1 Abeizy 16

¹ Baasha kyh liata Hanani sawchapawpa Zehu hnohta ABEIPA bie vaw tlô ta,"

² “Buhchâh tawhtapa cha chalo na ta, ei chyhsa Izarel zy chô liata hyutuhpa ta cha tao na ta, nâma ta Zerôbaw lâpi a chhihpa cha a chhih hra chi ta, ama moleina zy ta ei pathi-ia nawpa ta ei chyhsa Izarel zy hmo paraosa chi ta,

³ Baasha nata a chhôhkha zy he ei pahlei aw, chatanachata Neba sawchapawpa Zerôbaw chhôhkha zy hawh tlaita na chhôhkha zy he ei tao aw.

⁴ Baasha chhôhkha hry liatahpa khihpi liata a thipa maih cha i ta chaih aw ta; chatawhcha a chhôhkha hry liatahpa lyurâhpa liata a thipa maih cha pavaw zy ta ama nie aw,” tahpa ta.

⁵ Baasha thâtih a hropa zy, a hmotaopa zy, a hmotaothei zie zy cha Izarel zy abei no tahpa kyh rona châbu liata ropa ta y vei mâ?

⁶ Chatawhcha Baasha cha a mahpaw zy hnohta a mô ta, Tirzah khih liata pabu haw ei ta: a sawchapawpa Elah cha ano vyuhpa ta a bei haw ta.

⁷ Baasha nata a chhôhkha zy kyh liana chata a hmotaopa ta ABEIPA pathi pa-ia nawpa ta Zerôbaw chhôhkha zy lyuna hneipa ta ABEIPA mohmô liata hmo pha lei ngaitapa a taopa vâta nata ano cha a thipa vâta Hanani sawchapawpa hrohsopa Zehu hmâpa ta a reipa ABEIPA bie cha vaw tlô ta.

⁸ Zudah beipa Asa a beina kô syno nata kô charuna liana chata Baasha sawchapawpa Elah cha Tirzah khih liata Izarel sahlao chô liata a bei pathao ta, kô no a bei ta.

⁹ Châhrasala a chakaotuhpa Zimri a talaili khophie chô liata hyutuhpa ta tei ta. Cha nona chata Tirzah khih liata a y nota, Tirzah khih liata a o chhôh lâta hyutuhpa Araza o liata parina taihta do ngâpa ta y ta.

¹⁰ Zudah beipa Asa a beina kô syno nata kô sari liana chata Zimri cha a kei ngia ta, adyuh ta, thie ta, ano vyuhpa ta a bei haw ta.

¹¹ Chatawhcha a bei pathao ta, a abeidyuchhai liata atyu pata nahta Baasha chhôhkha zydua cha thie ta; a heinawh zy nata a viasa zy hry liatahpa chapaw saw maih cha pakhahmah pahlôh vei.

¹² Cha hawhna chata ABEIPA Izarel zy Khazohpa cha ama khazoh nohthlahpa zy ta pathi pa-ia nawpa ta Izarel sahlao zy hmo paraosapa ta ama taopa, Baasha moleina zydua nata a sawchapawpa Elah moleina zy vâta,

¹³ ABEIPA ta hrohsopa Zehu hmâpa ta, Baasha kyh liata a vaw rei hawpa hawhna khata Zimri chata Baasha chhôhkha zydua cha a pahleipadia khai haw.

¹⁴ Elah thâtih a hropa zy nata a hmotaopa zydua cha Izarel abei zy amâ bei no tahpa kyh rona châbu liata ropa ta y vei mâ?

¹⁵ Zudah beipa Asa a beina kô syno nata kô sarina liana chata Zimri cha Tirzah khih liata noh sari a bei ta. Philistina sahlao khih Kibethô khih cha chyhsa zy ta ama padô,

¹⁶ a padôtuhpa zy cha, Zimri ta tei ta, a beipa a thie haw,” tahpa ama reipa vaw thei ei ta; chatanachata Izarel sahlao zydua chata pheisaih hyutuhpa Ômri cha cha noh liana chata amâ riena su liata Izarel zy chô liata abei ta tao haw ei ta.

¹⁷ Chatawhcha Ômri cha Izarel sahlao zydua chhaota Kibethô khih tawhna chata khy ei ta, Tirzah khih padô haw ei ta.

¹⁸ Chatawhcha Zimri ta khih cha ama la tahpa a thei nahta, abeipa o liata kuh liata a ngia ta, abeipa o lâta anosasyh ta mei ta arao pa ta, thi haw ta.

¹⁹ ABEIPA mohmô liata hmo pha leipa taopa ta a moleina zy vâta Zerôbaw lâpi a chhihpa cha a chhih hrapa ta Izarel sahlao zy hmo paraosapa ta a moleina vâta.

²⁰ Zimri thâtih hropa zy nata a ru lâta a teina kyh zy cha Izarel abei zy amâ bei no tahpa thâtih rona châbu liata ropa ta y vei mâ?

²¹ Izarel zawpi zy cha py no ta a vaw pachhaih haw ei ta; zawpi khophie chata Kina sawchapawpa Tibni cha abei ta tao a chhuahpa ta zi ei ta, a khophie ta Ômri zi ei ta.

²² Châhrasala Ômri a zituhpa zy chata Kina sawchapawpa Tibni a zituhpa zy cha pahnie haw ei ta; Tibni cha thi ta, Ômri cha abei haw ta.

²³ Zudah beipa Asa abeina kô sythôh nata kô khana liata, Ômri cha Izarel zy chô liata a bei pathao ta, kô hrawhleino a bei ta; Tirzah khih liata kô charu a bei ta.

²⁴ Shema ei Samari tlâh cha tâkâ talent miano ta chalei ta; tlâh liana chata khih tao ta, a khih taopa moh ta cha tlâh a hneituhpa Shema moh paphaopa ta Samari bi ta.

²⁵ Ômri chata ABEIPA mohmô ta hmo pha leipa ta tao tyh ta, a hmia lâta chyhsa zydua hlâta hmo parao pachaih ta.

²⁶ Neba sawchapawpa Zerôbaw yzie kha la ta, ama khazoh nohthlahpa zy vâta ABEIPA Izarel zy Khazohpa pathi pa-ia nawpa ta Izarel sahlao zy hmo a paraosapa hawhna khata molei hra tlôh ta.

²⁷ Ômri hmotaopa thâtih hropa zy nata a hmotao theizie a palâsana kyh zy cha Izarel abeizy amâ bei nota thâtih rona châbu liata ropa ta y vei mâ?

²⁸ Chatanachata chata Ômri cha a mahpaw zy hnohta a mô ta, Samari khih liata pabu haw ei ta; a sawchapawpa Ahaba ta ano vyuhpa ta a bei ta.

²⁹ Zudah beipa Asa abeina kô sythôh nata kô chariena liata Ômri sawchapawpa Ahaba cha Izarelzy chô liata a bei pathao ta, Ômri sawchapawpa Ahaba cha Samari khih liata kô syno nata kô no Izarel zy chô liata a bei ta.

³⁰ Ômri sawchapawpa Ahaba cha a hmia lâta chyhsa zydua hlâta ABEIPA mohmô ta hmo pha leipa tao tyh ta.

³¹ Chatawhcha Neba sawchapawpa Zerôbaw moleina hawhpa a tao hrapa zy cha khâpahmah a châ leipa ta pachâpa ta, Sidaw sahlao abeipa Ethabaal sawchanônô Zezebel lahpinô ta hnei ta. Baal chakaopa ta achhy haw ta.

³² Samari khih a sâhpa liana chata Baal châta maisâh tao ta.

³³ Ahaba chata Ashera tao ta. A hmia lâta Izarel abei zydua hlâta Ahaba chata Izarel zy Khazohpa pathi pa-iana thata tao pachaih ta.

³⁴ A bei nona chata Bethel chyhsa Hiel ta Zerikô khih tao pathi ta; a saw a pih tuapa Abira a chhipa ta lôbô bô ta a saw seihnaipa Sekuba a chhipa ta a kuh chhikao zy cha tao ta, ABEIPA ta Nuna sawchapawpa Zawsua hmâpa ta a vaw rei hawpa hawhna khata.