Ryhpachaneina 11

Studie

         |

1 Chavâta ABEIPA nama Khazohpa cha a kyh pachâpa ta a bieraopa zy, a ryhpazy, pachiana zy, a biepiepa zy kha nama zyh awpa a châ.

2 Atahmâ he ABEIPA chhoreina zy cha nama pahno, (nama pawzy deikua cha pahno veih ei) a rôhnahna zie zy, a bâh thatlôna zie zy, a bâh pazawhna zie zy.

3 a pahnona zy, a hmotaopa Izi râh chhôhta Izi beipa Phirao chô liata nata a râh chhôh zydua liata a taopa zy;

4 Izi pheisaih sahlao nata ama arâ nata ama talaili chôta a hmotaopa zy; ama châ chadai nota Tilaipi Saihpa ti ta a pavaosa zie zy, atahmâ taihta ABEIPA ta a pahleipadia zie zy.

5 he su nama tlô hlâ lei râhpathohpa liata nama chôta a hmo tao zie zy.

6 Rubena sawchapawpa Eliaba sawchapawpa, Datha nata Abira zy chô liata a taozie zy; alei ta a pakah âpa ta. Izarel mo zydua hry ta, âmo nata ama chhôhkha zy nata ama poh-ozy nata ama sahroh amâ chhipa zydua a palâ khaina zie zy; a pahno leipa nama pathlazy hnohta a reipa châ leipa na ta.

7 nama mo tlaita ABEIPA ta hmo rôhnah ngaitapa a taopa zydua a hmôtuhpa zy hnohta tlao a châ.

8 Chavâta nama tha tlôpa ta hnei awpa ta nama pangaipa râh cha nama hnei thei nawpa ta nata sâhpiti nata kheihti lona râh cha nama mahpaw zy nata ama pathlazy pie awpa t.

9 ABEIPA ta chhie sapa râh liana chata bohpi nama pahrâ thei nawpa ta atahmâ ta bie ei cha piepa, biepiepa zydua he nama zyh awpa a châ.

10 Nama kei pahrâ awpa râh cha nama vaw puana Izi râh, âhnalasi sahdô liata chi tupa ta ti nama bao tyhpa hawhta châ leipa ta.

11 nama kei pahrâ nawpa râh cha tlâhzy nata saikao nata vâsua ti a hmôpa râh tlao châ ta.

12 ABEIPA nama Khazohpa pachâpa râh châ ta, ABEIPA nama Khazohpa moh cha kô thabypa tawhta a chhâna taihta a tawpâ thlâh ha tyh.

13 ABEIPA nama Khazohpa cha kyhpachâ awpa nata nama pathipalôh tlokhuh nata nama palôhrupa tlokhuh ta, nama chakao awpa ta ei biepiepa atahmâ ei cha piepa ei he phahnai khoh ngaitapa ta nama zyh khiahtala.

14 nama râh vâsua cha a daihti ta liata vâsua ti hmiatuapa nata vâsua hnôh chaipa cha cha pie aw ei na ta, chatanachata nama sâh zy, nama kresawti zy, nama sathaw zy nama hria thei aw.

15 Nama sahrohzy châta chhao, nama râh liata sibiepa zy paysa hra aw na ta, nâmo chhaota nie aw eichi ta, aoh veihpa ta nama y aw.

16 A chado teh u, chata leipa ta la nama pathipalôh cha dôpa ta y aw ta, tlei aw eichi ta, khazoh hropa chakao aw eichi ta, namâ chhy pathlei aw na.

17 chata a châ khiahtala ABEIPA pathi cha nama chô liata ia aw ta, avâ cha khaw aw ta, avâ sua leipa aw ta, alei chata a thei pathei leipa aw ta, chatanachata ABEIPA ta a cha piepa ei râh pha ngaitapa tawhtapa he thlai nama leidia aw.

18 Chavâta he ei biezy he nama pathipalôh nata nama palôhrupa liata khô ula; pahnona châta nama ku liata chahry aw eichi ta, chatawhcha nama mo nata mo likawh ta khiriena châta a y hra awpa a châ.

19 Chazy cha nama sawzy pachu aw eichi ta, nama o liata namâ tyu nota zy, lâpi liata nama sie nota zy, namâ zia nota zy, nama thyu nota zy ta nama reih tyh awpa a châ.

20 Chatawhcha nama ochhi tôh liata zy, nama ochhi liata zy, nama roh awpa a châ.

21 chatanachata nama mahpawzy pie awpa ta chhie a sapa râh liana chata nama hro chhôh noh nata nama sawzy hro chhôh noh cha alei chô liata avâ noh hawhna khi ta a pasihsa aw.

22 ABEIPA nama Khazohpa cha kyhpachâ awpa nata a lâpi zydua a chhih awpa nata ano khâchâ patu awpa ta phahnai khoh ngaitapa ta, he bie ei cha piepa, biepiepa zydua he nama zyh khiahtala.

23 ABEIPA chata he pho zydua he cha papuapa aw ei ta, nâmo hlâta a rôhnah viapa nata hmotaothei viapa phozy râh cha nama hnei aw.

24 Nama phei pazah ta nama tlypa maih cha nâmo eih châ aw ta; râhpathohpa tawhta Lebanaw taihta nata chavah, Euphrate chavah tawhta notla lâ tilaipi taihta nama râh a châ aw.

25 Ahyhmah ta cha pahnie aw veih ei; ABEIPA nama Khazohpa ta nama hnohta a rei hawpa hawhna khata nama kei tly awpa râh zydua liana chata nâmo china nata rarôh yna a paysa aw.

26 Pachâ teh u, atanoh he nama hmiakô liata byhnâ nata chhiesana soh na ta.

27 ABEIPA nama Khazohpa biepiepa zy, atahmâ ta ei cha piepa ei he nama zyh khiahtala, byhnâ châ aw ta.

28 ABEIPA nama Khazohpa biepiepazy cha zyh leipa ta, nama pahno beih leipa khazoh hropa zy a chhy awpa ta atahmâ ta bie ei cha piepa ei, nama tlei sai khiahta deikua cha chhiesana a châ aw.

29 Chatawhcha nama kei hnei awpa râh lâta ABEIPA nama Khazohpa ta a cha chhihtha tina chata byhnâ cha Kerizi Tlâh liata soh aw eichi ta, chhiesana cha Eba Tlâh liata.

30 Noh tlana khô, Arabah liata a ypa Kana mo râh, Kilkal dady Môre oaka kiah Zawdâh haosâ liatahpa châ vei mâ?

31 ABEIPA nama Khazohpa ta a cha piepa râh hnei awpa ta Zawdâh cha nama chaka awpa châ ta; hnei aw eichi ta, cha liana chata nama pahrâ aw, atahmâ nama hmiakô liata ei sopa,ryhpa nata pachiana zydua cha zyh awpa ta namâ chado awpa a châ.