1 Abeizy 15

Studie

          |

1 Neba sawchapawpa abeipa Zerôbaw kô hrawhleicharie a bei kô liana chata Zudah sahlao zy chô liata Abiza cha a bei pathao ta.

2 Zerusale liata kô thôh a bei ta. A nô moh cha Maaka, Abisalô sawchanônô a châ.

3 Cha hlâta a paw ta hmo moleipa a taopa zydua kha tao hra ta; a mahpaw Davi pathipalôh hawhta a pathipalôh cha ABEIPA a Khazohpa lâta pha paki leipa ta.

4 Châhrasala Davi vâta ABEIPA a Khazohpa ta a hnoh lâta a sawchapawpa paduana awpa nata Zerusale â ipa ta padua awpa ta Zerusale liana chata meiôh pahneisa ta;

5 Hiti chyhsa Uriah kyh tah leipa ta cha, Davi ta ABEIPA mohmô liata hmo phapa a tao tyhpa vâta, a hro chhôhta tao awpa ta bie a piepa maih cha ei beih leipa vâta.

6 Rehôbaw cha a hro chhôhta Zerôbaw nata khâ adyuh tyh ei ta.

7 Abiza thâtih hropa zy nata a hmotaopa zydua cha Zudah abei zy abei no tahpa kyh rona châbu liana chata ropa ta y vei mâ? Chatawhcha Abiza nata Zerôbaw cha adyuh tyh ei ta.

8 Chatawhcha Abiza cha a mahpaw zy hnohna chata a mô ta; Davi khihpi liata pabu haw ei ta. Chatawhcha ano vyuhpa ta a sawchapawpa Asa cha a bei haw ta.

9 Izarel abeipa Zerôbaw kô syno a bei kô chata Asa cha Zudah sahlao zy chô liata abei pathao ta;

10 kô sypalih nata kô kha Zerusale liata abei ta. A nô moh cha Maaka, Abisalô sawchanônô a châ.

11 Chatawhcha Asa chata a mahpaw Davi hawh hra ta ABEIPA mohmô liata hmo phapa tao tyh ta.

12 Sihrypa zy cha a khihnarâh tawhta papua ta, a mahpaw zy ta khazoh nohthlahpa ama taopa zydua kha pahlei khai ta.

13 A nô Maaka chhao cha khazoh nohthlahpa pasichhih ngaitapa Ashera chata a taopa vâta abeinô châna pabasa ta; Asa chata a khazoh nohthlahpa taopa cha chhawh pathla ta Kidraw vatiepa liata mei ta rao ta.

14 Su sâhpa zy deikua cha pahlei leipa ta. Châhrasala Asa pathipalôh cha a hro chhôhta ABEIPA lâta a pha paki.

15 Chatawhcha a paw ta hmo a vaw hlâ hawpa zy nata ano tlaita a vaw hlâ hawpa tâkâri zy, ngôh zy, hmobaoh zy cha ABEIPA o liata khô ta.

16 Chatawhcha Asa nata Izarel beipa Baasha cha amâ bei chhôhta adyuh ngâthlâh ha ei ta.

17 Izarel beipa Baasha chata Zudah sahlao adyuh ta, Zudah beipa Asa lâta a ngia awpa nata a pua awpa pakhâ nawpa ta Ramah khih tao ta.

18 Chatanachata Asa ta ABEIPA o nata abei o liata ryu a ypa tâkâri nata ngôh zydua cha la ta, a chakaotuhpa zy pie ta; abeipa Asa chata Damaska khih liata a ypa Suria beipa Heziô sawchapawpa, Tabrimaw sawchapawpa, Benhada hnohna chata,

19 “Keima nata nama likawh nata ei pâ nata na paw likawh ta biehraipa y ta; lymâ châta tâkâri nata ngôh ei cha vaw phaopa; Izarel abeipa Baasha heta eina paisaina awpa ta a hnohta na biehraipa kha parao thlâh ha teh,” tahpa ta paphao ta.

20 Benhada chata abeipa Asa bie cha a ngiah ta, chatanachata Izarel khih zy cha adyuh awpa ta pheisaih hyutuhpa zy tuah ta, Izô khih zy, Dana khih zy, Abelbemaakah khih zy, Chinerô chho zydua, Nathalai râh zydua chhao pahnie ta.

21 Baasha ta cha bie a thei pata nahta, Ramah khih a taopa cha bâh ta, Tirzah khih liata pahrâ haw ta. "22 Chatanachata Abei Asa chata Zudah râh zydua liata bie pathâhsa ta, ahyhmah ta eipa rai y veih ei; chatanachata Baasha ta Ramah khih tao nawpa ta alô nata tho a hmâhpa zy cha paly ei ta; chazy hmâpa ta Abei Asa ta Mizpah khih nata Benzami râh liata Keba khih tao ta."

23 Asa thâtih hropa zydua zy, a hmotaotheina zie zydua zy, a hmotaopa zydua zy, a khih taopa zy cha Zudah abeizy abei no tahpa kyh rona châbu liata ropa ta y vei mâ? Anodeikuacha a pawpina lâta a phei liata hri kheihawhpa tlyma phaoh ta.

24 Chatawhcha Asa cha a mahpaw zy hnohta a mô ta, a mahpaw Davi khihpi liata, a mahpaw zy hry liata pabu haw ei ta; a sawchapawpa Zehôsapha cha ano vyuhpa ta abei haw ta.

25 Zerôbaw sawchapawpa Nada cha Zudah beipa Asa a bei kô nona liana chata Izarel sahlao zy chô liata a bei pathao ta; Izarel sahlao zy chô liata kô no a bei ta.

26 ABEIPA mohmô ta hmo pha lei ngaitapa tao tyh ta, a paw lâpi a chhipa cha a chhih hra ta, Izarel sahlaozy hmoparao sapa ta a taopa moleina kha tao hra ta.

27 Iskara chhôhkha zy hry liatahpa Ahiza sawchapawpa Baasha ta ano tei ta; Philistina sahlao khih Kibethô liata Baasha ta thie haw ta; Nada nata Izarel sahlao zydua cha Kibethô khih cha ama padô no ta a châ.

28 Zudah beipa Asa a bei kô thôhna liata a châ, Baasha chata thie ta, ano vyuhpa ta â bei.

29 Chatawhcha abei a châ pata nahta a pamo khai hlâ lei cha Zerôbaw chhôhkha zydua cha thie ta; a hrohpa maih cha pakha hmah Zerôbaw chata pahlôh vei; ABEIPA ta Shilôhh khihpa a chakaotuhpa Ahiza hmâpa ta a vaw rei hawpa hawhna khata;

30 cha cha Izarel sahlao zy hmo pataosapa ta a taopa Zerôbaw moleina zy vâta nata ABEIPA Izarel zy Khazohpa a pathi a pa-iapa vâta a châ.

31 Nada thâtih hropa nata a hmotaopa zydua Izarel beizy amâ bei no tahpa kyh rona châbu liata ropa ta y vei mâ?

32 Chatawhcha Zudah beipa Asa nata Izarel beipa Baasha cha amâ bei chhôh zydua ta khâ adyuh ei ta.

33 Zudah beipa Asa a beina kô thôhna liana chata Ahiza sawchapawpa Baasha cha Tirzah khih liata Izarel sahlao zydua chô liata a bei pathao ta, kô syno nata kô palih a bei ta.

34 ABEIPA mohmô liata hmo pha lei ngaitapa tao tyh ta, Zerôbaw lâpi a chhihpa cha a chhih hra ta, Izarel sahlao zy hmo paraosapa ta a taopa moleina kha tao hra ta.