2 Thatihzy Rona 12

Studie

          |

1 Rehôbaw râh cha â ipa ta a vaw duah ta, thatlô ngaitapa a vaw châ ha tawhna chata, ABEIPA ryhpa cha a heisaih ta, ano chhâh a châpa Izarel sahlao zydua chhao chata.

2 Abei Rehôbaw kô pangawh a bei kô ta, ABEIPA chô liata ama molei hapa vâta Izi beipa Shisaka chata,

3 talaili sâh kha nata za no nata arâ kiahpa chyhsa thy charu chhaota Izarel a vaw dyuh ta, Izi râh liata chyhsa a hnohta a siepa zy cha reitiah lei châ ei ta, Libia mo zy, Suki mo zy, Ethiôpia mo zy châ ei ta.

4 Zudah râh liata kuh a hneipa khihzy la ta, Zerusale kei tlô ta.

5 Hrohsopa Shemaiah cha Rehôbaw nata Zudah sahlao pawhrâhpa Shisaka vâta Zerusale liata pôhpakhypa sahlao lâna chata vawh ta, ama hnohta, “ABEIPA chata he tana heta a tah, ‘Nâ heisai haw eichi ta, chavâta kei chhaota Shisaka ku liata ei cha so haw ei,’ tahpa ta,” tah ta.

6 Chatanachata Izarel sahlao pawhrâhpa zy nata abei cha a panawh ei ta, “ABEIPA cha a siana,” tah ei ta.

7 ABEIPA chata ama panawhpa cha a pahno nata ABEIPA bie cha Shemaiah hnohta vaw tlô ta: “A panawh haw ei ta; pahleipadia khai leipa aw ei na ta, thokha pachha aw na ta, Shisaka hmâpa ta Zerusale chô liata ei pathi-iana hry thlu aw va na.

8 Anodeikuacha a chakaotuhpa zy ama châ aw, keima chakaona zie nata râh hropa chyhsa chakaona zie ama pahno nawpa ta,” tahpa ta.

9 Chatanachata Izi beipa Shisaka cha Zerusale adyuhpa ta khy ta; ABEIPA o liata ryuzy nata abei o liata ryuzy la ta;

10 Abei Rehôbaw chata chazy vyuhpa ta dawh vyhphao zy tao ta, abei o ochhi a vaihtuhpa pheisaih hyutuhpa zy pavaosa ta.

11 Abeipa cha ABEIPA o liata a ngiana maihta vaihtuhpa zy chata chaba ei ta, vaihtuhpa zy chhôhpadâhpa liana chata soh tyh ei ta.

12 A panawh hawpa vâna chata phie a pahleipadia lei nawpa ta a chô liata ABEIPA pathi-iana cha a pai haw ta; Zudah râh cha pha thlâh ha ta.

13 Chatanachata Abei Rehôbaw cha Zerusale liana chata a pa-i ta, ryu reih ta. Rehôbaw cha a bei pathao nota kôsypalih nata kô khapa châ ta, ABEIPA ta a paysana awpa ta Izarel pho zydua hry liata a tlypa khih Zerusale liata kô hrawhleisari a bei ta. A no moh cha Naama. Amawna chyhsa a châ.

14 ABEIPA tlua nawpa ta a palôhrupa a hmâh leipa vâta hmo pha leipa tao ta.

15 Rehôbaw thâtih cha a thaona tawhta a chhâna taihta, hrohsopa Shemaiah ropa thâtih châbu liata nata hrohsopa Idô ropa thâtih châbu liata pathlazy thâti hry liata ropa châ vei ma? Rehôbaw cha a mahpaw zy hnohta a mô ta, Davi khih liata pabu ei ta; ano vyuhpa ta a sawchapawpa Abizah a bei haw ta.