcha Livai chi ahyrai a yna Izarel râh nama yna a kheihawhpa rai pua saipa ta a palôhrupa ta byuh ngaitapa ta ABEIPA ta a rao awpa su liata a vy khiahtala,

7 cha liata ABEIPA hmiakô liata a y tyhpa Livai chi, a unawhpazy hawh hra ta ABEIPA a Khazohpa moh ta a chakao awpa a châ.

8 Ama theihthaipa châna ty reih leipa ta mo hropa tovyuh hawhpa niepa cha ama to hra aw.

9 ABEIPA nama Khazohpa ta a cha piepa râh nama kei tlô tita cha phopi zy hmo pasichhihpa zy taopa hawhpa cha nama tao hra awpa châ vei.

10 A sawchapawpa tlyma, a sawchanônô tlyma mei liata pasisapa zy, a mohthaipa tlyma, pachao a thaipa tlyma, molie a thaipa tlyma, dyuthaipa tlyma,

11 dyupa zy, papeisapa zy, dyuthaipa zy, athih lâ hryhpa zy nama hry liata ama y awpa châ vei.

12 He hmozy a taopa maih he ABEIPA pachâ ta chyhsa pasichhihpa châ tlôh ei ta; he hmozy pasichhihpa vâna heta ABEIPA nama Khazohpa ta a cha papua pa ei.

13 ABEIPA nama Khazohpa hmiakô liata nama phapaki awpa a châ.

14 Cha nama kei pahrâ awpa râh liata phozy chata pachaopa nata mopa a hmâhpa zy a pyh tyh ei ta; nâmo lâ ABEIPA nama Khazohpa ta cha hawhta taopa cha pasaih veih ei.

15 “ABEIPA nama Khazohpa ta keima hawhpa he nama unawhpa zy hry liatahpa hrohsopa a cha taopa aw ei, a bie cha nama nahthlie awpa a châ,

16 ‘ABEIPA eima Khazohpa ao cha na patheisa khao khah la, he mei ru ngaitapa he na pahmôsa khao khah la, ei thi pathlei aw na,’ tahpa ta Hôriba liata apôhpakhy no ta ABEIPA nama Khazohpa nama khonazie hawhna khata.

17 Chatawhcha ABEIPA chata ei hnohta, ‘Ama bie reipa cha pha kaw ta,

18 ama unawhpa zy hry liata nâma hawhpa hrohsopa tao pa aw na ta; a pakah liata ei biezy soh aw na ta.

19 Chatawhcha ei moh ta ei bie a reihpa a pyh leipa maih cha ei pachia aw.

20 Ei moh ta reih awpa ei pie leipa a reih raruahtuhpa hrohsopa tlyma, cha hrohsopa cha thie awpa a châ,’ tahpa ta.

21 Chatawhcha nama pathipalôh liata, ‘Kheihta e bie cha ABEIPA reipa châ vei tahpa eima pahno aw?’ nama tah khiahtala,

22 hrohsopa ta ABEIPA moh ta bie reihpa ta, a hmo reipa cha vaw tlô leipa ta a su vei khiahtala, cha cha ABEIPA bie reih leipa a châ; hrohsopa chata â palai ngaitapa ta a reih chakhyhpa a châ; ano cha nama chi awpa châ vei,” tah ta.