1 Samuel 28

Studie

          |

1 Cha nona chata Philistina mozy chata ama pheisaih zy cha Izarel mozy adyuh awpa ta a pahmaoh chaimâh ei ta. Akisa chata Davi hnohta, “Nâma nata na chyhsa zy cha pheisaih sahlao hry liata ei hnohta nama sie thlyu awpa a châ tahpa pahno teh,” tah ta."

2 Davi chata Akisa hnohta, “Chatatly, na chakaotuhpa hmotaotheina zie cha na pahno aw,” tah ta. Akisa chata Davi hnohta, “Apha chu! Na vaihtuhpa ta chhâzaw ta ei cha tao aw,” tah ta.

3 Samuel cha thi haw ta, Izarel chyhsa zydua chata chakhei ei ta, ano khih tlai Ramah khih liana chata pabu haw ei ta. Sawla chata khazoh hneipa zy nata dyuthaipa zy cha a râh tawhtapa papua khai haw ta.

4 Philistina mozy cha a pahmaohpakhy ei ta, Shune liana chata riehmo tao ei ta, Sawla chata Izarel mo zydua pakhy ta, Kilbô liata riehmo tao hra ei ta.

5 Sawla ta Philistina pheisaih sahlao zy a hmô nata chi ta, liathi thata nie ta.

6 Sawla chata ABEIPA a chhohiapa chhaota ABEIPA chata mâ tlyma, Urim tlyma, hrohsopa ta tlyma a chhy leipa ta.

7 Sawla chata a chakaotuhpa zy hnohta, “Khazoh hneipa chanô ano lâta siepa ta ei chhohia awpa ta na tluapa teh u,” tah ta. A chakaotuhpa zy chata a hnohta “Enadaw khih liata khazoh hneipa chanô a y mâ tâh,” tah ei ta.

8 Sawla cha a panano ta, pôh nanopa a tao ta; ano nata chyhsa hropa pano chhaota sie ei ta; zâ ta chanô lâna chata kei tlô ei ta. Sawla ta, “Khazoh hneipa chi chata na peih pa la, na hnohta a moh ei reipa maih cha na aw pa mah y,” tah ta.

9 Chanô chata a hnohta, “Pachâ teh, Sawla hmo taopa cha pahno chi ta, a râh liata khazoh hneipa nata dyuthaipa zy cha pahlei khai haw ta. Khazia ei thi nawpa ta ei hrona châta khoheih na tao aw tly?” tah ta.

10 Sawla chata, “ABEIPA moh reipa ta ABEIPA hrona reipa ta ei reih, he hmo vâna heta na chô liata hriena vaw tlô aw vei,” tahpa ta a hnohta chhie sa ta.

11 Chanô chata, “Ahy e, ei cha aw pa aw? tah ta. Ano chata, “Samuel na aw pa teh,” tah ta.

12 Chanô chata Samuel a hmô nahta thata aw ta; chanô chata Sawla hnohta, “Khazia eina dô chi? Sawla châ thlâh ha tlôh chi ta,” tah ta.

13 Abeipa chata a hnohta, “Chi khâ; khâpa na hmô?” tah ta. Chanô chata Sawla hnohta, “Alei tawhta khazoh a vaw puapa ei hmô” tah ta.

14 A hnohta, “Kheihawhta e a châ?” tah ta. Ano chata, “Pawpipa vaw pua ta; viahpakao pasihpa â ky,” tah ta. Sawla chata Samuel a châ tahpa pahno ta, a hmia alei lâta a khupa ta a naoh ta.

15 Samuel chata Sawla hnohta, “Khazia e, he hawhna heta na patypamâpa ta eina aw chi?” tah ta. Sawla chata a chhy ta, “Ei nôpo ngaita vâta na a châ; Philistina mozy chata nâ dyuh ei ta, Khazohpa hra chata nâ heisai ta, hrohsopa tlyma, mâ sapa tlyma rai ta nâ chhy khao leipa ta; chavâta ei tao awpa na chho awpa ta ei cha aw,” tah ta.

16 Samuel chata, “Cha hawhta ABEIPA ta châ heisaipa ta na khakhaipa a châ haw tahpa pahno thlâh hana chôta, khazia bie eina hiahri chi?

17 Keima hmâpa ta a reipa hawhna khata ABEIPA ta na chô liata a tao ha cha zaw; ABEIPA chata na ku tawhtapa khihnarâh cha chhu ta, na vaih Davi tlai cha a pie haw.

18 ABEIPA bie nâ ngiah leipa vâta nata Amale mo chô liata a pathi-ia ngaitana hawhna khata na patlô leipa vâta, atahmâ he na chô liata he hmo he a tao hih.

19 Cha leipa chhao cha ABEIPA chata nâma nata Izarel mozy chhao cha Philistina mozy ku liata pie aw ta; mylâ he nâma nata na sawchapawpa zy cha ei hnohta nama vaw y aw; ABEIPA chata Izarel pheisaih sahlao zy chhao cha Philistina mozy ku liata a pie aw,” tah ta.

20 Samuel bie reipa vâna chata Sawla cha chi ngaita ta alei liata pao ta, tha rai hnei khao leipa ta, noh y nata zâkhihdei ta pati a nie leipa châ tlôh ta.

21 Chanô cha Sawla hnohna chata sie ta, a pachâ a rôh ngaita tahpa pahno ta, a hnohta, “Pachâ teh, na chakaotuhnô ta na reipa cha a ngiah na ta; thi rai hraw sala na bie reipa zy cha ei pyh na.

22 Chavâta nâ chhaota na chakaotuh nô bie cha a ngiah hra mah y; pati a chyhta chhâ cha pie aw na ta; nâ di tita tha na hnei thei nawpa ta nie mah y,” tah ta.

23 Khoh leipa ta, “Nie aw va na,” tah ta. Châhrasala a chakaotuhpa zy nata chanô chata reipasao ei ta; ama bie cha a ngiah haw ta. Chatanachata alei tawhtapa cha thyu ta, rakhô liata a a tyuh ta.

24 Chanô chata viahchao taw pasapa thawpa a o liana chata hnei ta, thlai thie ta, viahdie la ta, ny ta, thinô pahlao leipa viahchhâ tao ta,

25 Sawla nata a chakaotuhpa zy hmiakô liana chata soh ta; nie ei ta. Chatanachata thyu ei ta, cha zâ liana chata sie haw ei ta.