1 Abeizy 10

Studie

          |

1 ABEIPA moh châta a hmotaopa zy kyh liata Sawlawmaw moh pathâh zie Sheba abeinô ta a vaw thei nahta bie a khia ngaitapa ta pasia a chhuahpa ta ano lâ a vy ta.

2 Zerusale lâta a zituhpa a hluhpi a chhipa ta, khâpa leipa rohpahâhpa zy nata ngôh hluhpi nata alôsôhpa zy a phaopa, râraoseihpa zy a chhipa ta sie ta; Sawlawmaw lâta a tlô nahta, a pathipalôh liata a bie a vaopa zydua cha papua khaipa ta bie a chho ta.

3 Sawlawmaw chata a bie hiahripa zydua cha a chhy khai ta; abeipa pahno leipa a chhopasia thei leipa rai y vei.

4 Sheba abeinô ta Sawlawmaw sozie zydua zy, a o sapa zy,

5 a tlâhkhai liata niepa zy, a chakaotuhpa sahlao atyuna zie zy, a chakaotuhpa sahlao chakaona zie zy, a tobina zie zy, a nyu a latuhpa zy, ABEIPA o liata a hlâpa raopa hlâna zy a hmô nahta palôhrupa hleipa hnei khao leipa ta.

6 Ano chata abeipa hnohta, “Na hmotaopa zy nata na sozie zy ei râh liata ei vaw theipa kha bie pathâhpa a do ngaitapa a châ he zaw,

7 châhrasala keima ta ei mokhaoh tlaita ei cha vaw hmô hlâta cha ama reipa zo leipa na ta; a khophie chhao na chho va ei; ama reipa ei vaw theipa hlâta, na so zie nata na pha zie thata a châ hih.

8 Na chyhsa zy ama noh a hlao na, he na chakaotuhpa zy na kiapâh liata a y tyhpa, na sona bie a nahthlie tyhpa zy he ama noh a hlao na!

9 ABEIPA na Khazohpa na chô liata aly ngaitapa, Izarel zy abeidyuchhai liata cha patyusatuhpa he reithaipa ta y mawh sy! ABEIPA ta Izarel zy he chhâzaw ta kyhpachâ ta, chavâta a sia ngaitapa ta ryurei awpa ta abei ta a cha tao hih,” tah ta.

10 “Chatawhcha abeipa cha ngôh talent za kha nata syno nata khâpaleipa rohpahâhpa a hluhpi tlai nata alôsôhpa zy pie ta; Sheba abeino ta Sawlawmaw khâpaleipa rohpahâhpa a piepa hawhpa zydua ta a hluhpa he a ngia beih khao vei.

11 Hirama balyh py Ôphaira tawhta ngôh a kei phaohtuhpa zy chhao chata Ôphaira tawhta almu tho hluhpi nata alôsôpa zy vaw phaoh ei ta.

12 Chatawhcha abeipa ta almu thozy cha ABEIPA o nata abei o dôna châta nata hla satuhpa zy châta totâ nata tlaipi zy taona châta hmâh ta; atahmâ taihta cha hawhpa almu tho cha a ngiapa ta a hmô chhao hmôpa châ khao vei.

13 Chatawhcha a hia leipa Sawlawmaw ta a piepa zy tah leipa chhao cha Abei Sawlawmaw chata Sheba abeino cha a khopa zydua a hiapa maih cha pie ta. Chatanachata a yna râh lâta a di haw heih ta, a sahlao zy chhaota.

14 Sawlawmaw liata kô kha chhôhta ngôh a ngiapa a hrina lâ cha sôhdaohpa zy liata a ngiapa nata hmo a zuahtuhpa zy,

15 chyhsa a pahlaopahlipa sahlao abei zydua nata râh ryureituhpa zy liata a ngiapa zy rei leipa ta, ngôh talent za charu nata sycharu nata miacharu khopathliapa châ ta.

16 Abei Sawlawmaw chata ngôh ta daipa vyhphao laipa za no tao ta; vyhphao miakha liata ngôh sekel za charu byuh ta.

17 Chatawhcha ngôh ta daipa vyhphao za thôh tao ta”; vyhphao miakha liata ngôh mina* miathôh kho ta; chazy cha abeipa chata Lebanaw Thothi O liata soh ta.

18 Abeipa chata sianaoh abeidyuchhai rôhnah ngaitapa tao hra ta, cha cha ngôh pha chaipa ta pahu ta.

19 Abeidyuchhai chata a kiana chhâh charu y ta, cha abeidyuchhai hnôh lâ cha a hlô ta, a tyuna kâ lâ rairieh liana chata a bâh y ta, a bâh zy liana chata chakeibarôhneipa nohthlahpa pô no a duah ta,

20 kiana chhâh charu liana chata a kâ lâ rairieh liata chakeibarôhneipa pô hrawhleino a duah ta. Cha hawhpa cha khataih râh liata hmahta tao beih veih ei.

21 Abeipa Sawlawmaw nyu zydua cha ngôh sai châ ta, Lebanaw Thothi O liata hmobaoh zydua chhao cha ngôh suapa sai châ ta, tâkâri rai y vei. Sawlawmaw hro chhôh ta cha cha khâpa sawta hmahta reih veih ei.

22 Abeipa chata tilaipi liana chata Hirama balyh py a kaolâhtuhpa Tâsi balyh py hnei ta. Tasi balyh py chata kô thôh padai lymâ ta ngôh zy, tâkâri zy, sianaoh zy, veituh zy, pivaw zy vaw phaoh tyh tlôh ta.

23 Chatanachata Abei Sawlawmaw chata khizaw abei zydua cha hneirôna liata nata sona liata khô khai ta.

24 Khazohpa ta a pathipalôh liata sona a piepa cha nahthlie awpa ta khizaw liata chyhsa zydua chata Sawlawmaw cha thata pangai tyh ei ta.

25 Chyhsa to ta lymâ kô tato ta piena daiti hneipa ta tâkâri nata ngôh hmobaoh zy, poh zy, myr nata khâpaleipa rohpahâhpa zy arâ nata sabaitu zy vaw pie tyh ei ta.

26 Sawlawmaw chata talaili zy nata arâ kiahpa chyhsa zy pakhy ta; talaili sâh kha nata za palih nata arâ a kiahpa chyhsa thy kha nata sâh no hnei ta, chazy cha talaili sona khih liata zy, Zerusale liata abeipa yna liana zy chata paysa ta.

27 Chatawhcha abeipa chata Zerusale liana chata tâkâri zy cha a hluh ngaitapa vâta alô hawh tlaita pachâna taihta paysa ta, sidy thozy cha Shephelah liata theiku tho hawh deita ta pachâna taihta paysa ta.

28 Sawlawmaw arâ zy cha Kilikia râh tawhta lapa sai châ ta, sôh ama daohna hmo la chaina chhao Kilikia râh tawhta a châ chai hra.

29 Izi râh tawhtapa talaili cha tâkâri sekel za charu lymâ ta ri tyh ta; cha hawhna hra chata Hiti mo abei zydua nata Suria abeizy chhao sôhdaohtuhpa zy ta ama ripa tyh.