2 Samuel 22

Studie

         |

1 Chatawhcha Davi chata a khakhaipa zydua ku tawhtapa nata Sawla ku tawhtapa ABEIPA ta a pachha noh liana chata he hla bie he ABEIPA lâta reih ta.

2 Ano chata, “ABEIPA cha ei lôpanô nata ei kuh nata na pabohtuhpa châ ta,kei eih tlai a châ,

3 ‘ei lôpanô, Khazohpa, ano cha ei ngâ aw, ei vyhphao nata ei pachhana ki, ei kuh sâhpa nata ei pabohna a châ, ei pachhatuhpa; nâma ta chyhsa nôchhina tawhtapa na pachha tyh chi ta.

4 Reithai tla ABEIPA cha pado aw na ta, chatanachata na dyuhtuhpa zy tawhtapa pachhapa ta ei y aw.

5 Thina chalâhparâpa chata na chadô ta, Khazohpa pachâ leina ti laipa chata na pachisa ta;

6 Sheol khawhri zy chata na chahry ta, thina khohei zy chata na ao ta.

7 'Ei nôpopa ta ABEIPA cha pado tyh na ta; ei Khazohpa cha ei aw tyh. Ano chata achhyna-o tawhta ei ao thei ta, chatawhcha ei awna ao cha a nah liata a ngia ta.

9 Ahnapasu tawhta meikhu pua ta, a pakah liata a puapa mei chata kâ patlô ta; cha chata mei-ia chhao pati ngâ ta.

10 Ano chata avâ zy chhao pabô ta, Chô ta; a phei ry zy liana chata zohkaluhpa y ta.

11 Cherubi chô liata kiah ta, a zaw ta;thlih mathlaw liana hmô ei ta.

12 Zohna cha ano padôna byureih ta tao ta, tizy avâ liata meihdo chha kalupa zy cha pakhypa ta.

13 A hmiakô ta khaihna vâna chata mei-ia zy cha ia ta.

14 ABEIPA cha avâ liana khita paro ngâ ta, Chônôchaipa chata a ao papua ta.

15 Chatawhcha châtai zy cha ka ta, âmo sahlao papai ta, dôhla pathlisa ta, âmo patypamâ ta.

16 Cha pata nahta ABEIPA chhoreina vâta, a hnapasu liata hu puapa ta thata ahmôpa vâta tilaipi lona zy paluasapa ta, leilô bôna zy cha palâsapa ta y ta.

17 “Ano chata chôlâ tawhta paza ta, na patu ta, ti hluhpi tawhtapa nâ daophi ta.

18 Nâ dyuhtuhpa thatlô ngaitapa tawhta na pachha ta, nâ haotuhpa zy tawhtapa chhao; kei châta ama tha tlô tu tlôh ta.

19 “Âmo chata ei vâchhie noh liata na siehnao ei ta; châhrasala ABEIPA cha ei pahniehna chaipa a châ.

20 Ano chata su kawh ngaitapa liata na chhihtha ta; ei chôta â lypa vâta eina pachha haw.

21 “ABEIPA ta ei siana zie lymâ hawhta ei chôta tao ta, ei kuzy a pathaihna zie lymâ hawhta eina thô.

22 ABEIPA lâpi zy cha a chhih na ta, ei Khazohpa tawhtapa cha molei ngaitapa ta pavia beih tlôh leipa na ta.

23 A ryureina zydua ei hmiakô liata y tyh ta,a bieraopa zy cha a heisai beih tlôh leipa na ta.

24 Ano liana chata eina hnei leipa châ hra na ta, ei hmoparaona tawhtapa a pananona ta.

25 Chavâta ABEIPA chata ei siana zie lymâ hawhta na thô ta, a mohmô liata ei pathaih zie lymâ hawhta.

26 “Zawngiah thei ngaitapa liana chata zawngiah thei ngaitapa ta a palâsa aw chi ta; seina a hnei leipa hnohta seina hnei leipa ta;

27 mopathaipa liana chata pathaihpa ta palâsa aw chi ta, chyhsa chhorupa liana chata chhorupa ta na palâsa aw.

28 Riethei a taopa chyhsa zy cha pachha haw chi ta, a palaipa zy deikua cha na panawhsa thei nawpa ta ama chô lâta na mo tawpâ chi ta.

29 Hy ABEIPA y, ei meiôh châ tlôh chi ta, ABEIPA chata ei zona he a pavâsa aw.

30 Nâma baona ta chariah adyuh tlôh na ta, ei Khazohpa baona ta kuh ei zawpakhô.

31 Khazohpa cha ano lâpi cha pha paki ta; ABEIPA bie cha pasia hawpa a châ; ano a ngâtuhpa zydua chata ano vyhphao a châ.

32 “ABEIPA leipa cha ahy e Khazohpa châ? Eima Khazohpa leipa ta cha ahy e lôpanô a châ?

33 Khazohpa cha ei kuh a i ngaitapa châ ta, pha pakipa cha lâpi liata a chhihtha tyh.

34 Ei pheizy cha sasu phei hawhta tao ta, ei su sâhpa zy liata eina paysa tyh.

35 Ei kuzy he chariah ka nawpa ta pachu tyh ta, chatanachata ei bâh zy heta dawh libaw a kei thei.

36 Nâ ta na pachhana vyhphao cha na pie chi ta, na reisina ta na palai chi ta.

37 Ei keih chakâna su pakawh chi ta, chatanachata ei pheizy he a haih vei.

38 Ei khakhaipa zy cha pha na ta, pahleipadia na ta, pahleipadiapa ta ama y hlâ lei cha kua va na.

39 Ama thyu heih thei khao lei nawpa ta phie pahleipadia na ta, chhawh pathlah na ta; ei phei ry liata pao haw ei ta.

40 Nâma ta adyuhna châta thatlôna ta ei chai na saih tlôh chi ta; nâ dyuhtuhpa zy cha ei ry liata panawh aw chi ta.

41 Nâ haotuhpa zy cha ei pahleipadia thei nawpa ta, nâ ta na dyuhtuhpa zy cha hnôh chhypa ta paysa haw chi ta.

42 Mohmia pasaih ei ta, châhrasala pachhatuh awpa ta ahyhmah y leipa ei ta; ABEIPA tlai cha moh ei ta, Châhrasala a chhy tlôh va.

43 Cha pata nahta alei liata buhchâh hawh tlaita tu chheih na ta, tlyhmia chiatlao hawh tlaita tly na ta, hie khai na ta.

44 “Nâ ta ei chyhsa zy atuna tawhtapa chhao na paboh haw chi ta; pho to luh châ awpa ta na pachha chi ta; ei pahno beih leipa pho chata eina chakao ha aw ei.

45 Pho hropa zy cha kei lâta a pie aw ei ta, ei thâtih ama thei pata nahta ei bie amâ ngiah aw.

46 Pho hropa zy cha dia aw ei ta, ama kuhzy tawhtapa cha a chalyuna chôta ama vaw pua aw.

47 “ABEIPA cha a hroh na; ei lôpanô reithaipa ta y sala, ei pachhana lôpanô Khazohpa cha palyupalihpa ta y mawh sy,

48 Phuh na lapa tuhpa nata pho to ei ry liata a panawh tuhpa Khazohpa tlai cha,

49 ei khakhaipa zy tawhtapa na latuhpa; nâ ta na dyuhtuhpa zy chô lâna chata na chalo chi ta, chyhsa nôchhiepa tawhtapa cha na paboh tyh chi ta.

50 “Chavâta hy ABEIPA y, pho to hry liata alyna bie ei cha hlâ, na moh reithaipa ta ei sa hra aw.

51 Ano chata pachhana rôhnah ngaipa ta abeipa pie tyh ta,a sathaw thupa chô liata Davi nata a pathlazy chô tlai liana chata chhâzaw ta a zawngiahna kyhpachazie a palâsa aw.