Ryhpachaneina 12

¹ ABEIPA nama mahpawzy Khazohpa ta hnei nawpa ta râh a cha piepa, leilô liata nama y chhôhta a chado ngaitapa ta nama zyh awpa ryhpazy nata pachiana ryhpazy cha hezy he a châ.

² Nama hnei awpa râh phozy ta tlâh laipa zy, tlâh chyhpa zy, tho hropazy to ry liata ama khazohzy, ama chakaona su zydua cha nama parao khai awpa a châ.

³ ama maisâhzy pacho aw eichi ta, ama lôbôpazy pakei khai aw eichi ta, ama Asherahzy mei ta nama rao awpa a châ; ama khazoh nohthlahpa taopazy cha thlu pa aw eichi ta, cha su liata ama moh cha nama pahlei awpa a châ.

⁴ ABEIPA nama Khazohpa a chhyna zie cha âmo sahlao tao zie a châ awpa châ vei.

⁵ ABEIPA nama Khazohpa ta nama pho zydua hry liata â mo yna awpa su rao awpa cha, tlua aw eichi ta; cha lâna chata nama sie awpa a châ.

⁶ cha liana chata nama raopa hlâna zy, nama atheihnazy, nama su hrawh liata su kha zy, nama ku chaluahna hlâna zy, nama bietai zy, nama lôhthai ta hlâna zy, nama sahroh zaw nata mietahkupa zaw hry liata, a pih tua chaipa zy nama vaw cheih awpa a châ.

⁷ cha liana chata ABEIPA nama Khazohpa hmiakô liata nie aw eichi ta, nama ku hriapa ABEIPA nama Khazohpa ta byhnâ a piepa liana chata thapha ngaitapa ta nama y awpa a châ, nama dykhasanawh ta.

⁸ Chyhsa tota âmo ta a pha ama tahpa hawhta atahmâ ta eima taopa hawhna heta ama tao awpa châ vei.

⁹ ABEIPA nama Khazohpa ta pahâna nata ryutona a cha piepa ei cha tlô ma tlô lei khâh eichi ta.

¹⁰ ‘Zawdâh chakapa ta ABEIPA nama Khazohpa ta a cha patosa awpa râh nama pahrâna liata âbohpa ta nama pahrâ thei nawpa ta nama chheipâh liata khakhaipa zydua tawhtapa a cha pahâsa tina deikua ei cha ta.

¹¹ ABEIPA nama Khazohpa ta â mo yna awpa a raopa su liata vaw cheih awpa ei tahpa zydua cha cha liana chata nama vaw cheih awpa a châ: nama raopa hlâna zy, nama atheihna zy, nama su hrawh liata su kha zy, nama ku chaluahpa hlâna zy, ABEIPA lâta nama bie taipa a phapa maihzy cha.

¹² Chatawhcha ABEIPA nama Khazohpa hmiakô liata thapha ngaitapa ta nama y aw, nâmo nata nama sawchapawpazy, nama sawchanônôzy chhao taih, nama seichapawpazy, nama seichanônôzy chhao taih, nama khih liata a ypa Livai mozy chhao taih, âmo chata namo hry liata tovyuh nata râh hnei tlôh lei khâh ei ta.

¹³ Su nama hmôna maih liata nama raopa hlânazy hlâ lei awpa ta a chado teh u.

¹⁴ nama phozy hry liata ABEIPA ta a rao awpa su liana chata nama raopa hlânazy cha tlao hlâ aw eichi ta, cha liana chata bie ei cha piepa zydua cha nama tao awpa a châ.

¹⁵ Anodeikuacha ABEIPA nama Khazohpa ta byhnâ a cha patosapa lymâ hawhta nama ao a chhaona maih cha nama khih chyu liata thie aw eichi ta, a sa nama nie thei aw; a pathaih leipa zy nata a pathaihpazy chhaota, zuneihpa zy, sakhi zy hawhpa he cha nama nie thei aw.

¹⁶ A thisaih deikua cha nama nie awpa châ vei; ti hawhta alei liata nama patlai awpa a châ.

¹⁷ Nama khih liana chata su hrawh liata su kha, nama sâh zy, nama kresawti zy, nama sathawzy nata nama sahroh zaw nata mietahkupa zaw hry liata a pih tua chaipa zy, nama bietai liatahpa zy, nama lôhthai ta hlâpazy, nama thyuna hlâna zy cha nie thei leipa aw eichi ta.

¹⁸ ABEIPA nama Khazohpa ta su a rao awpa liata ABEIPA nama Khazohpa hmiakô liata tlao nama nie awpa a cha, nâmo nata nama sawchapawpazy nata nama sawchanônôzy, nama seichapawpazy, nama seichanônôzy, nama khih liata a ypa Livai mozy chhaota, ABEIPA nama Khazohpa hmiakô liata nama ku hriapa maih liata thapha ngaitapa ta nama y awpa a châ.

¹⁹ Nama râh liata nama y chhôhta Livai mo cha pathlua lei awpa ta a chado teh.

²⁰ ABEIPA nama Khazohpa ta a châ taihpa hawh eina khata nama râh pakawh ta, nama aoh ta sa nie â chhaohpa vâta, ‘Sa ei nie aw,’ nama tah tita cha, nama aoh ta â chhaohpa maih sa cha nama nie thei aw.

²¹ ABEIPA nama Khazohpa ta â mo yna a rao awpa cha namâ hla tua khiahtala, bie ei cha piepa hawhna khata, ABEIPA ta a cha piepa, nama sahroh zaw nata nama mietahkupa zaw hry liatahpa thie aw eichi ta; nama aoh a chhaohpa cha nama khih liata nama nie awpa a châ.

²² Zuneihpa sa zy, sakhi sa zy, nama niepa hawhta nie aw eichi ta; pathaih leipa zy nata pathaihpa zy chhaota miakha sai ta nama nie aw.

²³ Thisaih deikua cha nie lei awpa ta a chado teh u; thisaih cha hrona châ tlôh ta, hrona chhaota sa cha nama nie awpa châ vei.

²⁴ Nama niepa châ vei; ti hawhta alei liata nama patlai awpa a châ.

²⁵ Nie kha u, chatanachata ABEIPA mohmô liata hmo dopa nama taopa heta nâmo nata nama hnôh lâta nama sawzy châta a pha aw.

²⁶ Nama hmo pathaihpazy nata nama bietai liatahpa zy deita cheih ula, ABEIPA ta su a rao awpa liata sie teh u,

²⁷ chatawhcha ABEIPA nama Khazohpa maisâh liata nama raopa hlâna cha a sapa nata a thisaih hlâ aw eichi ta; chatawhcha nama atheihna thisaih zy cha ABEIPA nama Khazohpa maisâh liana chata patlai aw eichi ta, a sa cha nama nie aw.

²⁸ He bie ei cha piepa zydua he pakhâta ta tao teh u, chatanachata ABEIPA nama Khazohpa mohmô liata hmo phapa nata hmo dopa nama taopa heta, nama châta nata nama hnôh lâta nama sawzy châta a pha aw.

²⁹ ABEIPA nama Khazohpa ta nama kei pahnie awpa phozy cha pahleipadiapa ei ta, ama râh pahrâpa ta nama y tina chata, pahleipadiapa ta ama yna hawhpa liana khata namâ ao hra lei nawpa ta a chado ula.

³⁰ ‘He phozy heta kheihta e ama khazohzy ama chakao? ama taopa hawhta keimo chhaota tao hra ei suh u,’ tahpa ta ama khazohzy kyh zy hiahri khah u.

³¹ Cha hawhna chata ABEIPA nama Khazohpa chô liata nama tao awpa châ vei; ama khazohzy chô liana chata ABEIPA pachâ ta hmo pasichhihpa to a hao ngaitapa zy cha tao tyh ei ta ama sawchapawpazy ama sawchanônôzy tlai chhao ama khazohzy châta mei liata ama rao tyh.

³² “Tao awpa ta bie ei cha piepa maih cha nama tao awpa a châ; nama baichha awpa châ leipa ta, nama thy bâ awpa châ hra vei.