2 Thatihzy Rona 31

Study

          |

1 Cha zydua cha ama tao khai nahta cha liata Izarel mo zydua chata Zudah râh zydua nata Benzami râh nata Ephrai nata Manase râh liata lôbôpa zy padizao ei ta, Ashera zy thlu ei ta, su sâhpa zy nata maisâh zy ama pacho khai hlâ lei cha Zudah râh khihzy lâna chata sie lymâ ei ta. Izarel pathla zydua cha ama râh lâta âmo khih chyu lâta a di haw ei ta."

2 Hezekiah chata theihthaipa zy nata Livai mozy cha ama py yzie lymâ hawhta chyhsa to theihthaipa zy nata Livai mozy cha ama hria chyu awpa ta, raopa hlâna nata adyhna hlâna a hlâtuhpa ta zy, chakaotuhpa ta zy, alyna bie a reituhpa nata ABEIPA yna chhikao liata vaihtuh awpa zy, py taopa chyu ta.

3 ABEIPA ryhpa liata ropa hawhta my nata zâ raopa hlâna châta zy, pahânoh nata thla thiehpa nata daihti eihpa a hneipa kyhchhi châta zy, abei tovyuh châta sahroh rao hra ta.

4 Zerusale liata zawpi zy cha ABEIPA ryhpa ta tha ama patlô nawpa ta theihthaipa zy nata Livai mozy tovyuh pie awpa ta bie pie hra ta.

5 Biepiepa cha a pathâh pata nahta Izarel pathlazy chata ama sâh zy, kresawti zy, sathaw zy, kheihti zy ama lyu liata a veih tuachaipa zy thata vaw pie ei ta; ama hneipa su hrawh liata su kha thata vaw pie hra ei ta.

6 Izarel pathlazy nata Zudah pathlazy, Zudah khihzy liata a ypa sahlao chata ama viahchao nata ama mietahkupa su hrawh liata su khapa zy, ABEIPA ama Khazohpa châta ama tahpa su hrawh liata su kha zy vaw pie ei ta, thata soh pakhy ei ta.

7 Thla thôhna liata ama soh pakhy pathao ei ta, thla sarina liata ama soh pakhypa paloh ei ta.

8 Hezekiah nata ama molaipa zy ta ama hmô nata ABEIPA nata a chyhsa Izarel zy cha reithai ei ta.

9 Hezekiah ta ama hmo so pakhypa kyh cha theihthaipa sahlao nata Livai sahlao hiahri ta.

10 Zadôka chyhsa, theihthaipa hyutuhpa Azariah ta a chhy ta, “Chyhsa zy ta ABEIPA o lâta hmopiepa ama vaw cheih tua no tawhta nie lymâ pi ta, a daih ngaitapa ta y pi ta, thata a lai, ABEIPA ta a chyhsa zy byhnâ pie lymâ ta, he thata a laipa he eima nie bâhpa a châ hih,” tah ta.

11 Hezekiah ta ABEIPA o liata chhôhpadâhpa zy tao awpa ta bie pie ta; tao haw ei ta.

12 Hmo piepa zy su hrawh liata su kha zy, Khazohpa tovyuhpa zy cha ngâchhih ngaitapa ta vaw pangia ei ta. Ama hyutuhpa cha Livai chyhsa Kônaniah châ ta, a unawhpa Shimei cha a pazipa châ ta.

13 Kônaniah nata a unawhpa Shimei ry liana chata Abei Hezekiah nata Khazohpa o liata hyutuhpa Azariah raopa ta moh pasiatuhpa Zehiel zy, Azazia zy, Nahatha zy, Asahel Zerimô zy, Zôzaba zy, Eliel zy, Ismakia zy, Maha zy, Benaia zy y ei ta.

14 Livai chyhsa Imnah sawchapawpa Kôre, nochhi lâ ochhivaihtuhpa cha Khazohpa lâta lôhthai ta hmopiepa mokhâhtuhpa nata ABEIPA chata hmopiepa nata hmo pathaihpa a raihtuhpa châ ta.

15 A ry liana chata Ede zy, Miniami zy, Zesua zy, Shemaia zy, Amariah zy, Shekania zy theihthaipa khih liata ama hriana daihti chyu liata ama unawhpa zy a hlao a hlao ta a lai, a chyh zy hnohta a raihtuhpa y ta:

16 pathlatuhpa ta pachâpa kô thôh chô lâ, noh chareih ABEIPA o liata hria awpa a byuhpa a hneipa ama py yzie hawhta a sie tyhpa zy rei leipa ta.

17 Ama chhôhkha pathlatuhpa rona liata a laibâhpa ama sawnawh zydua zy, ama lahpinô zy, ama sawchapawpa zy, ama sawchanônô zy, ama chhôhkha zydua zy ama hriana daihti liata a sia ngaitapa ta ama pathaisapa vâta.

19 Arawna pathla khi to liatahpa, opa lâta a ypa theihthaipa zy nata Livai sahlao pathlazy rona liata ropa ta a ypa maih tovyuh a pie awpa ta chyhsa rao eihpa ama y.

20 Cha hawhna chata Zudah râh zydua liata Hezekiah ta tao ta. ABEIPA a Khazohpa mohmô liata a phapa nata a dopa nata ngâchhihpa hmo tao tyh ta,

21 Khazohpa o liata chakaona kyh lâta zy, ryhpa kyh lâta zy, biepiepa kyh lâta zy, a Khazohpa tlyna kyh lâta zy a taopa maih liata a pathipalôh zydua ta tao ta, thlao a chhi lymâ ta.