2 Samuel 20

Studie

          |

1 Cha liana chata Benzami chyhsa Bikhari sawchapawpa a moh Sheba, chyhsa pakha vaw y ta; chiahmie tô ta, “Davi liana chata tovyuh hnei leipa pi ta, Zese sawchapawpa liana heta ryu to awpa hnei hra ma pi; hy Izarel mozy saih u, nama poh-o chyu lâta a di teh u!” tah ta.

2 Chatanachata Izarel mo zydua ta, Davi zipa cha khysai haw ei ta, Bikhari sawchapawpa Sheba cha zi haw ei ta; Zudah mozy deikua chata Zawdah tawhta Zerusale taihta ama beipa cha khâchâ a bai haw ei ta.

3 Chatanachata Davi chata Zerusale liata a o cha tlô ta; abeipa chata chanô pahrawh a nôtho zy o hâ awpa ta a sopa zy cha a chhi ta, o liata vaihtuhpa ku ta soh ta; âmo pasa lymâ ta, châhrasala ama hnohta a ngia leipa ta. Chatanachata ama thi noh taihta khôpa ta y ei ta, nôhmeipa ta y haw ei ta.

4 Chatanachata abeipa chata Amasa hnohta, “Noh thôh chhôh ta Zudah chyhsa zy na pakhy pa la, nâma chhao vaw y hra mah y,” tah ta.

5 Chatanachata Amasa cha Zudah mozy aw pakhy awpa ta sie haw ta; anodeikuacha a daihti a raopa hlâta hawh via haw ta.

6 Chatananachata Davi ta Abisai hnohta, “Bikhari sawchapawpa Sheba heta Absalaw hlâta eima châta hmopeipa a tao via aw; na zibeipa chyhsa zy he a chhi la, a chadai teh u, chata leipa ta la khih kuh a hneipa zy liata a ngia hmâ aw ta, hmo pha leipa lâta eima papua pathlei aw na,” tah ta.

7 chatanachata Zôaba sahlao zy, Kere mozy, Pele mozy nata ama chyhsa thatlôpa zydua chata ano zi haw ei ta; Zerusale tawhna chata Bikhari sawchapawpa Sheba a chadai awpa ta pua haw ei ta.

8 Kibia liata lôpanô yna ama kei tlô nah ta, Amasa chata âmo vaw dy ta, Zôaba chata adyuhna chhaichhi a tobi ta, chatawhcha a chô liana chata zaozi a vaopa ta chaisaihna liata a saih ta, chatawhcha a sie nota tla haw ta.

9 Chatawhcha Zôaba chata Amasa hnohta, “Unawh y, na pha chy ma?” tah ta. Chatawhcha Zôaba chata Amasa sy a chhuahpa ta a kâhmi cha a ku chachâh lâta patu ta.

10 Châhrasala Amasa chata Zôaba ta zaozi a chabapa cha a papeisa leipa ta, chatanachata a py liana chata dy ta, a rih zy pua hôlô ta, dy chanei khao leipa ta; chatanachata thi haw ta. Chatanachata Zôaba nata a unawhpa Abisai chata Bikhari sawchapawpa Sheba cha a chadai ei ta.

11 Chatawhcha Amasa kiapâh liata Zôaba sahlao zy hry liata satliapa pakha cha a duah ta, “Zôaba chhâh a châpa nata Davi chhâh a châpa maih chata Zôaba zi lymâ mawh sy,” tah ta.

12 Amasa cha lâlai liahliah liata a thi chiehpa ta a thy thlâh ha ta. Cha chyhsa chata chyhsa zydua a duah thlâhpa ta a hmô nahta Amasa ri cha lalai tawhtapa sibiepa su lâta pasiepa ta poh ta khu ta, a kiapâh lâta a vypa maih amâ duah lymâpa ta a hmôpa vâta.

13 Chatawhcha lâlai tawhtapa a hro lâta pasiepa a châ tawhna chata Bikhari sawchapawpa Sheba a chadai awpa ta chyhsa zydua ta Zôaba cha zi ei ta.

14 Chatawhcha Sheba cha Abel-bethama taihta Izarel pho zydua nata Beri mo zydua tly khai ta, chatawhcha apahmaohpakhy ei ta, ano zi hra ei ta.

15 Chatawhcha Abel-bethama cha khih liana chata dôh ei ta, a khih chheipâh liata alei pacho ei ta, kuh chheipâh liata a duah ta; Zôaba hnohta chyhsa a ypa zydua cha a pacho awpa ta kuh cha thata a chô ei ta.

16 Chatanachata chanô sopa pakha khih tawhna chata vaw awh ta, “Nahthlie teh! Nahthlie teh! Zôaba chho teh, ‘A vaw hnia teh, na hnohta bie ei vaw reih tua aw a tah,’ tah teh u,” tah ta.

17 Chatawhcha ano lâta a kei hnia ta; chanô chata, “Zôaba na châ ma?” tah ta. “Ei châ cha a,” tah ta a chhy ta. Chatanachata a hnohta, “Na seichanônô bie reipa he nahthlie tua,” tah ta. Ano chata a chhy ta, “Ei nahthlie na,” tah ta.

18 Chatanachata “Hlâno ta cha, ‘Abel liana heta chhosiena ama hiah aw,’ tah tyh ei ta; cha hawhna chata bie ama pachhâsa tyh.

19 Kei he Izarel hry liata aryhna a khohpa nata ngâchhihpa sahlaoh liatahpa châ na ta; nâ chata Izarel khih a khih thabypa he parao nâ chhuah he; ABEIPA ryu cha khazia e pamo nâ chhuah?” tahpa ta reih ta.

20 Zôaba chata a chhy ta, “Cha hawhta châ vei, pamopa a lymâ, paraopa tlyma a chhuah cheita va na!

21 Cha hawhpa lâ kyh cha châ vei. Ephrai tlâh râh liatahpa chyhsa Bikhari sawchapawpa a moh Sheba chata abeipa a dyuhpa ta Davi tlai a dyuhpa ta a ku hy ta; ano cha na pie thlâh ha ula, khih cha ei puasai aw na,” tah ta. Chatawhcha chanô chata Zôaba hnohta, “A luh cha kuh khôtho lâta ei cha vaw thy pa aw,” tah ta.

22 Chatanachata chanô cha a sona papuapa ta zawpi zydua hry lâna chata sie ta. Chatawhcha Bikhari sawchapawpa Sheba luh cha tai ei ta, Zôaba lâta pie ei ta. Chatawhcha chiahmie tô ta, âmo o chyu lâta khih tawhtapa cha pai haw ei ta. Chatawhcha Zôaba cha Zerusale lâta abeipa lâna chata a di haw heih ta.

23 Zôaba cha Izarel pheisaih zydua hyutuhpa châ ta; Zahôiada sawchapawpa Benai cha Kere mo nata Pele mozy hyutuhpa châ ta;

24 Adora cha rai pahriasapa zy hyutuhpa châ ta; Ahilu sawchapawpa Zehôsapha cha thâtih a rohtuhpa châ ta;

25 Sheva cha châ rohtuhpa châ ta; Zadôka nata Abiatha cha theihthaipa châ ei ta;

26 Zaira chyhsa Ira chhao cha Davi theihthaipa châ ta.