Ryhpachaneina 14

Studie

          |

1 ABEIPA nama Khazohpa sawzy châ eichi ta; a thihpa vâta nâmosasyh ta namâ â awpa châ leipa ta, nama mo hmi nama ngyu awpa châ hra vei.

2 ABEIPA nama Khazohpa châta pho pathaihpa châ tlôh eichi ta, leilô liata pho zydua hlâta ano eih châ awpa ta ABEIPA ta a châ tlyhpa châ eichi ta.

3 Hmo pasichhihpa rai nama nie awpa châ vei.

4 He sazy he nama nie thei awpa a châ; viahchao zy, mietahkupa zy, mie zy.

5 sakhih zy, sasu zy, sakicheipa zy, sathaw zy, lyurâhpa mie zy, sawzaw zy, lyurâhpa mietahkupa zy hih.

6 Chatawhcha sa to hârie chaeihpa maih hry liatahpa cha nama nie thei aw.

7 Anodeikua cha hârie chaeih tlôh ta, ama chakieh zy chhao a pachiapâ hrapa, râraoseihpa zy, pazupi zy, tlâh pihvao zy he, nama nie awpa châ vei; hârie cha chaeih ei ta, ama chakieh sâno lâta a pachhaih leipa vâta nama châta pathaih leipa a châ.

8 Chatawhcha vao he a chakieh cha pachiah ta, hârie a chaeih leipa vâta nama châta pathaih leipa a châ. A sa nama nie awpa châ leipa ta, a thipa chhao nama hria awpa châ vei.

9 Ti liata a pahrâpa zydua liata hezy he nama nie thei aw; mathlaw nata phuhlupa a hneipa maih cha nie thei aw eichi ta.

10 Mathlaw nata phuhlupa a hnei leipa maih cha nie thei aw veih eichi; nama châta pathaih leipa a châ.

11 Pavaw pathaihpa zydua cha nie thei aw eichi ta.

12 Hezy deikua he nama nie awpa châ vei, pahmôpi zy, pahmô ru a pakhei theipa zy, pahmô nga patupa zy,

13 riarâtao zy, hmôchhih zy, vâkhieh alyupa zy.

14 ra-awh alyupa zydua zy.

15 vaku zy, valâtla zy, seihaopa zy, pahmô alyupa zy.

16 vaku chyhpa zy, tutahlupa zy, vaku ki a hneipa zy.

17 ti pavaw daoh laipa zy, vâkhieh chapaipa zy, tyhphy nga niepa zy.

18 vawpô nata riasi alyupa zy, nôpinô nata pazu tâbalâpa chhao.

19 Mathlaw a hneipa phei ta a siepa zydua cha nama châta hmo pathaih leipa châ aw ta; nie awpa châ vei.

20 Pavaw pathaihpa zydua cha nama nie thei aw.

21 Ano kho ta a thipa cha khâparai nama nie awpa châ vei; nama khih liata a ypa khichhaipazy nie awpa ta pie thei aw eichi ta, pho hropazy hnohta nama zuah thei hra aw; nâmo la ABEIPA nama Khazohpa châta chyhsa pathaihpa châ tlôh eichi ta.

22 “Kô tato ta nama lyu liata a veihpa zydua su hrawh liata su kha nama panano thlyu awpa a châ.

23 ABEIPA nama Khazohpa china cha khâ nama pahno thei nawpa ta, su hrawh liata su kha, nama sâh zy, nama kresawti zy, nama thaw zy nata nama viahchao zaw nata nama mietahkupa zaw hry liata a patawh tua chaipazy cha ABEIPA nama Khazohpa hmiakô liata â mo y nawpa a raopa liana chata nama nie awpa a châ.

24 ABEIPA nama Khazohpa ta byhnâ a cha pie tita, ABEIPA nama Khazohpa ta â mo yna awpa a raopa cha a hla tupa vâta nama châta su a hla tupa ta nama cheih thei leipa khia tala.

25 tâkâ lâta palie aw eichi ta, tâkâ cha cheih aw eichi ta, ABEIPA nama Khazohpa su a raopa liana chata nama sie awpa a châ.

26 chatawhcha tâkâ cha nama palôhrupa ta, nama kho chaipa viahchao tlyma, mietahkupa tlyma, kresawti tlyma, dopa pachâpahiapa tlyma, nama palôhrupa ta nama khopa hawhpa maih hmâh aw eichi ta; cha liana chata ABEIPA nama Khazohpa hmiakô liana chata nie aw eichi ta, thapha ngaitapa ta nama y awpa a châ, nâma nata nama chhôhkhazy chhaota.

27 Livai mo nama yna liata a ypazy cha pathlua chachei leipa ula, nama hry liata tovyuh, ryuto chhao, hnei tlôh hra lei khâh ei ta.

28 Kô thôh chhâna maih ta cha kô liata nama hmo a veihpa zydua, su hrawh liata su kha cha pakhy khai aw eichi ta, nama yna liata nama soh awpa a châ.

29 chatawhcha nama yna liata a ypa Livai mo chhao, nama hry liata tovyuh, ryutona chhao a hnei leipazy nata khichhaipazy nata paw a hnei leipazy nata nôhmeizy chata nie aw ei ta, rihbiepa ta ama y aw; ABEIPA nama Khazohpa ta nama ku hria zydua liana chata byhnâ a cha pie aw ei.