1 Thatihzy Rona 5

Studie

  

1 Izarel saw tuapa Rubena sawchapawpazy cha; (ano cha saw tuapa cha châ ta; anodeikuacha a paw rakhô a papuapaleipa vâta a saw tuapa châna cha Izarel sawchapawpa Zawsi sawchapawpazy piepa châ ta, chatanachata pathlatuhpazy a laichadaina cha saw tuapa châna lâta a laichadai awpa châ khao vei;

2 Zudah chata a unawhpazy khô haw tlôh ta, ano liata chata chyhsa laipa cha vaw pua ta. saw tuapa châna deikua cha Zawsi topa a châ),

3 Izarel saw tuapa Rubena sawchapawpazy cha: Hana zy, Palu zy, Hezrona zy, Kami zy ama cha.

4 Zôel sawchapawpa cha: Shemaiah châ ta, cha sawchapawpa cha Kôka châ ta, cha sawchapawpa cha Shimei châ ta,

5 cha sawchapawpa cha Mika châ ta, cha sawchapawpa cha Reai châ ta. cha sawchapawpa cha Baal châ ta.

6 cha sawchapawpa cha Berah. Asuria beipa Tikapinesa ta a chhipa cha a châ; ano cha Rubena mo chyhsa laipa a châ.

7 Ama pathlatuhpazy pho laichadaina zie ta, a unawhpazy pho hyutuhpazy cha: Nebô nata Baalmiôna taihta a ypa abei viapa Zeiel zy, Zekaria zy, Bela zy ama châ,

8 cha paw cha Azaza châ ta, cha paw cha Shema châ ta, cha paw cha Arôera châ ta.

9 Ano chata nochhi lâta Euphrate tawhta râhpathohpa a ngiana taihta a pahrâ, Kilia râh liana chata ama sahroh a vaw pôh hawpa vâta.

10 Chatawhcha Sawla a hro nona cha Hakri mo chho ei ta, cha sahlao cha ama ku liata panawhpa ta y haw ei ta; chatanachata Kilia nochhi lâ râh ualua ta ama poh-ozy liata pahrâ ei ta.

11 Kada sawchapawpazy cha âmo kiapâh Basana râh liata Salekah taihta pahrâ ei ta;

12 hyutuhpa Zôel zy, a pazipa Shapha zy, Zanai zy, Basana liatahpa Shaphata zy.

13 Ama unawhpa ama paw chhôhkhapa zy: Mikhael zy, Meshula zy, Sheba zy, Zôrai zy, Zaka zy, Zia zy, Eba zy chhaota pasari ama châ.

14 Hezy he Huri sawchapawpa Abihai sawchapawpazy ama châ, cha cha Zarô sawchapawpa châ ta, cha cha Kilia sawchapawpa châ ta, cha cha Mikhael sawchapawpa châ ta, cha cha Zesisai sawchapawpa châ ta, cha cha Zahdô sawchapawpa châ ta, cha cha Buza sawchapawpa châ ta;

15 Ahi cha Abadiel sawchapawpa châ ta, cha cha Kuni sawchapawpa châ ta, âmo chhôhkha hyutuhpa a châ;

16 chatanachata Kilia râh liata Basana liata nata a khihpizy liata nata Saraw chheipâh zydua ama râg rakha taihta pahrâ ei ta.

17 Cha zydua cha Zudah râh beipa Zawtha a bei nota nata Izarel râh beipa Zerôbaw a bei nota pathlatuhpazy a laichadaina liata ropa ama châ.

18 Rubena mozy, Kada mozy, Manase pho khophiezy hry liata riahphapa vyhphao nata zaozi a chaba theipa, châtai a ka theipa, adyuh a thaipazy cha, thy palih nata sâh palih nata za sari nata sycharu ama châ.

19 Hakri mozy, Zetu mozy, Nephi mozy, Nôdaba mozy cha adyuh ei ta;

20 baopa ta y ei ta, Hakri mozy nata ama hnohta a ypa zydua cha ama ku liata pihpa châ haw ei ta, adyuh nona chata Khazohpa pado ei ta, ano cha a vaw chhy ta, ano liana chata ngâna ama pahniepa vâta.

21 Ama sahrohzy patupa ei ta; ama râraoseihpa thy pangawh nata mietahkupa thy syno nata thy pangawh nata alâ sâh no nata chysa thy sykha chhaota.

22 Cha adyuhna cha Khazohpa a ry tahkheipa a châpa vâta chyhsa hluhpi ama thie. Seichâna lâta siekheipa ta ama yna taihta ama yna râh cha pahrâ haw ei ta.

23 Manase pathla pho khophie zy cha cha râh liana chata pahrâ ei ta, Basara tawhta Baalhamaw zy, Seni zy, Hamaw Tlâh taihta pôh lymâ ei ta.

24 Hezy he ama chhôhkha pawhrâhpa zy cha ama châ, Ephera zy, Ishi zy, Eliel zy, Azriel zy, Zeremiah zy. Hôdaviah zy, Zahdiel zy, chyhsa thatlôpa riahphapa, chyhsa mohpathâhpa ama mahpawzy chhôhkha pawhrâhpa zy cha.

25 Châhrasala ama mahpawzy Khazohpa chô liata hmo parao ei ta, ama hmiakô liata Khazohpa ta a vaw pahleipadia hawpa, cha râh liatahpa khazoh liana chata aphei haw ei ta.

26 Chatawhcha Izarelzy Khazohpa chata Asuria beipa Pula palôhrupa nata Asuria beipa Tikapinesa palôhrupa cha pathyu ta, ano chata Rubena mozy, Kada mozy, Manase pho khophie zy cha patu ta, Halah liata zy, Haba liata zy, Hara liata zy. Kôza chavah liata zy a chhi ta, atanoh taihta cha liana chata ama y.