1
Tyre beipa Hirama ta Davi lâta chyhsa tuah ta, sidy thozy paphao ta, alô a daihtuhpa zy, zôthaipa zy, a o sa awpa ta tuah hra ta.
2
Davi chata ABEIPA ta Izarel mozy chô liata abeipa ta ano cha pa-ipa ta, a chyhsa Izarelzy vâta a khihnarâh cha a parôhnahsa tahpa pahno haw ta.
3
Davi chata Zerusale liata lahpinô zy hnei baichha heih ta, Davi chata sawchapaw nata sawchanô zy hnei heih ta.
4
Zerusale liata saw a sapa zy cha hezy he ama châ; Shamua zy, Sôba zy, Natha zy, Sawlawmaw zy,
5
Ibha zy, Elisua zy, Elpale zy,
6
Nôkah zy, Nephe zy, Zaphia zy,
7
Elisama zy, Beliada zy, Eliphele zy.
8
Philistina mozy ta Davi cha Izarel mo zydua abei châta sathaw ama thu tahpa ama thei nahta, Philistina mo zydua chata Davi tlua awpa ta khy haw ei ta, Davi chata a vaw thei nahta âmo adyuh awpa ta puahnao ta.
9
Philistina mozy cha Rephai saikao liata thyuhnao ei ta.
10
Davi chata, “Philistina mozy adyuh awpa ta ei khy aw ma? Ei ku liana heta âmo sahlao cha na pie aw ma?” tahpa ta Khazohpa a chhohia ta. ABEIPA chata Davi hnohta, “Khy teh, âmo sahlao cha na ku liata ei pie aw,” tah ta.
11
Chatanachata Baalperazi lâta khy ta, cha liana chata Davi ta âmo sahlao cha pahnie ta, “Khazohpa ta ei khakhaipa zy cha ei ku hmâpa ta ti pasapa haw tlai ta eina papaipa haw,” tah ta.
12
Cha liana chata ama khazoh nohthlahpa zy cha siesai ei ta, Davi ta bie pie ta, mei ta rao haw ei ta.
13
Philistina mozy cha saikao liata thyuhnao heih ei ta.
14
Davi ta Khazohpa a chhohia heih ta, Khazohpa ta a hnohta, “A chadai leipa ta; a hneisai la, mulberi kô dady lâta tlao a kei dyuh teh.
15
Chatawhcha mulberi kô kithlao liata a siepa pyu hawhta a paro ngâpa na thei khiahtala, adyuh awpa ta pua teh, Philistina pheisaih zy adyuh awpa ta na hmiakô liata Khazohpa a pua haw, tahna a châ aw,” tah ta.
16
Chatawhcha Khazohpa ta bie a piepa hawhta Davi chata tao ta, Philistina pheisaih zy cha Kibia tawhta Keza taihta adyuh ei ta.
17
Chatanachata râh to liata Davi moh cha vaw pathâh haw ta, ABEIPA ta pho to ano pachisa haw ta.
