1 Abeizy 3

¹ Sawlawmaw ta Izi beipa Phirao nata a zao khina tao ta; Phirao sawchanônô hnei ta, ano o nata ABEIPA o a sa hlâta nata Zerusale kuh ta a padôh hlâ lei cha Davi khihpi liata paysa ta.

² Zawpi sahlao zy cha su a sâhpa zy liata atheihna hlâ tyh ei ta, cha hlâta cha ABEIPA moh châta o sâhpa a y mâh leipa vâta.

³ Sawlawmaw chata ABEIPA kyh pachâ ta, a paw Davi bieraopa zy cha zyh tyh ta; su sâhpa zy liata atheihna hlâ tyhpa ta rohpahâhpa zy a rao thlâh ha tyh tarawpa ta,

⁴ abeipa cha atheih awpa ta Kibia khih lâ sie ta, cha cha su sâhpa rôhnah ngaitapa châ tlôh ta; Sawlawmaw chata cha maisâh chô liana cha raopa hlâna sâh kha tlai hlâ ta.

⁵ Kibia khih liana chata ABEIPA cha Sawlawmaw lâta zâ ta a mâ lâta a vaw luah ta; Khazohpa ta, “Hiah teh, khâpa ei cha pie aw,” tah ta.

⁶ Sawlawmaw chata, “Na chakaotuhpa ei paw Davi kha na mohmô liata hmeihseihna liata nata siana liata nata pathipalôh do ngaitapa phaohpa ta a ypa lymâ hawhna khata nâma ta a hnohta ngiachhiena thata paluahsa chi ta; nâma ta he ngiachhiena hluh ngaitapa he ano châta sopa chi ta, nâma ta a abeidyuchhai liata atyuh awpa sawchapawpa pie chi ta, atanoh ta a vaw ypa tlai hawhna heta.

⁷ Chatanachata hy ABEIPA Khazohpa y, nâma ta na chakaotuhpa he ei paw Davi vyuhpa ta abei ta tao haw chi ta, kei la hawtipa dei châ na ta; bie a vyna lâ nata vawna lâ chhao he pahno thai leipa na ta.

⁸ Na chakaotuhpa he na chyhsa zy nâ tlypa sahlao chyhsa hluhpi ama hluhpa vâta reitiah leipa nata a hluhzie pahno tiah leipa zy hry liana heta y ta.

⁹ Na chyhsa zy ryurei pana awpa ta na chakaotuhpa he novâhna pathipalôh pie mah y, a chhie nata a pha ei pahrua thei nawpa ta; na chyhsa he zie zydua he ahy e ryureih thei aw?” tah ta.

¹⁰ Sawlawmaw ta cha hmo cha a hiahpa vâta cha bie reipa chata ABEIPA palysa ngaita ta.

¹¹ Khazohpa ta a hnohta, “Nâ ta na châta hro pasihna hiah leipa chi ta, he hawhpa he tlao na hiapa vâta nata na châta hneirôhna zy chhao hiah leipa chi ta, na khakhaipa zy thina chhao hiah leipa chi ta, na châta ryurei thaina tlao na hiapa vâta,

¹² na hiapa hawhta tao haw na ta. Sona nata novâhna pathipalôh ei cha pie, chatanachata na hmia lâta nâma hawhpa rai ahyhmah y leipa ei ta, na hnôh lâta chhao nâma hawhpa rai cha ahyhma y khao hra aw veih ei. "13 Na hiah leipa hneirôna nata rôhnahna chhao ei cha pie hra, chatanachata na hro chhôhta abei hry liata nâma hawhpa rai y aw veih ei."

¹⁴ Na paw Davi ta â ngiapa hawhta ei bie raopa zy nata ei biepiepa zy a pyh awpa ta ei lâpi zy nâ chhih khiahtala, na hro ei pasihsa hra aw,” tah ta.

¹⁵ Sawlawmaw cha a vaw thei ta, a amâ vaw châ ta. Zerusale lâ vawh ta, ABEIPA Biehraina Byh hmiakô liata a duah ta, raopa hlâna nata adyhna hlâna zy hlâ ta, a chakaotuhpa zydua châta kyhchhi tao ta.

¹⁶ Chatawhcha chanô pano sihryhpa, abeipa lâna chata vawh ei ta, a hmiakô liata a duah ei ta.

¹⁷ Chanô pakha chata, “Hy ei zibeipa y, he chanô nata o miakha liata y pi ta; cha o liata ei y nona chata saw sa na ta.

¹⁸ Chatawhcha saw ei sa tawhta noh thôh tawhna chata he chanô chhao heta saw sa hra ta; hmaohkha ta a ypa châ pi ta; cha o liata a ypa keimo pano dei leipa cha cha o liata ahyhmah ta khichhai y leipa ei ta.

¹⁹ Chatawhcha he chanô saw he zâ ta thi ta, a hnieh saopa a châ.

²⁰ Chatanachata zâcho ta thyu ta, na seichanônô he â mô chhôhta ei sawchapawpa ei kiapâh liatahpa cha la ta, a pyh ta, a saw a thipa cha nâ papyhsa ta.

²¹ A mylâ myta ei saw sâhpi pie awpa ta ei vaw thyu nahta, a thipa a vaw châ thlâh haw; châhrasala my ta ei vaw moh pasia nahta, sawchapawpa ei sapa kha châ leipa ta,” tah ta.

²² Châhrasala chanô hropa chata, “Châ vei, a hrohpa he ei sawchapawpa châ ta, a thipa he na sawchapawpa a châ,” tah ta. Pakha chata, “Châ vei, a thipa he na sawchapawpa châ ta, a hrohpa he ei sawchapawpa tlao a châ,” khâchâ tah hra ta. Cha hawhna chata abeipa hmiakô liana chata reih rairieh ei ta.

²³ Chatanachata abeipa chata, “Pakha ta, ‘A hrohpa he ei sawchapawpa câa ta, a thipa he na sawchapawpa a châ,’ tah ta; pakha ta, ‘Châ vei, a thipa he na sawchapawpa châ ta, a hrohpa he ei sawchapawpa tlao a châ,’ tah hra tlôh eichi ta,” tah ta.

²⁴ Chatawhcha abeipa chata, “Zaozi na vaw pie teh u,” tah ta. Chatanachata zaozi cha abeipa hmiakô liana chata vaw cheih ei ta.

²⁵ Chatawhcha abeipa chata, “Hawti a hrohpa kha bo no lâta tai ula, a khophie pakha pie ula, a khophie cha pakha pie teh u,” tah ta.

²⁶ Chatanachata hawsaih a hrohpa nô chata, a saw cha a tha pasa ngaita tlôh ta, abeipa hnohta, “Hy ei zibeipa y, hawsaih a hropa he anô cha pie thlâh ha teh, thie cheita khâ,” tah ta. Pakha deikua chata, “Kei eih châ hlei kha sa, nâ eih châ hlei hra kha sa; tai pachhô thlâh ha teh,” tah ta.

²⁷ Chatanachata abeipa chata achhy ta, “Hawsai a hrohpa kha a hmiatuapa chanô hnohta pie teh u, thie cheita kha u, ano tlai kha a nô a châ,” tah ta.

²⁸ Izarel sahlao zydua chata cha kyh liata abeipa ryureina zie cha thei ei ta; abeipa cha chi ngaita ei ta, ryurei nawpa ta Khazohpa sona cha ano liana chata a y tahpa pahno haw tlôh ei ta.