1 Abeizy 22

Studie

  

1 Kô thôh chhôh cha Suria sahlao nata Izarel sahlao zy cha adyuh leipa ta y ei ta.

2 Châhrasala a kô thôh kô liata cha Zudah beipa Zehôsapha cha Izarel beipa lâta zu ta.

3 Izarel beipa chata a chakaotuhpa zy hnohta, “Ramôkilia khih he keimo eih a châ tahpa pahno thlâh ha tlôhpa ta kheihta zie ta Suria beipa ku tawhtapa he chhu leipa ta a ypa ma eima châ tly?” tah ta.

4 Zehôsapha hnohna chata, “Ramôkilia khih eina vaw dyuhkhei khoh aw chi mâ?” tah ta. Zehôsapha ta Izarel beipa hnohta, “Keima nata nâma ei chyhsa zy nata na chyhsa zy cha pôhkha châ pi ta, kei arâ zy nata na arâ zy cha pôhkha ama châ mâ tâh,” tah ta.

5 Zehôsapha ta Izarel beipa hnohta, “ABEIPA bie hiah tua teh,” tah ta. Chatanachata Izarel beipa chata hrohsopa sahlao chyhsa za palih aw pakhy ta, ama hnohta, “Ramôkilia khih adyuh awpa ta ei vaw pua aw ma, pua vei aw?” tah ta. Âmo chata, “Vaw pua teh, ABEIPA ta abeipa ku liata a pie aw,” tah ei ta,

7 Châhrasala Zehôsapha ta, “He liana heta ABEIPA hrohsopa hropa ahy chhâ ma eimâ chhohia awpa y veih ei mâ?” tah ta.

8 Chatawhcha Izarel beipa chata Zehôsapha hnohta, “ABEIPA maniah a chhohiapa awpa chyhsa pakha, Imlah sawchapawpa Mikai a y kha zaw; châhrasala ano he cha ei hao ngaitapa a châ, keima kyh he a chhiena lâ dei leipa cha a phapa rai reih beih tlôh lei khâh ta,” tah ta. Zehôsapha ta, “Abeipa chata cha hawhna cha tah khah se,” tah ta.

9 Chatanachata Izarel beipa chata hyutuhpa pakha aw ta, “Imlah sawchapawpa Mikai a vaw chhi parah teh,” tah ta.

10 Chatawhcha Izarel beipa nata Zudah beipa Zehôsapha cha Samari kuh chhikao a ngiana kiapâh liata sawhri liata ama abei poh a bupa ta, ama abeidyuchhai rairieh liata atyuh ei ta; hrohsopa zydua chata ama hmiakô liata bie reih ei ta.

11 Chatawhcha Kenanah sawchapawpa Zedekia ta thua kizy taopa ta, “ABEIPA ta he tana heta a tah, ‘Hezy heta Suria sahlao zy cha ama leidia khaina taihta na daih aw,’ tahpa ta,” tah ta.

12 Cha hawhna hra chata hrohsopa zydua chata, “Ramôkilia lâna chata khy la pahnie lymâ teh; ABEIPA ta abeipa ku liana heta a pie aw,” tahpa ta reih ei ta.

13 Chatawhcha Mikai aw awpa ta ama tuapa chata Mikai hnohta, “Hrohsopa zy heta reikha tlapa ta a phana lâta abeipa hnohta bie reih chyu ei ta; ama rei hawpa chyu hawhna chata kei reih hra la, a phana lâta kei reih mah y,” tahpa ta reih ta.

14 Mikai deikua chata, “ABEIPA hrona reipa ta ei reih, ABEIPA ta ei hnohta, a reipa cha ei kei reih aw,” tah ta.

15 Chatawhcha abeipa lâta a tlô nahta, abeipa chata a hnohta, “Mikai, Ramôkilia khih adyuh awpa ta eima vaw pua aw ma, pua vei aw?” tah ta. Ano chata a chhy ta, “Pua la, pahnie lymâ teh; ABEIPA ta abeipa ku liata a pie aw,” tah ta.

16 Abeipa deikua chata a hnohta, “Bie hmeihseihpa dei leipa cha ei hnohta ABEIPA moh ta rei lei awpa ta ei khazie ma chhie ei cha pasasa aw tly?” tah ta.

17 Ano chata Izarel sahlao zydua cha a vaihtuhpa a hnei leipa mietahkupa hawhta tlâh zy lâta ama paikhaipa hmô na ta; ABEIPA ta ‘Hezy sahlao heta hyutuhpa hnei khao leipa ei ta, chyhsa to âmo o lâta thlahlôh ngaitapa ta a di ei se,’ a tah,” tah ta.

18 Izarel beipa chata Zehôsapha hnohta, “Keima kyh he a chhiena lâ dei leipa ta cha a phana lâ rai reih aw vei tahpa cha chho va na ma kha?” tah ta.

19 Chatawhcha Mikai chata, “Chavâta ABEIPA bie he nahthlie teh; ABEIPA cha a beidyuchhai liata atyuhpa hmô na ta, avâ liata zawpi sahlao zydua a chachâh lâ nata a chavei lâta a duahpa zy chhaota;

20 ABEIPA ta, ‘Ahaba he Ramôkilia khih lâta vawhpa ta chariah liata thi awpa ta ahy e a reipasao aw?’ a tah. Pakha ta he hawhna heta tah ta, chyhsa hropa ta cha hawhna chata tah ta.

21 Chatawhcha thlahpa pakha vaw pua ta, ABEIPA hmiakô liata a duah ta, ‘Keima ta ei reipasao aw,’ tah ta.

22 Chatawhcha ABEIPA ta a hnohta, ‘Khâpa ta maw?’ tah ta. Ano chata, ‘Vawh aw na ta, a hrohsopa zydua hmao liana chata thlahpa a haih thaipa ei kei châ aw,’ tah ta. Ano ta, ‘Reipasao tlai aw chi ta, na pahnie hra aw; vawh la, cha hawhna chata kei tao teh,’ tah ta.

23 Chatanachata ABEIPA ta he na hrohsopa sahlao zydua hmao liana heta thlahpa a haih thaipa soh ta; nâma kyh he a pha leipa lâta ABEIPA ta a rei haw,” tah ta.

24 Chatanachata Kenanah sawchapawpa Zedekia chata a vaw hnia ta, Mikai bai liata vaw chabai ta, “ABEIPA Thlahpa chata na hnohta bie reih awpa ta khataih lâ e eina siesai?” tah ta.

25 Mikai chata, “Chhôhpadâhpa chhôh chaipa liata a nyu awpa ta nâ ngia tita na pahno aw,” tah ta.

26 Chatawhcha Izarel beipa chata, “Mikai he a chhi u la, Amawna khihpi hyutuhpa nata abeipa sawchapawpa Zôasa lâta siekhei teh u;

27 ‘Abeipa ta he tana heta a tah, “He chyhsa he lô-o liata khô ula, thlahlôh ngaitapa ta ei vaw kua heih hlâ lei cha rietheina pati nata rietheina ti vaw pie teh u,” tahpa ta tah teh u,’ tah ta.

28 Mikai chata, “Thlahlôhpa ta na vaw kua heihpa tlai khiahtala ABEIPA ta kei na hmâpa ta bie a rei leipa a châ aw,” tah ta. Chatawhcha ano lilaw chata, “Nâmo zawpi zy saih u, nama zydua ta pahno teh u!” tah ta.

29 Chatanachata Izarel beipa nata Zudah beipa Zehôsapha cha Ramôkilia khih lâna chata khy ei ta.

30 Izarel beipa chata Zehôsapha hnohta, “A panano aw na ta, adyuhna lâta ei sie hra aw, nâ deikua chata na abei poh a bu mah y,” tah ta. Chatanachata Izarel beipa cha a panano ta, adyuhna lâna cha sie ta.

31 Suria beipa chata a talaili chôta hyutuhpa sythôh nata pano hnohna chata; “Izarel bei dei leipa cha mo chyhpa rai, molaipa rai, ahyhmah adyuh khah u,” tahpa ta bie pie ta.

32 Chatawhcha talaili chôta hyutuhpa zy chata Zehôsapha ama hmô nahta, “Izarel beipa a châ tlai na,” tah ei ta. Chatanachata adyuh a chhuahpa ta pado ei ta; Zehôsapha cha aw ta.

33 Chatawhcha talaili chôta hyutuhpa zy chata Izarel beipa châ vei tahpa ama pahno nahta amâ chadaipa cha kua haw ei ta.

34 Châhrasala chyhsa pakha ta â nuapa hlei hnei leipa ta a libaw a kei ta, Izarel beipa cha a vyhphao a pazaona likawhpa liata ka ta; chatanachata a talaili a pasiesatuhpa hnohta, “A pahie la, pheisaih sahlao hry tawhtapa he na puakhei tua, hmah pasa ngaitapa ei phaoh haw hih,” tah ta.

35 Cha noh liana chata adyuhna cha ru ngaita ta, abeipa cha a talaili liana chata Suria sahlao zy mohmô liata paduasa ei ta, ano hmah ama paphaopa tawhna chata thisaih cha talaili chhôh liana chata loh ngâ ta, zâlâ ta thi haw ta.

36 Chatawhcha noh tla chyta pheisaih sahlao zy hry liata, “Chyhsa to âmo khih lâta, chyhsa to âmo râh lâta a di khai mawh sy!” tahpa ta aw chaimâh ei ta.

37 Chatanachata abeipa cha thi haw ta, Samari liata a ngiakhei ei ta; Samari liata abeipa cha pabu haw ei ta.

38 Samari tipo kiah liata talaili cha pasi ei ta, ABEIPA bie hawna tlai khata i ta a thizy cha palie haw ei ta, cha liana chata sihryhpa sahlao zy cha ama sie tyh.

39 Chatanachata Ahaba thâtih hropa zy, ano hmotaopa zydua zy, a sianaoh o sapa zy, a khih taopa zydua zy cha Izarel abeipa thâtih rona châbu liata ropa ta y vei ma?

40 Chatanachata Ahaba cha a mahpaw zy hnohta a mô ta; a sawchapawpa Ahaziah cha ano vyuhpa ta a bei haw ta.

41 Izarel beipa Ahaba abeina kô palihna liata Asa sawchapawpa Zehôsapha cha Zudah zy chô liata a bei pathao ta.

42 Zehôsapha cha abei pathao nona chata kô sythôh nata kô pangawh châ ta, Zerusale liata kô sy no nata kô pangawh ryu a reih. A nô moh cha Azubah, Shilai sawchanônô a châ.

43 A paw Asa lâpi a chhihpa zydua cha a chhih hra ta; tleisai chachei leipa ta ABEIPA mohmô liata hmo phapa tao tyh ta; su sâhpa zy deikua cha pahlei leipa ta, su sâhpa zy liana chata chyhsa zy cha atheihpa ta rohpahâhpa ama rao tyh.

44 Zehôsapha chata Izarel beipa nata adyhna tao ta.

45 Chatanachata Zehôsapha thâtih hropa zy, a hmotaothei zie a palâsana kyh zy, a chariah adyuhna kyh zy cha Zudah beizy a bei no tahpa kyh rona châbu liata ropa ta y vei mâ?

46 Chatawhcha a paw Asa a hro no ta sihryhpa sahlao a ypa zy kha a râh tawhtapa papua khai ta.

47 Edôma râh liana chata abei y leipa ei ta; abei vyuhpa ta a ypa ta ryureih ta.

48 Zehôsapha chata Ôphaira ngôh a phaohtuh awpa Tasi balyh zy cha tao ta, châhrasala sie vei; Eziôkebe liata rao khai haw tlôh ta.

49 Chatanachata Ahaba sawchapawpa Ahaziah ta Zehôsapha hnohta. “Ei chakaotuhpa zy he na chakaotuhpa zy nata balyh zy liata hmaohkha ta sie ei sy,” tah ta, châhrasala Zehôsapha chata paryhsa vei.

50 Chatawhcha Zehôsapha cha a mahpaw zy hnohta a mô ta, a mahpaw zy hry liata a mahpaw Davi khiphi liata pabu haw ei ta; a sawchapawpa Zehôra cha ano vyupa ta a bei haw ta.

51 Zudah beipa Zehôsapha a beina kô hrawhleisari kô liata Ahaba sawchapawpa Ahaziah cha Samari liata Izarel zy chô liata a bei pathao ta, Izarel zy chô liata kô no a bei ta.

52 ABEIPA mohmô liata hmo pha leipa tao tyh ta, a paw lâpi a chhihpa zy, a nô lâpi a chhihpa zy, Neba sawchapawpa Izarel sahlao zy hmo a paraosatuhpa Zerôbaw lâpi a chhihpa zy a chhih tyh hra ta.

53 A paw taopa hawhpa maih taopa ta, Baal chakao ta, achhy tyh ta, ABEIPA Izarel zy Khazohpa cha a pathi pa-ia tyh ta.