1 Samuel 26

¹ Zipha mo cha Kibia liata Sawla lâta sie ei ta, “Davi cha râhpathohpa daih lâ, Hakhilah tlâh liana chata a nyu thlâh ha vei mâ?” tahpa ta reih ei ta.

² Sawla cha thyu ta, Zipha râhpathohpa lâna chata Izarel mozy hry tawhtapa a tlyhpa chyhsa sâh thôh a chhipa ta Zipha râhpathohpa liata Davi tlua awpa ta zu ta.

³ Sawla chata râhpathohpa daih lâ lâpi liata Hakhilah tlâh liana chata riehmo tao ta. Davi deikua cha râhpathohpa liana chata y thlâh ha ta; Sawla cha ano tluapa ta râhpathohpa lâta â vy tahpa pahno ta,

⁴ chavâta Davi chata mohparutuhpa tuah ta, Sawla cha a vy hmeihseih tahpa pahno pasia haw ta.

⁵ Davi cha thyu ta, Sawla riehmo lâna chata vawh ta; Davi chata Sawla nata a pheisaih hyutuhpa Nera sawchapawpa Abne â ziana cha hmô ta; Sawla cha talaili padôpa chhôh liana chata a zia ta, a dôpa ta chyhsa zy chata riehmo tao ei ta.

⁶ Davi chata Hiti chyhsa Ahimele nata Zôaba unawhpa Zeruia sawchapawpa Abisai hnohta, “Sawla riehmo lâna chata ahy e ei hnohta a sih hra aw?” tahpa ta reih ta. Abisai chata, “Keima na hnohta ei zu hra aw na,” tah ta.

⁷ Davi nata Abisai cha zawpi sahlao yna liata zâ ta vawh ei ta; Sawla cha talaili dôhpa chhôh liana chata a vaw zia ta, a luh lâna chata a asei cha alei liata chaloh ta; Abne nata chyhsa zy chata a kiapâh liana chata a vaw zia ei ta.

⁸ Abisai chata Davi hnohta. “Atanoh he Khazohpa ta na khakhaipa cha na ku liata a cha pie hih; chavâta asei ta ei kha ta alei liata ei vaw chô pathla tua aw, a chô chanei khao aw va na,” tah ta.

⁹ Châhrasala Davi chata Abisai hnohta “Pahleipadia khâ; ABEIPA sathaw thupa chô liata ku pathlapa thai a châpa ahyma a y beih?” tah ta.

¹⁰ Davi heih chata, “ABEIPA hrona reipa ta ei reih, ABEIPA chata a chô liata ku a pathla aw; a châ leipa khiahtala a thina noh a vaw tlô thlyu aw; a châ heih vei khiahtala adyuhna liata sie aw ta, a leidia thlyu aw.

¹¹ ABEIPA sathaw thupa chô liana chata ku ei pathla awpa ABEIPA ta pakhâ se; a luh chô liata asei nata tithei deikua cha la teh, chatanachata sie ei si,” tah ta.

¹² Davi chata Sawla luh kiapâh liata asei nata tithei cha la ta; sie ha ei ta. Ahyhmah ta hmô leipa ei ta, ahyhmah ta pahnopa ta â hrapa y hra veih ei; âmo zydua a môpa ta y tlôh ei ta, ABEIPA ta mokuh pahâh ngaitapa ta a pamôsapa vâ ei ta.

¹³ Davi cha haosâ lâna chata sie ta, a hla kawpa tlâh laki liata a duah ta, ama likawh cha a hla kaw ta;

¹⁴ Davi ta pheisaih zy nata Nera sawchapawpa Abne cha aw ta, “Abne nâ chhy aw va chi mâ?” tahpa ta. Chatanachata Abne chata a chhy ta, “Abeipa a aw hra baopa cha ahyma na châ tly?” tah ta.

¹⁵ Davi chata Abne hnohta, “Chyhsa riahphapa châ va chi mâ? Izarel zy hry liana heta nâ hawhpa he ahyma a y? Kheihta zie ta e na zibeipa cha na vaih vei? Na zibeipa, abeipa cha pahleipadia awpa ta ahy tlyma a vy tlôh ta.

¹⁶ Na hmotaona zie he pha vei. ABEIPA hrona reipa ta ei reih, ABEIPA sathaw thupa na zibeipa cha a phapa ta na vaih leipa vâta athi awpa tlâh na châ na. Abeipa luh kiapâh liata asei nata tithei a ypa kha khataih lâ ma a y haw, moh tua teh,” tah ta.

¹⁷ Sawla chata Davi ao cha pahno ta, “Cha cha na ao ma a châ, ei sawchapawpa Davi,” tah ta. Davi chata, “Hy abeipa, ei zibeipa, ei ao na a châ,” tah ta.

¹⁸ Chatawhcha, “Khâpa vâta e, ei zibeipa heta châ chakaopa he â chadai? Khâpa hmo ma ei tao? A ku liata hmo moleipa khâpa ma a y?

¹⁹ Chavâta abeipa ei zibeipa chata cha chakaopa bie he nahthlie tua se. Adyuh awpa ta na pathipalôh liata a papuasatuhpa cha ABEIPA a châ khiahtala, hmohlâpa cha a pyh lyhliah sala; chyhsa sawzy ama châ khiahta deikua cha ABEIPA hmiakô liata chhiesapa ta y mawh sy, ‘Sie la, khazoh hropa zy chakao teh,’ tahpa ta. ABEIPA ryu ei to thei lei nawpa ta atanoh he na papuapa châ tlôh ei ta.

²⁰ Chavâta ei thisaih cha ABEIPA hmô leina liata alei chô liata lo khah se; bykheipa a byh awpa ta tlâh liata zy chyhsa râh amâ khiepa hawhta Izarel beipa cha ihli deita tlua awpa ta a pua hih,” tah ta.

²¹ Sawla chata, “Hmo ei taopasi haw na; ei sawchapawpa Davi y, a vy heih la na mo hmôna liata ei hrona atanoh liana heta a sôh ngaitapa vâta; kheihta hmahta cha tah chachei aw va na; pachâ teh, hmo hru ngaitapa vaw tao haw na ta, ei molei ngaita kaw na,” tah ta.

²² Davi chata a chhy ta, “Hy abeipa, asei he moh tua! Satlia pakha a vy sala, vaw la se.

²³ ABEIPA chata chyhsa to ama siana nata ama ngâchhihna lymâ pie aw ta, atanoh he ABEIPA ta nâ he ei ku liata eina pie tarawpa ta, ABEIPA sathaw thupa chô liata ei ku hy khoh va na.

²⁴ Atanoh na hrona ei pasôpa hawhna hra heta ABEIPA chata ei hrona he na pasô hra sala, nôpona zydua tawhtapa he na pachha mawh sy,” tah ta.

²⁵ Sawla ta Davi hnohta, “Ei sawchapawpa Davi y, byhnâ aw pata y teh! Hmotaothei ngaitapa ta y aw chi ta, na tiah lymâ aw,” tah ta. Chatanachata Davi cha sie ha ta, Sawla cha a su lâna chata a lie haw ta.