1 Samuel 11

Studie

         |

1 Amawna chyhsa Nahasa cha vaw pua ta Zabesakilia adyuh awpa ta a duah ta; Zabesa mo zydua chata Nahasa lâna chata, “Eima hnohta bie hraih la, chatanachata eima cha chakao aw,” tah ei ta.

2 Amawna chyhsa Nahasa chata ama hnohta, “He hawhna heta nama hnohta bie ei hraih aw, nama mokhaoh chachâh lâ maih thao khai awpa châ aw ta, cha cha Izarel mo zydua châta mohchhiena a châ aw,” tah ta.

3 Zebesa khih liata machâzy chata a hnohta, “Izarel khihnarâh zydua liata chyhsa eima tuah thei nawpa ta noh sari maniah hâ chy teh. Cha liata maniah pachha awpa ahyhmah ama y vei khiahtala nâ lâta eima vaw pua aw,” tah ei ta.

4 Ama chyhsa tuapa zy chata Sawla yna khih Kibia cha tlô ei ta, zawpi zy nahkhao theina liata cha biezy cha reih ei ta; zawpi zy chata ama ao papuapa ta cha ei ta.

5 Lyu tawhta Sawla cha viahchao haohpa ta a vaw di ta; Sawla chata, “Khâzia ma zawpi zy cha ama cha?” tah ta. Chatawhcha Zabesa khih liata chyhsa zy bie reipa cha chho ei ta.

6 Cha biezy cha a pahno pata nahta, Sawla chô liata Khazohpa thlahpa vaw tlô ta, a pathi-ia ngaita ta.

7 Viahchao bao kha thie ta a sapa cha pachhaih khai ta, Izarel khihnarâh zydua liana chata paraisa ta, “Ahyrai Sawla nata Samuel a zi khoh leipa maih ama viahchao cha he hawhta taopa a châ aw!” tahpa ta chyhsa zy tuah ta. Zawpi zy chata ABEIPA chi ei ta, reikha tlapa ta vaw pua haw ei ta.

8 Beze su liana chata reih ta, Izarel mozy cha thy sy thôh châ ei ta, Zudah mozy cha thy thôh châ ei ta.

9 Chyhsa ama tuapa zy hnohna chata, “Zabesakilia mozy hnohta, ‘Mylâ noh sa locho hlâta pachhapa nama châ aw,’ kei tah muh vy,” tah ei ta. Ama chyhsa tuapazy cha tlô ei ta, Zabesa mozy cha chho ei ta, aly ngaita ei ta.

10 Zabesa mozy chata, “Mylâ nâmo lâta vaw pua aw pi ta, eima chô liata nama khopa hawhta tao muh vy,” tah ei ta.

11 A mylâ ta Sawla chata zawpizy cha hlao thôh ta tao ta; my vaina daihti ta amâ riena su liana chata a ngia ei ta, Amawna mozy cha nohchhô noh sa locho noh taih tlaita thie ei ta; a hro tla kaipa zy cha pai khai ei ta, pano ta a y khohpa chhao y leipa ei ta.

12 Zawpi zy chata Samuel hnohta, “Ahyzy ma, ‘Sawla ta eima chô liata ryu a rei bao hra aw ma?’ a tahpa kha, cha chyhsa zy cha a vaw chhi ula eima thie aw,” tah ei ta.

13 Sawla chata, “Atanoh he la ahyhma thie awpa châ vei, atanoh he ABEIPA ta Izarel zy hry liata pachhana vaw papua haw tlôh ta,” tah ta.

14 Samuel ta zawpizy hnohta, “A vy teh u, Kilkal lâ sie ei suh u, cha liana chata khihnarâh padua pathi ei suh u,” tah ta.

15 Chatanachata zawpi zydua cha Kilkal lâna chata sie ei ta, Sawla cha Kilkal lâna chata ABEIPA hmiako liata abei ta tao ei ta. Cha liana chata ABEIPA hmiakô liata adyhna hlâna zy hlâ ei ta, Sawla nata Izarel mo zydua cha aly ngaita ei ta.