Theihthaina 13

¹ ABEIPA ta Mawsi nata Arawna hnohta,

² Chyhsa a sapa vo a thloh tlyma, a hmah chaku a tao tlyma, a pabôpa tlyma, a vo liata phawhpa hri a châ awpata a lyu khiahtala, theihthaipa Arawna lâta tlyma, a sawchapawpa theihthaipazy hryta, ahy lâta tlyma chhitha awpa a châ,

³ theihthaipa chata sapa vo liata hri cha vaw moh aw ta; a hri yna liata hmi cha phawhpa ta a hri cha a sapa vo hlâta â thuhpata â lâ khiahtala phawhpa hri cha ta theihthaipa chata ano vaw moh aw ta, chyhsa pathaih leipa a châ tahpa a phuah awpa a châ.

⁴ A sapa vo liata pabôpazy cha vaw râh ta, a vo hlâta a thupa ta â lâ leipa ta, a hmi cha arâh leipa khiahtala, hri a ohtuhpa cha theihthaipa ta noh sari â nano ta khawhlôh aw ta;

⁵ theihthaipa chata noh sari noh ta ano cha moh aw ta, chatawhcha a hri cha ualua ta hmô ta, a hri cha vo liata a kawh via leipa khiahtala theihthaipa chata noh sari â nano ta khawhlôh heih aw ta;

⁶ chatawhcha theihthaipa ta noh sari noh ta moh heih aw ta, hri cha vyhpa ta, a vo liata a kawh leipa khiahtala, theihthaipa chata a pathaih tahpa a phua awpa a châ; riatha dei a châ, a pohzy pasu aw ta, a vaw pathaih aw.

⁷ Anodeikuacha a pathaihna awpata theihthaipa a pamosa tawhta riatha cha a vo liata a kawh khiahtala, theihthaipa a pamosa heih awpa a châ.

⁸ theihthaipa chata vaw moh aw ta, riatha cha a vo liata a kawh khiahtala, theihthaipa chata pathaih leipa a châ tahpa a phuah aw; phawhpa hri a châ.

⁹ Phawpa hri chyhsa ta a oh khiahtala theihthaipa lâta chhitha awpa a châ;

¹⁰ theihthaipa ta vaw moh aw ta, vo liata a râhpa ta thlohpa ta a hmi papawhpa ta, a thlohpa cha a taopalie khiahtala.

¹¹ phawhpa hri parohpa a sapa liata a ypa cha ta, theihthaipa ta pathaih leipa a châ tahpa phuah aw ta; â nano ta khawhlôh awpa châ leipa ta, pathaih leipa châ tlôh ta.

¹² Chatawhcha phawhpa cha vo liata kawhpa ta, a hri a ohtuhpa cha a vo a luh tawhta a phei pawhmao taihta theihthaipa pahno theipa rakha phawhpa ta a bu khiahtala.

¹³ Theihthaipa ta moh aw ta, phawhpa ta a sapa zydua a bu haw khiahtala, hri a ohtuhpa cha a pathaih tahpa a phuah awpa a châ; râh khai ha ta, a pathai haw.

¹⁴ Anodeikua cha a sapa a taopalie khiahtala pathaih leipa a châ aw.

¹⁵ Theihthaipa chata sapa taopaliepa cha moh aw ta, pathaih leipa a châ tahpa a phuah awpa a châ, phawhpa a châ.

¹⁶ Anodeikua cha sapa taopaliepa cha a vaw nano leipa ta a vaw râh heih khiahtala theihthaipa chata hri a ohtuhpa cha pathaih leipa châ vei tahpa a phuah awpa a châ a pathaih haw.

¹⁸ Chatawhcha sapa vo liata kheihluh y ta, vaw tlâh haw ta.

¹⁹ a kheihluh yna su liata a râhpa ta a kaw byuh tlyma, a râhpa a saihpâpa ta a pabô tlyma khiahtala, theihthaipa pamosa awpa a châ.

²⁰ theihthaipa ta vaw moh aw ta. vo hlâta a thuhpa ta â lâ ta, a hmi cha a pawh khiahtala, theihthaipa ta pathaih leipa tahpa a phuah awpa a châ; phawhpa hri cha ta, kheihluh liata a vaw pua.

²¹ Anodeikuacha theihthaipa ta vaw moh ta, hmi pawhpa y leipata, bâhta a vyhpa dei a châ khiahtala, theihthaipa ta noh sari â nano ta khawhlôh aw ta.

²² chatawhcha vo liata a kawh khiahtala vachhuh tlyma ahmaohpakhyna poh-o chhikao kiapâh liata theihthaipa lâta a cheih awpa a châ.

²³ Anodeikuacha cha pabôpa râhpa cha a yna ualua ta ypata a kawh leipa khiahtala, kheihluh hmahdawpa dei châ ta; theihthaipa ta a pathaih tahpa a phuah awpa a châ.

²⁴ Chatawhcha sapa vo cha mei ta kâpata a kâpa taopaliepa cha a râhpa a saihpata tlyma, a râhpa tlyma ta a pabô khiahtala,

²⁵ theihthaipa ta moh aw ta, a pabôpa liana chata hmi cha pawhpa ta, vo hlâta a thuhpata â lâ khiahtala phawhpa châ ta; mei kâpa liata a vaw luahpa a châ, chatanachata theihthaipa ta pathaih leipa a châ tahpa a phuah awpa a châ; phawhpa hri a châ.

²⁶ Anodeikuacha theihthaipa ta vaw moh ta, pabôpata hmi a pawhpa y leipa ta, vo hlâta a thuh leipa ta, bâhta a vyhpa dei a châ khiahtala theihthaipa ta noh sari â nano ta khawhlôh aw ta,

²⁷ chatawhcha theihthaipa ta noh sari noh ta ano cha moh aw ta; vo liata a kawh khiahtala theihthaipa ta pathaih leipa a châ tahpa a phuah awpa a châ; phawhpa hri a châ.

²⁸ Chatawhcha a pabôpa a yna ualua ta y thlâh hapa ta, vo liata kawh leipa ta, bâhta a byuhpa dei a châ khiahtala, mei kâpa thlohna dei châ ta, theihthaipa ta a pathaih tahpa a phuah awpa a châ; mei kâpa hmahdawpa dei a châ.

²⁹ Chapaw tlyma, chanô tlyma ta a luh liata tlyma, a kâ liata tlyma hri a a hnei khiahtala.

³⁰ theihthaipa ta hri cha moh aw ta, vo hlâta a thuhpata a lâpa ta hmi a maihpa a dipa ta a y khiahtala, theihthaipa ta pathaih leipa a châ tahpa a phuah awpa a châ; riatha chata luh tlyma, kâ tlyma phawhpa a châ.

³¹ Chatawhcha theihthaipa ta riatha hri cha moh ta, vo hlâta a thuh leipata â lâ ta, a hmi vyhpa a y vei khiahtala, theihthaipa ta riatha hri a hneituhpa cha noh sari ânano ta khawhlôh aw ta,

³² noh sari noh ta, theihthaipa ta hri cha moh aw ta; riatha cha kawh leipa ta, hmi maihpa y leipa ta, riatha cha vo hlâta a thupata a lâ vei khiahtala,

³³ ngyu awpa châ ta, riatha deikua cha a hmi a ngyu awpa châ vei, chatawhcha theihthaipa ta riatha a hneipa cha noh sari hropa ânano ta khawhlôh aw ta;

³⁴ noh sari noh ta theihthaipa ta riatha cha moh heih aw ta, riatha cha vo liata kawh leipa ta, vo hlâta a thuhpa ta â lâ vei khiahtala, theihthaipa ta a pathaih tahpa a phuah awpa a châ; chatawhcha pohzy pasu aw ta, a vaw pathaih ha aw.

³⁵ Anodeikuacha riatha cha a pathaih khai tawhta a vo liata a kawh khiahtala,

³⁶ theihthaipa ta ano cha moh aw ta, riatha cha vo liata a kawh khiahtala theihthaipa chata hmi maihpa cha moh cheingei byuh aw vei; pathaih leipa a châ.

³⁷ Anodeikuacha riatha cha a ualua ta a ypa ta hmô ta, hmi vyhpa a thao khiahtala, riatha cha a tlâhpa châ ta, a pathaih; theihthaipa ta a pathaih tahpa a phuah awpa a châ.

³⁸ “Chatawhcha chapaw tlyma, chanô tlyma, ama sapa vo liata a pabôpa, a pabôpa a râh ngaitapa a y khiahtala,

³⁹ theihthaipa ta moh aw ta, ama sapa vo liata pabôpa cha bâhta a vyhpa dei a châ khiahtala, pabô chakhyhpa châ ta, vo liata vaw puapa châ ta; a pathaihpa a châ.

⁴⁰ “Chyhsa a sâ a py khai khiahtala, luh pôlôpa châ ta, châhrasala a pathaihpa a châ.

⁴¹ A laki sâ a py khai khiahtala, luh tlypa châ ta, châhrasala a pathaihpa a châ.

⁴² Anodeikuacha luh pôlôpa liata tlyma, luh liata tlyma, hri a saipata a râpa a y khiahtala, a luh pôlôpa tlyma, a luh tlypa tlyma liata vaw puapa phawhpa a châ.

⁴³ Chatawhchata theihthaipa ta moh aw ta, a luh pôlôpa tlyma, a luh tlypa tlyma liata, hri a vaw puapa cha phu saihpa ta sapa vo liata phawhpa hawhta â lâ khiahtala.

⁴⁴ chyhsa phawhpa châ ta, pathaih leipa a châ; theihthaipa ta pathaih leipa a châ tahpa a phuah thlyu awpa a châ; phawhpa cha a luh liata a châ.

⁴⁵ “Phawhpa hri a ohpa cha, a phozy hriepa châ aw ta, a sa zy pathlia aw ta, a hmao chô lâ khu aw ta, ‘Pathaih leipa, pathaih leipa,’ tahpa ta a awh awpa a châ.

⁴⁶ Phawhpa ta a bu chhôh cha a puapa châ aw ta; a pathaih leipa châ ta; â nano ta a y awpa a châ, a yna awpa cha ariena su khôtho lâ a châ.

⁴⁷ “Chysia chhao, sahmi chysia tlyma, pala ri dipa chysia tlyma,

⁴⁸ atôh liata tlyma, a phei liata tlyma rai, pala ri dipa tlyma, sahmi tlyma rai, savo tlyma khâpa rai savo ta taopa liata tlyma,

⁴⁹ phawhpa hri ypata, cha hri cha chysia liata tlyma, savo liata tlyma, a tôh liata tlyma, a phei liata tlyma, khâpa rai savo ta a taopa liata tlyma, a hrohpâpata tlyma, a saihpâpa ta tlyma ta, a vaw lâ khiahtala, phawhpa hri châ ta, theihthaipa pamosa awpa a châ.

⁵⁰ Chatawhcha theihthaipa ta hri cha moh aw ta, hri a hneipa cha noh sari â nano ta khawhlôh aw ta;

⁵¹ noh sari noh ta hri cha moh aw ta, hri cha chysia a tôh liata tlyma, a phei liata tlyma, savo khâpa châta rai ta ama hmâpa, savo liata zy tlyma, pakawhpa ta a y khiahtala, hri cha phawhpa hri a kawh ngâpa chi châ ta, pathaih leipa a châ.

⁵² Chysia cha, a tôh liata tlyma, a phei liata tlyma, sahmi tlyma, pala ri dipa tlyma, savo ta taopa chi rai tlyma, phawhpa yna maih cha mei ta a rao awpa a châ, phawhpa a kawh ngâpa chi châ tlôh ta; rao thlyu awpa a châ.

⁵³ Chatawhcha theihthaipa ta vaw moh ta, chysia a tôh liata tlyma, a pheih liata tlyma, savo ta taopa chi maih liata chhao hri cha a kawh leipa khiahtala,

⁵⁴ hri yna cha theihthaipa ta pasu awpa bie pie aw ta, noh sari a hropa â nano ta a khawhlôh heih aw;

⁵⁵ chatawhcha hri yna pasu khai tawhna chata theihthaipa ta moh heih aw ta. Hri â luanazie cha â nano vei khiahtala, hri cha kawh vei hrasala, pathaih hlei vei; mei ta na rao awpa a châ, a phawhpa hri cha a chhôh lâ tlyma, a khôtho lâ tlyma rai châ sala.

⁵⁶ Chatawhcha theihthaipa ta vaw moh ta, pasu khai tawhta, a vyhpâpa dei a châ khiahtala, chysia tawhtapa tlyma, savo tawhtapa tlyma, a tôh tawhtapa tlyma, a pheih tawhtapa tlyma cha hrie aw ta,

⁵⁷ chysia cha, a tôh liata tlyma. a pheih liata tlyma, savo ta taopa zy liata tlyma a la thlâh ha khiahtala a vaw pua heihpa cha ta, hri a hneipa cha mei ta na rao awpa a châ.

⁵⁸ Chatawhcha chysia cha, a tôh tlyma, apheih tlyma, khâparai savo ta taopa chi rai tlyma, na pasu nahta hri ta a paisai khiahtala, pasu heih awpa châ ta, chatanachata a vaw pathaih aw.

⁵⁹ He he chysia sahmi tlyma, pala ri dipa tlyma a tôh liata tlyma, a pheih liata tlyma, savo ta taopa chi rai zy tlyma liata phawhpa hri a ypa, a pathaih nata pathaih lei phuana ryhpa awpa cha a châ tahpa ta chho ta.