1 Abeizy 1

¹ Davi cha machâ ta pawpi kaw ha ta; pohzy bu tyh ei ta, châhrasala lalôh thei hlei leipa ta.

² Chavâta a chakaotuhpa zy ta a hnohta, “Eima zibeipa abeipa châta laihsa tluapata châ sala, abeipa kiapâh liana heta y thlâh ha sala, a mohôhna hâ ta; na kalachhôh liata a zia sala eima zibeipa abeipa he a lalôh thei aw,” tah ei ta.

³ Chatanachata Izarel râh zydua liana chata laihsa chhithaipa tlua ei ta, Shuna chyhsa Abishaka hmô ei ta, abeipa lâta a chhi ei ta.

⁴ Cha laihsa cha chhithai kaw ta; abeipa cha mohôh ta, chakao tyh ta; châhrasala abeipa chata a ziakhei vei.

⁵ Hakitha sawchapawpa Adônizah chata, ”Keima ei bei aw,” tahpa ta a pasâhsa kaw ta; talaili nata arâ a kiahpa chyhsa zy sypangawh a hmiako liata a râ awpa zy chhaota a chhuahnoh ta.

⁶ A paw hra chata khati no hmahta, “Khazia he hawna heta na tao?” tahpa ta palôh châ leipa ta y beih tlôh lei khâ ta. Ano he hmi pha ngaitapa châ hra ta; Absalaw a pazipa a châ.

⁷ Ano chata Zeruia sawchapawpa Zôaba nata theihthaipa Abiatha cha a chhohia ta; âmo cha Adônizah chhâh châ ei ta, bao tyh ei ta.

⁸ Theihthaipa Zadôka zy, Zehôiada sawchapawpa Benai zy, hrohsopa Natha zy, Shimei zy, Rei zy nata Davi sahlao chyhsa riahphapa zy deikua cha Adônizah chhâh châ leipa ei ta.

⁹ Adônizah chata mietahkupa zy, viahchao tôhpa zy, sahroh pasapa thawpa zy, Zôhele Alô liata thie ta, cha cha Enrôkel kiapâh liata a ypa a châ, abeipa sawchapawpa a unawhpa zydua nata Zudah râh liata abeipa nôpawpa sahlao zydua cha hrua ta,

¹⁰ hrohsopa Natha zy, Benai zy, chyhsa riahphapa sahlao nata a unawhpa Sawlawmaw deikua cha hrua vei.

¹¹ Chatanachata Natha ta Sawlawmaw nô Basheba hnohta, “Hakitha sawchapawpa Adônizah he eima zibeipa Davi pahno leipa ta a bei haw tahpa pahno va chi mâ?

¹² Atahmâ nâma a bohna awpa nata na sawchapawpa Sawlawmaw a bohna awpa ei cha chho tua aw.

¹³ Abeipa Davi lâta a kei ngia la, a hnohta, ‘Hy Abeipa, ei zibeipa y, na seichanônô hnohta, “Na sawchapawpa Sawlawmaw he, kei hnôh lâta a vaw bei tlai aw ta, ano he ei beidyuchhai liana heta a tyu aw?” tahpa ta chhie sa va chi mâ. Khazia e Adônizah he abei ta a y haw tly?’ tah mah y.

¹⁴ Abeipa bie na chho no tlaita kei chhao cha vaw zi aw na ta, na bie reipa cha ei cha vaw pa-ikhei aw,” tahpa ta reih ta.

¹⁵ Chatawhcha Basheba cha abeipa lâta chhôhpadâhpa liana chata a kei ngia ta; abeipa cha machâ kaw haw ta, Shuna chyhsa Abishaka chata abeipa cha chakao ta.

¹⁶ Basheba chata abeipa cha â bohpa ta a naoh ta, abeipa chata, “Khâpa na khoh?” vaw tah ta.

¹⁷ Ano chata, “Ei zibeipa y, ABEIPA na Khazohpa moh reipa ta na seichanônô hnohta, ‘Na sawchapawpa Sawlawmaw he keima hnoh lâta a bei tlai aw ta, ano he ei abeidyuchhai liata â tyuh aw,’ tahpa ta chhie sa haw chi ta.

¹⁸ Chahrasala Adonizah a bei hawh, ei zibeipa, abeipa chi heta pahno tlôh lei khâh chi ta.

¹⁹ Viahchao tôhpa zy, sahroh pasapa thawpa zy, mietahkupa zy thata thie ta, abei sawchapawpa zydua hrua ta, na chakaotuhpa Sawlawmaw deikua cha hrua vei.

²⁰ Chavâta ei zibeipa, abeipa hnoh lâna heta a abeidyuchhai liata ahyma a tyuh aw tahpa na chho nota Izarel sahlao zydua mokhaoh he nâma ei zibeipa, abeipa chô liata â tawpa thlâh haw.

²¹ Chata leipa ta la he hawhna he cha aw ta, ei zibeipa, abeipa he a mahpaw zy hnohta a mô hra tita cha kei nata ei sawchapawpa Sawlawmaw he hmoparaotuhpa ta maniah ama rao aw,” tah ta.

²² Abeipa bie â chho ngâ hai nona chata, hrohsopa Natha cha a kei ngia ta.

²³ “Moh teh, hrohsopa Natha â vy,” tahpa ta abeipa chho ei ta. Abeipa kiapâh a kei tlô nahta, abeipa hmiakô liata a khu lâta pao ta,

²⁴ Natha chata, “Hy abeipa, ei zibeipa y, ‘Ei hnoh lâta Adônizah he a bei aw ta, ei abeidyuchhai liata a tyuh aw, na tah ma?’

²⁵ Atanoh he zu ta, viahchao tôhpa zy, sahroh pasapa thawpa zy, mietahkupa zy thata thie ta, abei sawchapawpa zydua, pheisaih hyutuhpa zy, theihthaipa Abiatha zy hrua ta; nie nata do ta y ei ta, Khazohpa ta abeipa Adônizah he hrôbieh mawh sy,’ ama tah.

²⁶ Anodeikuacha kei na chakaotuhpa tlai nata theihthaipa Zadôka nata Zehôiada sawchapawpa Benai nata na chakaotuhpa Sawlawmaw cha maniah hrua vei.

²⁷ He he abeipa ei zibeipa bie ta a taopa a châ tlôh khiahta cha abeipa ei zibeipa heta a hnoh lâta abeidyuchhai liata atyuh awpa he ahyma a châ tahpa na chakaotuhpa zy he na vaw chho leipa ma a châ aw?” tah ta.

²⁸ Chatanachata abeipa Davi chata a chhy ta, “Basheba na aw pa teh u,” tah ta. Chatawhcha abeipa kiapâh lâna chata vawh ta, abeipa hmiakô liata a kei duah ta.

²⁹ Abeipa chata chhie sa ta, “Nôpona zydua liata ei hrona a pabohtuhpa ABEIPA moh reipa ta,

³⁰ na hnohta, ABEIPA Izarel zy Khazohpa moh reipa ta, ‘Na sawchapawpa Sawlawmaw cha ei hnoh lâta â vaw bei tlai aw, kei vyuhpa ta ei abeidyuchhai liana heta â tyuh aw,’ tahpa ta chhie ei sapa hawhna tlai khata atanoh tlai liana chhao heta ei tah aw,” tah ta.

³¹ Basheba cha â khu lâta pao ta, abeipa cha a naoh ta, “Ei zibeipa, abeipa Davi he, chhâzaw ta hroh mawh sy;” tah ta.

³² Abeipa Davi ta, “Theihthaipa Zadôka nata hrohsopa Natha nata Zehôiada sawchapawpa Benai na aw pa teh u,” tah ta. Abeipa hmiakô lâna cha vawh ei ta.

³³ Abeipa ta ama hnohta, “Nama zibeipa chakaotuhpa zy a chhi ula, ei sawchapawpa Sawlawmaw he keima alâ tlai chô liata pakiasa ula, Kihaw su lâta za chhihtha teh u;

³⁴ theihthaipa Zadôka nata hrohsopa Natha ta cha liana chata Izarel zy abei châta sathaw za thu mawh sy; chiahmie tô ula, ‘Khazohpa ta abeipa Sawlawmaw hrôbieh mawh sy!’ tah teh u.

³⁵ Ano cha kaw zi aw eichi ta, ei abeidyuchhai liata â tyuh aw; ano he kei vyuhpa ta a bei awpa châ tlôh ta; ano he Izarel râh nata Zudah râh hyutuhpa châta ei rao,” tah ta.

³⁶ Chatawhcha Zehôiada sawchapawpa Benai chata abeipa cha a chhy ta, “Amen; ABEIPA cha ei zibeipa, abeipa hnohta a y tyhpa hawhta Sawlawmaw hnohta chhao y lymâ hra sala, ei zibeipa abeipa Davi abeidyuchhai cha parôhnahsa via mawh sy,” tah ta.

³⁸ Chatanachata theihthaipa Zadôka zy, hrohsopa Natha zy, Zehôiada sawchapawpa Benai zy, Khere mozy, Pele mozy cha zu ei ta, Kihaw su lâta a chhi ei ta.

³⁹ Theihthaipa Zadôka chata poh-o tawhtapa sathaw sona ki la ta, Sawlawmaw thu ta. Chiahmie tô ei ta; chyhsa zydua ta, “Khazohpa ta abeipa Sawlawmaw hrôbieh mawh sy!” tah ei ta.

⁴⁰ Chatawhcha zawpi sahlao zydua chata ano cha kaw zi ei ta, zawpi zy chata ramo zy tô ei ta, thata aly ei ta, ama pyu chata alei chalyu ta patlaw ta.

⁴¹ Adônizah nata hruapa sahlao a hnohta a ypa zydua chata ama kyhchhi a pai nahta thei ei ta. Zôaba ta chiahmie tôpa a thei nahta, “Khihpi chhôh liata pyu kalihpi a to ngâpa cha kheihtazie ta ma a châ tly?” tah ta.

⁴² Chahawhta a rei nona tlai chata theihthaipa Abiatha sawchapawpa Zawnatha vawh ta; Adônizah chata, “A vy tua, nâ cha chyhsa siapa châ chi ta, thâtihphapa na vaw tlôkhei thlyu aw,” vaw tah ta.

⁴³ Zawnatha chata a chhy ta Adônizah hnohta, “Tlôkhei va na, eima zibeipa, abeipa Davi ta Sawlawmaw abeipa ta a tao haw;

⁴⁴ ano hnohta theihthaipa Zadôka zy, hrohsopa Natha zy, Zehôiada sawchapawpa Benai zy, Khere mozy, Pele mozy, abeipa ta tuah ta; abeipa alâ chô liata ama pakiasa haw;

⁴⁵ theihthaipa Zadôka nata hrohsopa Natha ta Kihaw su liata abei châta sathaw thu haw ei ta, cha tawhna chata thapha ngaitapa ta a khy ei ta, cha chata khihpi chhôh a khaipalie ngâ. Cha cha a pyu nama theipa cha a châ.

⁴⁶ Sawlawmaw cha khihnarâh abeidyuchhai liana chata a tyuh haw ta.

⁴⁷ Abeipa chakaotuhpa zy cha, ‘Na Khazohpa ta na moh hlâta Sawlawmaw moh cha papha via sala, na abeidyuchhai hlâta a abeidyuchhai cha parôhnahsa via mawh sy,’ tahpa ta eima zibeipa, abei Davi a lykhei awpa ta thata sie hra ei ta. Chatawhcha abeipa cha a rakhô liata a bôh ta.

⁴⁸ Chatawhcha abeipa chata he tana heta a tah, ‘ABEIPA Izarel zy Khazohpa atanoh tlai ta, ei abeidyuchhai liata atyuh awpa a vaw raotuhpa cha reithaipa ta y mawh sy, ei mo tlaita a hmô haw hih,’ tahpa ta,” tah ta.

⁴⁹ Adônizah chyhsa hruapa zydua chata chi haw ei ta, thyu ei ta, âmo lâpi chyu lâta sie khai haw ei ta. "50 Adônizah chata Sawlawmaw cha chi ta; thyu ta, maisâh kizy kei patu haw ta?"

⁵¹ Adônizah ta abeipa Sawlawmaw chi ta, ‘Abeipa Sawlawmaw heta a chakaotuhpa he zaozi ta a thie lei awpa ta kei lâta chhiesa mawh sy,’ tahpa ta maisâh ki a patu,” tahpa ta Sawlawmaw cha chho ei ta.

⁵² Sawlawmaw chata, “Chyhsa ngâchhihpa a châpa a palâsa khiahtala, a sâbu miakha hmah alei liata tla aw vei; anodeikuacha hmoparaopa a hnei tahpa pahnona a y khiahtala a thi aw,” tah ta.

⁵³ Chatanachata Abeipa Sawlawmaw chata chyhsa tuah ta, maisâh tawhtapa cha a zâ chhi ei ta. Chatawhcha vawh ta abeipa Sawlawmaw cha a naoh ta; Sawlawmaw chata a hnohta, “Na o lâ a di teh,” tah ta.