2 Abeizy 16

Studie

          |

1 Remaliah sawchapawpa Pekah kô hrawhleisari a bei kô ta, Zudah beipa Zawtha sawchapawpa Ahaza cha a bei pathao ta.

2 Ahaza cha a bei pathao nota kô synopa a châ, Zerusale liata kô hrawhleicharu abei ta. A mahpaw Davi hawhta ABEIPA a Khazohpa mohmô liata hmo pha ngaitapa tao leipa ta,

3 Izarel beipa zy lâpi cha a chhih hra ta. ABEIPA ta Izarel pathlazy hmiakô liata a papua hawpa phozy ta hmo pasichhih ngaitapa ama tao tyhpa hawhta a sawchapawpa mei liata pangiasa ta.

4 Chatawhcha su sâhpa liata zy, tlâh liata zy, tho hropa to ry liata zy atheih ta, rohpahâhpa rao tyh ta.

5 Chatanachata Suria beipa Rezi nata Izarel beipa Remaliah sawchapawpa Pekah cha Zerusale adyuh awpa ta khy ei ta, Ahaza cha dô ei ta, châhrasala pahnie thei leipa ei ta.

6 Cha nona chata Suria beipa Rezi chata Ela khih cha Suria râh châta la heih ta, Zuza cha Ela khih tawhtapa papua ta; Suria sahlao chata Ela khih cha pahrâ ei ta, atanoh taihta y ei ta.

7 Ahaza ta Asuria beipa Tiklapilesa hnohta, “Na chakaotuhpa nata na sawchapawpa ei châ mâ tâh. Nâ dyuh awpa ta a vypa Suria beipa ku tawhtapa nata Izarel bei ku tawhtapa he na pachha teh,” tahpa ta chyhsa tuah ta.

8 Ahaza chata ABEIPA o liata tâkâ nata ngôh a ypa maih abei o liata ryu pachôna liatahpa chhaota la ta, Asuria beipa lâta lymâ ta paphao ta.

9 Asuria beipa chata a bie reipa cha a vaw pyh ta; chatanachata Asuria beipa chata Damaska khih cha adyuh ta, la ta, a chyhsa zy cha Kira râh lâta sei ta a chhi ta, Rezi cha thie ta.

10 Beipa Ahaza cha Asuria beipa Tiklapilesa a tyh awpa ta Damaska lâta sie ta, Damaska liata maisâh kei hmô ta. Chatanachata Beipa Ahaza cha cha maisâh nohthlahpa ama taona yzie hawhna tlai chata mo pâ awpa ta theihthaipa Uriah lâta paphao ta.

11 Theihthaipa Uriah chata maisâh tao ta; Beipa Ahaza Damaska tawhta a paphaopa hawhna tlai khata theihthaipa Uriah chata Damaska tawhta Beipa Ahaza a vy heih hlâta vaw tao haw ta.

12 Damaska tawhta beipa a vaw tlô nahta, beipa chata maisâh cha hmô ta. Chatawhcha beipa chata maisâh cha pangai ta, kiah ta,

13 maisâh liana chata a raopa hlâna zy raopa ta, a niepa hlâna zy hlâ ta, a dopa hlâna zy patlai ta, a adyhna hlâna zy thisaih cha hie ta.

14 BEIPA hmiakô liata dawh maisâh, a maisâh nata ABEIPA o likawh liatahpa, o dady tawhtapa cha pasie ta, a maisâh maw lâchhâh liana chata soh ta.

15 Beipa Ahaza ta, “Maisâh laipapi liana chata mei ta raopa hlâna zy, zâlâ niepa hlâna zy, abei raopa hlâna zy, a niepa hlâna zy, eima râh liata zawpi zydua raopa hlâna zy, ama niepa hlâna zy, ama dopa hlâna zy chhaota raopa ta hlâ la, a chô liana chata raopa hlâna thisaih zydua nata atheihna thisaih zydua cha hie mah y; dawh maisâh deikua cha ei chhyna awpa a châ aw,” tahpa ta theihthaipa Uriah cha bie pie ta.

16 Chatanachata theihthaipa Uriah chata Beipa Ahaza biepiepa hawhpa zydua cha tao ta.

17 Beipa Ahaza chata patyuna khaohzy cha parao ta, a sina beih cha pasi ta, a patyuna dawh viahchao tôhpa tawhtapa rahô cha la ta, alô paraipa chô liata patyuh ta

18 Pahânoh chata chôkhu a hneipa ta lâpi o ta ama taopa nata khôtho lâta beipa angiana cha Asuria beipa vâta ABEIPA o ta palie haw ta.

19 Ahaza hmotaopa thâtih hropa zy cha Zudah abeizy amâ bei no tahpa kyh rona châbu liata ropa ta y vei mâ?

20 Ahaza cha a mahpaw zy hnohta a mô ta, a mahpaw zy hry liata Davi khihpi liata pabu haw ei ta; a sawchapawpa Hezekiah cha ano vyuhpa ta abei ta.