1 Thatihzy Rona 26

¹ Ochhivaihtuhpa py pachhaihna zie: Kôrah mozy cha, Asapha sawchapaw zy hryta Kôrah sawchapawpa Meshelamiah châ ta.

² Meshelamiah chata sawchapaw zy hnei ta: a saw tuapa cha Zekariah châ ta, a panona cha Zediael, a pathôhna cha Zabadia, a papalihna cha Zathaniel, .

³ a papangawhna cha Elami, a pacharuna cha Zehôhana, a pasarina cha Eliehônai a châ.

⁴ Ôbededôma ta sawchapawzy sa ta: a saw tuapa cha Shemaiah châ ta, a panona cha Zehôzaba, a pathôhna cha Zôah, a papalihna cha Saka, a papangawhna cha Nethanel,

⁵ a pacharuna cha Ainiel, a pasarina cha Iskara, a pachariena cha Peluthai châ ta; ano cha Khazohpa ta byhnâ pie tlôh ta.

⁶ A sawchapawpa Shemaiah liana chata sawchapawpa ama chhôhkha pawhrâhpa zy pua hra ei ta chyhsa thatlôpa, riahphapa ama châ sai.

⁷ Shemaiah sawchapawzy cha; Ôthani zy, Rephael zy, Ôbeda zy, Elazaba zv châ ei ta, ama unawhpa Elihu nata Semakiah cha chyhsa thatlô ngaitapa ama châ.

⁸ Cha zydua cha Ôbededôma pathla zy ama châ, âmo nata ama sawchapawzy nata ama unawhzy cha chakaona kyh liata chyhsa pitlohpa châ ei ta; Ôbededôma liatahpa zy cha sycharu nata pano ama châ.

⁹ Meshelamiah chata sawchapaw nata unawhpa thatlô ngaitapa pahrawhleicharie a hnei.

¹⁰ Merari pathlazy hry liata Hôsa chata sawchapawpa zy hnei hra ta; Shimri cha pawhrâh chaipa châ ta (saw tuapa a châ lei tarawpa ta pawhrâh chaipa ta a tao).

¹¹ A panona cha Hilkia châ ta, a pathôhna cha Tebalia, a papalihna cha Zekariah a châ: Hosa sawchapaw nata a unawhzy cha ama zydua ta pahrawhleithôh ama châ.

¹² Chazy pawhrâhpa sahlao hry liatahpa cha ama unawhpa zy hawhta, ABEIPA o liata chakaona raihria liata tovyuh hneipa ta, ochhivaihtuhpa py ta ama pachhaihpa zy cha ama châ;

¹³ a lai a chyh ta, ama chhôhkha yzie lymâ hawhta chhikao to liata a y awpa ta pachao ei ta.

¹⁴ Chatawhcha nochhi lâ chata pachaopa cha Shelemiah chô liata tla ta. Chatawhcha ryureituhpa so ngaitapa, a sawchapawpa Zekariah chata pachao ei ta, maw lâ cha ano châta tla ta.

¹⁵ Chho lâ cha Ôbededôma châ ta, hmo sopakhyna o cha a sawchapaw zy châ ta,

¹⁶ Notla lâ cha a khyna lâpi liata Shelekha ochhi vaina chhaota, Supi nata Hosâ châ ta.

¹⁷ Nochhi lâ cha Livai mo pacharu y ei ta, nohchareih maw lâta papalih, noh chareih chhô lâta papalih, hmo sopakhyna o liata pano rairieh;

¹⁸ notla lâ parbara chata a ngiana liata papalih, parbara liata pa no.

¹⁹ Chazy cha Kôrah mo sawchapaw zy nata Merari mo sawchapawpa zy ochhivaihtuhpa py ta ama pachhaihpa zy cha a châ.

²⁰ Chatawhcha ama unawhpa Livai sahlao, Khazohpa sôh sopakhyna o nata hmo pathaihpa sopakhyna o a vaihtuhpa cha Ahiza châ ta.

²¹ Ladana sawchapawpa zy cha, Kasao mo cha Ladana sawchapawpa zy ama châ, Kasao mo Ladana chi chhôhkha pawhrâhpa: Zehieli.

²² Zehieli sawchapawpa zy cha, Zethama nata a unawhpa Zôel ama châ, chazy cha ABEIPA sôh sopakhyna o a vaotuhpa zy ama châ,

²³ Amira mozy, Izha mozy, Hebraw mozy, Uziel mozy hry liatahpa.

²⁴ Mawsi sawchapawpa, Kesaoma sawchapawpa Shebuel cha sôh sopakhyna o a vaotuhpa a cha,

²⁵ a unawhzy cha: Elieza sawchapawpa Rehabiah zy, a sawchapawpa Zesai zy, a sawchapawpa Zôrama zy, a sawchapawpa Zikri zy, a sawchapawpa Shelômô zy ama châ.

²⁶ Shelômô nata a unawh zy cha Abei Davi nata ama chhôhkha pawhrâhpa pheisaih sâh kha hyutuhpa zy nata za kha hyutuhpa zy nata pheisaih py hyutuhpa zy ta ama pathaisa hawpa hmo pathaihpa sopakhyna o zydua a vaotuhpa ama châ.

²⁷ Adyuna liata hraona hmozy cha ABEIPA o taopathi nawpa ta ama soh.

²⁸ Hrohsopa Samuel zy, Kisa sawchapawpa Sawla zy, Nera sawchapawpa Abne zy, Zeruia sawchapawpa Zôaba zy ta, ama pathaisapa zydua, ahyrai ta hmo ama pathaisa hawpa cha Selômitha nata a unawhpa zy a vaopa sai a châ.

²⁹ Izha mo, Khenaniah nata a sawchapawpa zy cha, Izarel râh khôtho lâ kyh liata hyutuhpa zy nata ryureituhpa zy ama châ.

³⁰ Hebraw mo, Hasabiah nata a unawh, chyhsa riahphapa sâh kha nata za sari cha Zawdah haosâ notla lâta, ABEIPA raihria zydua lâta abei chakaona lâ raihria liata Izarel mo a vaotuhpa ama châ.

³¹ Hebraw mo Zerizah cha ama chhâ kyh liata chhôhkha pawhrâhpa lâna chata Hebraw mo pawhrâh chaipa a châ. Davi kô sypalih a bei kô ta ama tlua nona khata Kilia râh liata Zaza khih liana chata chyhsa thatlôpa, riahphapa ama hmô.

³² A unawhpa chyhsa riahphapa zy cha sâh no nata za sari ama châ, chazy cha chhôhkha pawhrâhpa Abei Davi Khazohpa lâ hmo to nata abei raihria lâ kyh liata Rubena mozy, Kada mozy, Manase mo pho khophie zy hyutuhpa ta a taopa zy ama châ.