1 Samuel 19

¹ Sawla chata a sawchapawpa Zawnatha nata a chakaotuhpa zydua hnohta Davi thie awpa reih ta. Châhrasala Sawla sawchapawpa Zawnatha chata Davi cha pasô ngaita ta.

² Zawnatha chata Davi hnohta, “Ei pâ, Sawla heta thie châ chhuah ta; mylâ my ta cha a chado la, su a nyuna liata a nyu teh.

³ chatawhcha pua aw na ta, na yna sibiepa su liata ei pâ kiapâh ta a kei duah aw na ta, nâma kyh liata ei pâ bie a chho aw na ta; chatawhcha khâpama ei pahno khiahtala ei cha chho aw,” tah ta.

⁴ Zawnatha chata a paw Sawla hmiakô liana chata Davi cha reithai ta, a hnohta, “Beipa chata a chakaotuhpa Davi chô liana heta hmo pha leipa tao cheita kha se; na chô liata khâpahmah parao tlôh lei khâh ta, a hmotaopa zy cha na châta a pha ngaitapa tlao châ tlôh ta.

⁵ Thi chi leipa ta Philistina chyhsa kha a dyuh ta, ABEIPA ta Izarel sahlao zydua pachhana rôhnah ngaitapa taopa ta. Cha cha nâ chhaota hmô chi ta, nâ ly ngaitapa kha; chavâta mosiapa thisaih chô liana chata khazia e hmo pha leipa tao aw chi ta, a chhâpa khâpahmah y leipa ta Davi cha na thie aw?” tah ta.

⁶ Sawla ta Zawnatha bie reipa cha a pyh ta; Sawla chata chhiesapa ta, “ABEIPA hrona reipa ta ei reih, ano cha thie awpa châ chachei aw vei,” tah ta.

⁷ Chatawhcha Zawnatha chata Davi cha aw ta, Zawnatha chata cha hmo zydua cha chho ta. Davi cha Sawla lâta a chhi ta, a hmialâ hawhna khata a hnohta y haw heih ta.

⁸ Adyuhna vaw y heih ta; Davi cha pua ta, Philistina mozy cha a kei dyuh ta, thata thie ta, a hmiakô liata a râpai ei ta.

⁹ Sawla cha ano o liata asei chabapa ta a tyuh nota ABEIPA tuapa ahripa a chô liata vaw tlô ta; chatawhcha Davi chata totâ tô ta.

¹⁰ Sawla chata a asei ta Davi cha pâchhô liata chakhao pa a chhuah ta; châhrasala Sawla kiapâh tawhna chata a hnei sai ta, asei cha pâchhô liana chata a chaloh thlâh ha ta. Davi cha a râ ta, cha zâ cha a ly haw ta.

¹¹ Sawla chata Davi o lâta my ta a byhpa ta thie awpa ta chyhsa tua ta. Davi lahpinô Mikhal chata “Atazâ he na hrona na paboh leipa khiahtala mylâ ama cha thie aw,” tahpa ta chho ta.

¹² Mikhal chata Davi cha opy lâta pathliah ta a râ ta, a ly haw ta.

¹³ Mikhal chata teraphim cha la ta rakhô liana chata pazia ta, a luh lâna chata mie hmi lahua soh ta, poh ta khu ta.

¹⁴ Davi a patu awpa ta Sawla ta chyhsa a vaw tuah nahta, “Tlâh vei,” vaw tah ta.

¹⁵ Sawla chata Davi kei mo awpa ta chyhsa tuah ta, “A rakhô dua ta a kaw sy ula, ei thie aw,” tah ta.

¹⁶ A chyhsa tuapa zy cha amâ kei ngia nahta, rakhô liata teraphim cha a luh lâta mie hmi lahua a huapa ta vaw y ta.

¹⁷ Sawla chata Mikhal hnohta, “Khazia he hawhta na dô chi ta, a ly nawpa ta ei khakhaipa na papua,” tah ta. Mikhal chata Sawla a chhy ta, “Ano chata, ‘Na pasisa teh, khazia ei cha thie aw,’ eina tah mâ tâh,” tah ta.

¹⁸ Chatanachata Davi cha a râ ta, a ly haw ta, Ramah khih liata Samuel lâta kei tlô ta, a chô liata Sawla hmotaopa zydua cha chho ta. Ano nata Samuel cha sie ei ta, Naiô liata pahrâ ei ta.

¹⁹ Sawla hnohta, “Pachâ teh, Davi cha Ramah khih liata Naiô liata a y,” tahpa ta chho ei ta.

²⁰ Davi patu awpa ta Sawla ta chyhsa tuah ta; chatawhcha hrohsopa sahlao bie ama chho chhielie nota nata Samuel cha ama chô liata hyutuhpa ta a ypa ama kei hmô nahta, Sawla chyhsa tuapa zy chô liana chata Khazohpa Thlahpa vaw tlô ta, âmo chhao chata chho chhielie hra ei ta.

²¹ Cha cha Sawla ama chho nahta mo hropa tuah heih ta, âmo chhao cha kei chhochhielie heih hra ei ta. Chatawhcha Sawla chata a ei thôhna liata chyhsa tuah heih ta, âmo chhao chata kei chhochhielie heih hra ei ta.

²² Sawla chhao cha Ramah khih lâna chata vawh ta, Seku su liata tikhaoh rei kawh ngaitapa kei tlô ta; “Samuel nata Davi he khataih liata ama y,” tah ta, hiahri ta. Ahy tlyma ta, “Ramah khih liata Naiô liata ama y,” tah ta.

²³ Cha tawhna chata Ramah khih liata Naiô lâta sie ta; Khazohpa Thlahpa a chô liata vaw tlô hra ta, sie lymâ ta, Ramah khih liata Naiô a tlôna taihta chhochhielie lymâ ta.

²⁴ Ano chhao chata a chysia zy pahluh hra ta, Samuel hmiakô liata chhochhielie hra ta, cha noh noh y nata zâkhihdei ta thluahruapa ta a zia ta. Cha vâna chata, “Sawla chhao cha hrohsopa hry liata a hlao ha hra khiah?” tahpa he ama hmâh palâh haw.