1 Samuel 30

Studie

         |

1 Noh thôh noh ta Davi nata a chyhsa zy ta Zikla ama tlô nahta Amale mo ta Neke lâ nata Zikla khih cha vaw chho haw ei ta. Zikla khih cha vaw taochhie ei ta, vaw rao ei ta,

2 chanô zy nata cha khih liata a ypa maih cha a lai a chyhta sei ta patu ei ta; ahyhmah ta thie leipa ta a chhi ei ta, siekhei haw ei ta.

3 Davi nata a chyhsa zy ta khih ama tlô nahta, vaw kâ khai ha ta, ama lahpinô zy, ama sawchapawpa zy, ama sawchanônô zy cha sei ta vaw patu haw ei ta.

4 Davi nata a hnohta a ypa zy chata ama ao papua ei ta, cha hlei thei khao leina taihta ao tlili ta cha ei ta.

5 Davi lahpinô pano Zezrel chyhsa Ahinô nata Kamel chyhsa Naba panôhmeipa Abikai zy chhao sei ta a chhi haw ei ta.

6 Davi cha a nôpo kaw ta; chyhsa to ama sawchapawpa zy nata ama sawchanônô zy vâta chyhsa zydua ama palôh pasa ngaitapa ta, ano cha alô ta vawh awpa kyh ama reipa vâta. Châhrasala Davi cha a Khazohpa ABEIPA liana chata a tha a patlô ta.

7 Davi chata Ahimele sawchapawpa theihthaipa Abiatha hnohna chata, “Ephod na kei lapa tua,” tah ta. Abiatha chata Davi cha ephod vaw cheipa ta.

8 Davi chata, “Cha sahlao cha a chadai aw sala, ei pha aw ma?” tahpa ta ABEIPA hiahri ta. Ano chata a chhy ta, “A chadai teh; pha thlyu aw chi ta, na pachha khai thlyu aw,” tah ta.

9 Davi cha sie haw ta, ano nata a hnohta chyhsa za charu chhaota, Besô chavah tlô ei ta, ama chyhsa siesaipa zy cha cha liana chata y haw ei ta.

10 Davi deikua chata a chadai lymâ ta, ano nata chyhsa zapali chhaota; chyhsa za no cha ama tha a chhâ hawpa vâta Besô chavah cha chaka thei khao leipa ei ta, ama vaw y haw.

11 Sibiepa su liata Izi chyhsa kei hmô ei ta, Davi lâta a chhi ei ta; viahchhâ pie ei ta, vaw nie ta, ti doh awpa pie ei ta,

12 theiku tlâ kha nata kre pachawhpa sao no pie ei ta. Chazy cha a nie nahta a tha vaw y haw ta; noh thôh nata zâ thôh pati nie leipa nata ti doh leipa châ tlôh ta.

13 Davi chata a hnohta, “Ahy chyhsa e na châ? Khataih tawhta a vypa e na châ?” tah ta. Ano chata, “Izi râh satlia Amale chyhsa chakaotuhpa châ na ta; noh thôh châ haw ta, ei tlâh leipa vâta ei zibeipa ta eina siesai haw.

14 Khere mozy, Neke râh nata ei zibeipa ta Zudah topa Neke râh zy chho pi ta. Kaleba Neke râh chho hra pi ta; Zikla khih chhao meita rao pi ta,” tah ta.

15 Davi chata a hnohta, “Cha sahlao yna lâna chata einâ chhi thei aw chi ma?” tah ta. Ano chata, “Eina thie lei awpa nata ei zibeipa ku liata eina pie heih lei awpa chi ta Khazohpa moh reipa ta ei hnohta chhie sa la, cha sahlao yna lâna chata ei cha chhihtha aw,” tah ta.

16 A za chhihtha nona chata, Philistia râh nata Zudah râh liata hraona hluhpi ama lapa vâta kyhchhi tao ei ta, nie ei ta, doh ei ta, vaw y charei hôlô ei ta.

17 Davi chata noh tla tawhta a mylâ zâlâ taihta adyuh ta; satlia za palih râraoseihpa chô liata kiahpa ta a râpaipa sahlao zy dei leipa ta cha ahyhmah ta a hrohpa ta a puapa rai y leipa ei ta.

18 Davi chata Amale mozy ta ama lapa zydua cha la khai haw heih ta; Davi chata a lahpinô pano cha pachha ta.

19 Chatanachata a lai a chyhta ama sawchapawpa zy, ama sawchanônô zy ama hraopa nata ama hmo lapa maih khâpahmah pahleipa hnei leipa ei ta; Davi chata la khai ha heih ta.

20 Davi chata mietahkupa zaw nata sahroh zaw zydua cha la ta; sahroh hropa zy hmia lâta hao ei ta. “Hezy he Davi hraopa a châ he,” tah ei ta.

21 Chyhsa za no ama tha a chhâpa nata, Davi zi thei khao leipa ta Besô chavah liata ama paysapa zy lâna chata Davi cha kei tlô ta; âmo cha Davi dy awpa nata a hnohta a ypa zy dy awpa ta pua ei ta; Davi ta zawpi zy kiapâh a kei tlô nahta âmo a naoh chyu ta.

22 Davi hnohta a siepa sahlao zy hry liata moleipa zy nata chyhsa chhipa zydua cha achhy ei ta, “Eima hnohta ama sie hra leipa vâta hraona hmo eima kei chhupa cha pie hra leipa aw pi ta, a chhipa ta ama sie thei nawpa ta, ama lahpinô zy nata ama saw zy chyu deikua cha amâ chhi awpa eima pasai aw,” tah ei ta.

23 Davi ta. “Unawh saih u, ABEIPA maniah a pabohsa awpa ta, maniah adyuh awpa ta a vaw thyuhnaopa sahlao eima ku liata a pietuhpa hmo maniah piepa zy cha, cha hawhna chata tao aw veih eichi.

24 Ahyma he kyh liana heta nama bie a py aw? Adyuhna liata a siepa zy topa hawh hra ta, hmobaoh vaih awpa ta a ypa zy chata ama to hra awpa a cha â lyupa hawh saita to hra awpa a châ,” tah ta.

25 Cha noh tawhta atanoh taihta Izarel zy chata biepiepa liata nata ryhpa ta y awpa ta tao ha ta.

26 Davi ta Zikla a tlô nahta hraopa thokha zy cha, “He he ABEIPA khakhaipa zy tawhta hraopa lymâ châta ei cha paphao ei hih,” tahpa ta;

27 Bethel liata a ypa zy Neke Ramo liata a ypa zy Zati liata a ypa zy,

28 Arôera liata a ypa zy, Siphamô liata a ypa zy, Estemô liata y pa zy,

29 Rakal liata a ypa zy, Zerameli khih liata a ypa zy, Keni khih liata a ypa zy,

30 Hôrmah liata a ypa zy, Bôrasa liata a ypa zy, Athaka liata a ypa zy,

31 Hebraw liata a ypa zy nata Davi nata chyhsa zy a hlai ngâ tyhna su zydua liata a ypa Zudah machâ a viasa zy hnohna chata paphao ta.