2 Samuel 14

Studie

         |

1 Zeruia sawchapawpa Zôaba chata abeipa palôhrupa cha Absalaw chô liata a y tahpa pahno ta.

2 Chatanachata Zôaba chata Tekô khih lâta chyhsa tuah ta, cha liata chanô sopa pakha cha kei palasa ta, a hnohta, “Mâchhiesapa hawhta a tao la, mâchhiesana poh a bu la; sathaw chhao a thu leipa ta, bohpi ta mâchhie a sapa chanô hawhta y teh;

3 abeipa lâta vawh la, a hnohta he hawhna heta bie va reih mah y,” tah ta. Chatanachata Zôaba chata bie cha pachy ta.

4 Tekô khih liata chanô chata abeipa lâta a reih chy ta, a hmia alei lâ a khupa ta a naoh ta, “Hy abeipa y, na bao teh,” tah ta.

5 Chatawhcha abeipa chata a hnohta, “Kheihta zie ta ma a châ tly?” tah ta. Ano chata a chhy ta, “Nôhmei châ hmeihseih na ta, ei vahpa cha thi haw ta.

6 Chatawhcha na seichanônô heta sawchapawpa pano hnei na ta, ama pano chata lyu liata a tu ei ta; ahyhmah ta a pachhaihtuhpa y tlôh leipa ei ta, a pakhapa chata pakha cha tu ta; thie haw ta.

7 Chatawhcha ama chhôhkha zydua chata na seichanônô adyuhpa ta abaopasu ei ta, ‘A unawhpa a thietuhpa cha a unawhpa a thiepa vâta eima thie hra thei nawpa ta maniah pie teh,’ tah ei ta; chatanachata ryutotuh awpa chhao eima pahleipadia aw, cha hawhna chata ei mei-ia a ypa cha pachhai aw ei ta, ei vahpa cha moh hnei leipa nata alei chô liata pathla rai hnei leipa ta a y aw,” tah ta.

8 Chatawhcha abeipa chata chanô hnohna chata, “Na o lâ a di la, na kyh liana chata bie ei pie aw,” tah ta.

9 Tekô chanô chata abeipa hnohta, “Hy abeipa, ei zibeipa y paraona maochhiena cha ei chô liata nata ei paw chhôhkhapa zy chô liata tla mawh sy; chatawhcha abeipa nata abeidyuchhai chata maoh phaoh kha se,” tah ta.

10 Abeipa chata, “Ahyrai na chô lâta khâpa tlyma a reihpa maih cha, kei lâta a vaw chhi la, cha hria hei khao aw veih ei,” tah ta.

11 Chatawhcha ano chata, ‘Thisaih palotuhpa zy chô liata phuh a latuhpa zy ta pahleipadia khao lei awpa ta abeipa chata ABEIPA na Khazohpa cha a thei thlâh ha mawh sy, chata leipa ta la ei sawchapawpa he ama pahleipadia tlamaw aw na,” tah ta. Ano chata, “ABEIPA hrona reipa ta ei reih, na sawchapawpa sâbu sâkha chhao alei liata tla aw vei,” tah ta.

12 Chatanachata chanô chata, “Na seichanônô heta beipa ei zibeipa hnohta bie kawh kha deita reih heih tua sy,” tah ta. Ano chata, “Reih teh,” tah ta.

13 Chatawhcha chanô chata, “Cha khiahta khâpa vâta e, Khazohpa chyhsa zy adyuhpa ta he hawhta tao nâ chhuah? He kyh tawhna heta abei cha thai lei a châpa hawhta â lâ, abei chata chyhsa a râpa cha a pakuasa tlôh leipa vâna heta.

14 Eima thi thlyu awpa châ ta, chatawhcha ti alei liata a leih chiehpa hru thei khao leipa hawhta châ pi ta. Khazohpa ta hrona he a lapa châ leipa ta a râpa cha ano chyhsa pathluapa a châ lei nawpa ta a ryhna raopa a châ.

15 Chatanachata beipa ei zibeipa hnohta he bie reih awpa ta ei vypa chhao he chyhsa ei chipa vâta châ ta, na seichanônô chata, ‘Abei hnohta reih tua aw na ta, abei chata a seichanônô hiana cha a pahnosa ngyu aw la.

16 Abei chata kei nata ei sawchapawpa he Khazohpa ryuto lei awpa ta pahleipadia a chhuahtuhpa tawhtapa na seichanônô he pachha awpa ta a vaw nahthlie pa aw,’ tah na ta.

17 Chatanachata na seichanônô châta ‘Beipa ei zibeipa bie cha thlah na palôh aw ta,’ tah na ta; a chhiepa tlyma, a phapa tlyma vaw pahrua awpa ta beipa ei zibeipa cha Khazohpa vâlyuhchâpa hawh tlaita châ tlôh ta. ABEIPA na Khazohpa cha na hnohta y mawh sy!” tah ta.

18 Chatawhcha abei chata a chhy ta, chanô hnohta, “Ei cha hiahripa maih khâpa hmah na phih khah y,” tah ta. Chanô chata, “Beipa, ei zibeipa chata reih mawh sy,” tah ta.

19 Abeipa chata, “He kyh liana heta Zôaba â hlao ma?” tah ta. Chanô chata a chhy ta, “Abeipa ei zibeipa, na thlahpa hrona reipa ta ei reih, abeipa ei zibeipa ta a rei hawpa cha ahyhmah ta chachâh lâta tlyma, chavei lâta tlyma khôkhâh thei leipa aw ei ta. Na chakaotuhpa Zôaba chata na tuah ta; he kyh zydua he na seichanônô a pachypa sai a châ.

20 Hmo yzie panano awpa ta he hmozy he na chakaotuhpa Zôaba chata a tao. Chatawhcha ei zibeipa cha khizaw liata hmo a ypa zydua pahnokheipa ta Khazohpa vâlyuhchâpa hawh tlaita a so,” tah ta.

21 Chatawhcha beipa chata Zôaba hnohta, “Aryh na, sie la, Absalaw cha a vaw chhi teh,” tah ta.

22 Zôaba cha alei lâ a khupa ta a naoh ta, beipa cha byhnâ aw pa ta; Zôaba chata, “Hy beipa, ei zibeipa y, beipa chata a chakaotuhpa hiana cha a pahrosapa vâta atanoh he na chakaotuhpa heta na modypa ei châ tahpa ei pahno haw,” tah ta.

23 Chatanachata Zôaba cha thyu ta, Keshu lâna chata sie ta, Absalaw cha Zerusale lâta a chhi haw ta.

24 Chatawhcha abeipa chata, “Ano o lâta sie sala ei hmia na vaw hmô khah se,” tah ta. Chatanachata Absalaw cha ano o lâta sie ta, abeipa hmia cha hmô khao leipa ta.

25 Izarel zydua hry liata Absalaw hawhta chhithaipa ta reithaipa ahyhmah y leipa ei ta; a phei paroh tawhta a laki taihta seina rai y leipa ta.

26 A sâ â ngyupa cha (kô chhâna maihta ngyu tyh ta; a sâ cha â hri ngaita tyhpa vâta a ngyu tyh), a sâ cha kho pathlia tyh ta, abei khopathliana zie ta sekel za no a tloh tyh.

27 Absalaw chata sawchapawpa pathôh nata sawchanô pakha sa ta, a moh cha Tamari châ ta, chhithai ngaitapa a châ.

28 Chatanachata Absalaw cha kô no bohlo Zerusale liata y ta, châhrasala abeipa hmia rai hmô leipa ta.

29 Chatawhcha Absalaw chata abeipa lâta tuah awpa ta Zôaba cha bie tah ta; châhrasala a vy khoh leipa ta. Chatawhcha bie tah heih ta, châhrasala a vy khoh hlei leipa ta.

30 Chatanachata a chakaotuhpa zy hnohta, “Zôaba lyu cha ei lyu kiapâh liata châ ta, bali sâh hnei ta; mei ta kei rao teh u,” tah ta. Chatanachata Absalaw chakaotuhpa zy ta lyu cha rao ei ta.

31 Chatanachata Zôaba cha thyu ta, Absalaw lâta a o lâta vawh ta, a hnohta, “Khâpa vâta e, na chakaotuhpa zy ta ei lyu ama rao?” tah ta.

32 Absalaw chata Zôaba cha a chhy ta, “Khâpa vâta e Keshu tawhta ei vy? Cha liana chata y thlâh ha aw sala ei châta a pha via awpa tlai,” tahpa ta abeipa lâta tuah awpa ta bie cha tah na ta. Chavâta abeipa hmia cha na pahmôsa teh; paraona a hneipa ei châ khiahtala na thie thlâh ha lah vâ,” tah ta.

33 Chatanachata Zôaba cha abeipa lâta vawh ta; chho ta; Absalaw cha aw ta, abeipa lâta a vy ta; abeipa hmiakô liana chata alei lâ a khupa ta pao ta; abeipa chata Absalaw cha sy ta.